ވެލިދޫ ޖޫނިއަރ ކޮލެޖުގެ މަސައްކަތް ނުނިމި ދިގުދެމިގެންދާ ކޮންމެ ދުވަހަކީ، މަތީ ތައުލީމު ހާސިލް ކުރުމަށް ރަށުން ބޭރަށް ދާން މަޖުބޫރުވާ ކުދިންނަށް ލިބޭ ވަރަށް ބޮޑު ދެރައެއް: ވެލިދޫ ކައުންސިލްގެ ނައިބު ރައީސް
ވެލިދޫގައި ތަރައްގީކުރަން ފެށި ޖޫނިއަރ ކޮލެޖުގެ މަސައްކަތް 270 ދުވަހުގެ ތެރޭގައި ނިންމަން ހަވާލުކުރި ނަމަވެސް އެ މުއްދަތު ފާއިތުވެގެން އެތައް ދުވަހެއް ވެފައިވާއިރު މަސައްކަތް ނުނިމި މިހާރު ވަނީ މަސައްކަތް އެއްކޮށް ހުއްޓިފަ. ކޮލެޖުގެ މަސައްކަތާ ގުޅޭގޮތުން ސަރުކާރުން 2024 ވަނަ އަހަރު ބުނީ، އެ ކޮލެޖުގެ މަސައްކަތް 2025 ވަނަ އަހަރު ނިންމާ ހަމަ އެ އަހަރު ކިޔަވަދޭން ވެސް ފަށާނެ ކަމަށް.
ނ. ވެލިދޫގައި އިމާރާތް ކުރަން ފަށާފައިވާ ޖޫނިއަރ ކޮލެޖް | އެމްޓީސީސީ
އެމްޑީޕީ ސަރުކާރުން ނ. ވެލިދޫ ގައި ތަރައްގީ ކުރަން ފެށި ޖޫނިއަރ ކޮލެޖުގެ މަސައްކަތް ނުނިމި ހުއްޓިފައި އޮތުމަކީ އެރަށުން ގްރޭޑް 10 ނިންމާފައި މަތީ ތައުލީމު ހާސިލް ކުރުމަށް، ރަށުން ބޭރަށް ދާން މަޖުބޫރުވާ ދަރިވަރުންނަށް ލިބޭ ވަރަށް ބޮޑު ދެރައެއް ކަމަށް ވެލިދޫ ކައުންސިލްގެ ނައިބު ރައީސް ޖީހާން މުހައްމަދު ވިދާޅުވެއްޖެ އެވެ.
ވެލިދޫ ޖޫނިއާ ކޮލެޖުގެ މަސައްކަތާ ގުޅޭ ގޮތުން ރާއްޖެ އެމްވީ އަށް މައުލޫމާތު ދެއްވަމުން ޖީހާން ވިދާޅުވީ މި ކޮލެޖަކީ އެމްޑީޕީ ސަރުކާރުން ފެށި ޕްރޮޖެކްޓެއް ކަމަށާއި މިހާރުގެ ސަރުކާރު ވެރިކަމާ ހަވާލުވުމަށް ފަހު ވެސް އެމްޓީސީސީ އިން މަސައްކަތް ކުރިޔަށް ގެންގޮސްފައިވާ ކަމަށެވެ. 270 ދުވަހުގެ ތެރޭގައި ނިންމަން ހަވާލުކޮށްފައިވާ މި ކޮލެޖުގެ މަސައްކަތް، މިހާރު އޭގެ ފަހުން އެތައް ދުވަހެއް ފާއިތުވެގެން ގޮސްފައިވާއިރު އަދިވެސް މަސައްކަތް ނުނިމޭ ކަމަށް އޭނާ ވިދާޅުވި އެވެ.
ކޮންމެ އަހަރަކު ވެސް ވެލިދޫ އިން އޯލެވެލް ހަދާ ގިނަ ކުދިން ރަށުން ބޭރަށް ކިޔަވަން ދާ ކަމަށާއި، މި ކޮލެޖަކީ ވެލިދޫ އަށް ވަރަށް ބޭނުންތެރި ތަނެން ކަމަށް ޖީހާން ވިދާޅުވި އެވެ. ނަމަވެސް މި ތަން ނުނިމި މަސައްކަތް ދިގުލައިގެންދާ ކޮންމެ ދުވަހަކީ ގްރޭޑް 10 ނިންމާފައި މި ރަށުން ބޭރަށް ދާ ކުދިންނަށް ލިބޭ ވަރަށް ބޮޑު ދެރައެއް ކަމަށް އޭނާ ވިދާޅުވި އެވެ.
