ތިމާވެށީގެ ނުރައްކާތަކަށް ކުރިމަތިލުމަށާއި، ދެމެހެއްޓެނިވި ތަރައްޤީ އަށް އެހީވުމަށް އޯޕެކް ފަންޑާއި ދިވެހި ސަރުކާރާ ދެމެދު އެއްބަސްވުމެއްގައި ސޮއިކޮށްފި
އެއްބަސްވުމުގައި ސޮއިކުރުމަކީ ދެމެހެއްޓެނިވި ތަރައްޤީއަށާއި މޫސުމީ ބަދަލުތަކުން ކުރާ އަސަރުތައް ކުޑަކުރުމަށް ދެފަރާތުން ގުޅިގެން މަސައްކަތްކުރުމަށް އޮތް ބަދަހި ޢަޒުމް އަލުން ކަށަވަރުވެގެންދިޔަ ކަމެއް ކަމަށް އެ ފަންޑުން ބުނެފައިވޭ.
ދުނިޔޭގެ އެންމެ ބޮޑު އެއް ހޮޕަރ ޑްރެޖަރު ގެނެސްގެން ހއ. ދިއްދޫގެ ބިން ހިއްކުމުގެ މަސައްކަތް ކުރިއަށް ގެންދާ އިރު ކިސަޑު ކޮންޓްރޯލު ކުރުަމަށް އެއްވެސް ފިޔަވަޅެއް އަޅާފައެއް ނުވޭ. | އެމްއޭސީއެލް
އޯޕެކް ފަންޑް ފޯ އިންޓަރނޭޝަނަލް ޑިވެލޮޕްމަންޓާއި ދިވެހި ސަރުކާރާ ދެމެދު 'ކަންޓްރީ ޕާޓްނަރޝިޕް ފްރޭމްވޯކް' އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގެ މައިގަނޑު މަޤްޞަދަކީ ދެފަރާތުގެ ގުޅުން ބަދަހިކުރުމާއެކު، ދެމެހެއްޓެނިވި ތަރައްޤީ އާއި، އުމްރާނީ ވަސީލަތްތައް ކުރިއެރުވުމާއި، މާލީ ދާއިރާގެ ހަމަޖެހުން ޤާއިމުކުރުމުގެ އިތުރުން، މޫސުމަށް އަންނަ ބަދަލުތަކުން ކުރާ އަސަރުތަކަށް ރާއްޖޭގެ ޤާބިލުކަން އިތުރުކުރުމަށް ކަނޑައަޅާފައިވާ ޤައުމީ ލަނޑުދަނޑިތަކަށް އެހީތެރިކަން ފޯރުކޮށްދިނުން ކަމަށް އެ ފަންޑުން ބުނެފައިވެ އެވެ.
އޮސްޓްރިއާގެ ވިއެނާގައި ހުންނަ އޯޕެކް ފަންޑުގެ މައި މަރުކަޒުން ނެރުނު ބަޔާނެއްގައި، އެ ފަންޑުގެ ޑިރެކްޓަރ ޖެނެރަލް ޑރ. ޢަބްދުލްޙަމީދު އަލްޚަލީފާ ވިދާޅުވީ، ދިވެހިރާއްޖެ އަކީ އޯޕެކް ފަންޑުގެ މުހިންމު އަދި ޒަމާންވީ ބައިވެރިއެއް ކަމަށެވެ. އަދި ތަރައްޤީވަމުން އަންނަ ކުދި ޖަޒީރާ ޤައުމުތަކަށް ބޭރުގެ އެކި ގޮންޖެހުންތަކާއި ތިމާވެށީގެ ނުރައްކާތައް ކުރިމަތިވަމުންދާ މި ދަނޑިވަޅުގައި، މި އެއްބަސްވުމުގައި ސޮއިކުރުމަކީ ދެމެހެއްޓެނިވި ތަރައްޤީއަށާއި މޫސުމީ ބަދަލުތަކުން ކުރާ އަސަރުތަކަށް ހޭނުމަށް ދެފަރާތުން ގުޅިގެން މަސައްކަތްކުރުމަށް އޮތް ބަދަހި ޢަޒުމް އަލުން ކަށަވަރުވެގެންދިޔަ ކަމެއް ކަމަށް އޭނާ ފާހަގަކުރެއްވި އެވެ.
