ހަޤީޤަތް އޮޅުވާލައިގެން ސަރުކާރަށް ތާއީދު އޮތްކަން ދެއްކުމަށް މެންބަރު ދާއޫދު ކުރި މަސައްކަތް ފެނަށް
11 ޖެނުއަރީ 2026 | އާދީއްތަ 12:13ގިނަ ރައްޔިތުން ދެކޭގޮތުގައި މެންބަރު ދާއޫދު މަސައްކަތް ކުރައްވަނީ ހަޤީޤަތް އޮޅުވާލައިގެން ސަރުކާރުގެ ތާއީދު އޮތްކަން ދެއްކުމަށް.
ކުޅުދުއްފުށީ އުތުރު ދާއިރާގެ މަޖިލީސް މެންބަރު, މުޙައްމަދު ދާއޫދު | އެމްއެމްޓީވީ
ވެރިކަން ކުރާ މައި ޕާޓީ، ޕީޕަލްްސް ނޭޝަނަލް ކޮންގްރެސް (ޕީއެންސީ) ގެ އޮފީސް ހުޅުވުމަށް ބޭއްވި ހަރަކާތެއްގެ ތެރެއިން ބޭއްވި ނޫސްވެރިންގެ ބައްދަލުވުމުގައި ކުޅުދުއްފުށި އުތުރު ދާއިރާގެ މަޖިލިސް މެންބަރު މުޙައްމަދު ދާއޫދު (ޑޭވިޑް) ދެއްވި ބަސްދީގަތުމަކާއި ގުޅިގެން އާންމުންގެ ބޮޑެތި ފާޑުކިއުންތަކެއް އަމާޒުވެއްޖެ އެވެ.
މީސްމީޑިއާގައި މިހާރު ދައުރުވަމުންދާ މި ބަސްދީގަތުމުުގައި މެންބަރު ދާއޫދު ވިދާޅުވީ، ކުޅުދުއްފުށި ދާއިރާގެ ރައްޔިތުން ތިބީ ރައީސް ޑރ. މުޙައްމަދު މުޢިއްޒުގެ ސިޔާސަތުތަކަށް ވަރަށް ބޮޑަށް ތާއީދުކޮށް، ކުރިއަށް އޮތް ކައުންސިލް އިންތިޚާބު ސަރުކާރަށް ކާމިޔާބުކޮށްދިނުމަށް ތައްޔާރަށް ކަމަށެވެ. އަދި ރައީސް މުޢިއްޒު ކުރިއަށް ގެންދަވާ ޤައުމިއްޔަތުގެ ފިކުރަށާއި، ރާއްޖެއަށް ގެންނަވަމުންދާ އިސްލާޙީ ބަދަލުތަކަށް ދާއިރާގެ ހުރިހާ ރައްޔިތުންގެ ފުރިހަމަ އެއްބާރުލުން ލިބެމުންދާކަމަށްވެސް އޭނާ ވިދާޅުވި އެވެ.
ނަމަވެސް، މެންބަރުގެ މި ވާހަކަތަކަށް ރައްޔިތުންގެ ފަރާތުން ލިބެމުންދަނީ ނުރުހުމުގެ ބަސްތަކެވެ. ގިނަ ބަޔަކު ސިފަކުރާ ގޮތުގައި މިއީ ހަޤީޤަތް އޮޅުވާލައިގެން ސަރުކާރަށް ތާއީދު އޮތްކަން ދެއްކުމަށް ކުރި މަސައްކަތެކެވެ. އަދި ރައްޔިތުންގެ މެދުގައި މެންބަރުގެ މި ބަސްދީގަތުން މިހާރު ވަނީ ބޮޑު "ޖޯކަކަށް" ވެފައެވެ.
މިކަމާ ގުޅިގެން އާންމު ފަރާތްތަކުން ބުނަމުން ދަނީ، ކައުންސިލް އިންތިޚާބުގައި ސަރުކާރަށް އެއްބާރުލުން ދޭން ތިބީ ރައްޔިތުންގެ ޓެކްސް ފައިސާ ފެލައިގެން ސަރުކާރުން ބޭކާރު ވަޒީފާތައް ދީފައިވާ މަދު ބަޔަކު ކަމަށެވެ. އަދި ފާއިތުވި ދެ އަހަރެއްހާ ދުވަހުގެ ތެރޭގައި ކުޅުދުއްފުށި ސިޓީގެ ތަރައްޤީ އަށް ސަރުކާރުން އެއްވެސް ކަމެއް ކޮށްދީފައި ނުވާކަމަށް ރައްޔިތުން ދަނީ ތަކުރާރުކޮށް ބުނަމުންނެވެ.
މީގެ އިތުރުން، ކުޅުދުއްފުށި ސިޓީ ކައުންސިލުން ރަށުގެ ތަރައްޤީއަށްޓަކައި އިސްނަގައިގެން ފަށާފައިވާ މުހިންމު މަޝްރޫޢުތަކަށްވެސް ސަރުކާރުން ހުރަސް އަޅަމުންދާއިރު, މިފަދަ ދަނޑިވަޅެއްގައި މެންބަރު ދާއޫދު ރައްޔިތުންގެ ތާއީދު އޮތްކަމަށް ވިދާޅުވުމަކީ އެ ސިޓީގެ ހަޤީޤީ ހާލަތު އޮޅުވާލުން ކަމަށް ގިނަ ބަޔަކު ދެކެއެވެ.