މީގެ އިތުރުން، ރައްޔިތުންގެ ދިރިއުޅުމުގެ ފެންވަރު މަތިކުރުމަށް މަގުފަހިވާނެ ފަދަ އިންވެސްޓްމަންޓްތަކަށް އެހީތެރިކަން ފޯރުކޮށްދީ، ދިވެހިރާއްޖެއާއެކު އޮންނަ އެއްބާރުލުން އިތުރަށް ފުޅާކުރުމަކީ އޯޕެކް ފަންޑުގެ ވަރަށް ބޮޑު އުއްމީދެއް ކަމުގައިވެސް ޑރ. އަލްޚަލީފާ ވިދާޅުވި އެވެ.
ތިމާވެށީގެ ނުރައްކާތަކަށް ކުރިމަތިލައި، މޫސުމަށް އަންނަ ބަދަލުތަކަށް ހޭނުމަށާއި ދެމެހެއްޓެނިވި ތަރައްގީ އަށް އެހީވުމަށް އޯޕެކް ފަންޑުން ނިންމި އިރު ރައީސް މުހައްމަދު މުއިއްޒުގެ ސަރުކާރުން ރާއްޖޭގައި ހިންގާ މަޝްރޫއުތައް ވެފައިވަނީ ތިމާވެއްޓަށް އެއްވެސް ބެލުމެއް ނެތި ހިންގާ މަޝްރޫއުތަކެއްގެ ގޮތުގައެވެ. އެ ގޮތުން އުތުރުތިލަފަޅާއި ރާއްޖޭގެ އެކި ކަންކޮޅުތަކުގައި ހިންގާ ބިން ހިއްކުމުގެ މަޝްރޫއުތައް ކުރިއަށް ގެންދަމުން ދަނީ އެއްވެސް ވަރަކަށް ތިމާވެއްޓަށް ބެލުމެއް ނެތި އަދި އެންމެ ކުޑަ މިނުން ކިސަޑު ކޮންޓްރޯލު ކުރުމަށް ފިޔަވަޅެއް އެޅުމެއްނެތި ކަން ވެސް ފާހަގަ ކުރެވެއެވެ. އޭގެ ނަތީޖާ އެއްގެ ގޮތުން އިހުތިިޖާޖު ކޮށް ތިމާވެއްޓާ ބެހޭ މިނިސްޓްރީ އަށް ޝަކުވާތައް ހުށަހެޅި ނަމަވެސް އެކަމަށް އެއްވެސް ސަމާލު ކަމެއް ސަރުކާރުން ދީފައި ނުވާ ކަން ފާހަގަ ކުރެވެއެވެ. މީގެ އިތުރުން ހުޅުމާލެ ފޭސް 3 ހިއްކުމުގައި އެ ސަރަހައްދަށް ކުނި އަޅައިގެން ބިން ހިއްކި މައްސަލަ ފެން މަތިވުމުން ވެސް ތިމާވެއްޓާ ބެހޭ މިނިސްޓްރީން އެއްވެސް އެއްޗެއް ބުނެފަ އެއް ނުވެ އެވެ. ދެމެހެއްޓެނިވި ތަރައްގީގެ އެންމެ މުހިންމު އެއް އަސާސް ކަމުގައިވާ ތިމާވެށި ހިމާޔަތް ކުރުން ހާސިލު ކުރުމަށް ރާއްޖޭގައި ހަދާފައިވާ ހަރުދަނާ ގަވައިދުތައްވެސް ސަރުކާރުން ވަނީ ބަދަލު ކޮށް ތިމާވެއްޓަށް ބެލުމެއް ނެތި ކަންކަން ކުރެވޭނެ މަގު ތަނަވަސް ކޮށްދީފަ އެވެ.