270 ދުވަސް ތެރޭގަ ނިންމަން ހަވާލުކޮސްފައިވާ މަސައްކަތެއް، މިހާރު އޭގެ ފަހުން އެތަށް ދުވަހެއް ފާއިތުވެގެން ދާއިރު އަދިވެސް މަސައްކަތް ނުނިމޭ. ކޮންމެ އަހަރަކު ވެސް މިރަށުގަ އޯލެވެލް ހަދާ ގިނަ ކުދިން ތަކެއް ރަށުން ބޭރަށް ކިޔަވަން ދަނީ. ހަގީގަތުގަ މިރަށަށް ވަރަށް ބޭނުންތެރި ކަމެއްގެ ގޮތުގަ އަޅުގަނޑުމެންނަށް ފާހަގަވާ ކަމެއް މި ކޮލެޖަކީ. ނަމަވެސް މިތަން ނުނިމި މަސައްކަތް ގިދުލައިގެންދާ ކޮންމެ ދުވަހަކީ ގްރޭޑް 10 ނިންމާފަ މި ރަށުން ބޭރަށް ދާ ކުދިންނަށް ލިބޭ ވަރަަށް ބޮޑު ދެރައެއް.ނ. ވެލިދޫ ކައުންސިލްގެ ނައިބު ރައީސް ޖީހާން މުހައްމަދު
ވެލިދޫގައި ހުންނަ ނ. އަތޮޅު ތައުލީމީ މަރުކަޒަކީ ވެސް ރަށުން ބޭރު ވަރަށް ގިނަ ކުދިން އެ ރަށަށް ބަދަލުވެގެން ތައުލީމު ހާސިލް ކުރަމުންދާ ސްކޫލެއް ކަމުން، މިގޮތަށް ކޮލެޖެއްގެ ހިދުމަތް ދެވެން ފަށައިފިއްޔާ ވަރަށް ގިނަ އަދަދެއްގެ ދަރިވަރުން އެ ރަށަށް އަންނާނެ ކަމަށް ޖީހާން ވިދާޅުވި އެވެ. މި މަސައްކަތް ނުނިމި ހުއްޓިފައި އޮތުމަކީ ވަރަށް ކަންބޮޑުވާ ކަމެއް ކަމަށާއި އެންމެ ކަންބޮޑުވާ ކަމަކީ މިގޮތަށް މި ހުރި ޕްރޮޖެކްޓްތަކާ ބެހޭ ސައްހަ މައުލޫމާތު ސަރުކާރުގެ ފަރާތުން ކައުންސިލާ ހިއްސާ ނުކުރުން ކަމަށް އޭނާ ވިދާޅުވި އެވެ.
މި ޖޫނިއަރ ކޮލެޖުގެ މަސައްކަތް ނިންމުމަށް ކައުންސިލްގެ ފަރާތުން ރައީސް މުއިއްޒުގެ ސަރުކާރަށް ދޭންޖެހޭ ހުރިހާ އެއްބާރުލުމެއް ދެމުން ދާ ކަމަށް ޖީހާން ވިދާޅުވި އެވެ. މި ކޮލެޖުގެ މަސައްކަތް ހުއްޓިފަ ވަނީ ކައުންސިލުން ހުރަސް އަޅައިގެން، ކައުންސިލުން ބިން ނުދީގެން ނޫން ކަމަށް އޭނާ ފާހަގަކުރެއްވި އެވެ.
ވެލިދޫ ޖޫނިއަރ ކޮލެޖްގައި ސްމާޓް ކްލާސްރޫމްތަކާއި އައިސީޓީ ލެބޯޓްރީއަކާއި ލައިބްރަރީ އެއްވެސް ހުންނާނެ ކަމަށް ސަރުކާރުން ބުނެފައިވެ އެވެ. އަދި ވޮކޭޝަނަލް ޕްރޮގްރާމްތައް ހިންގުމަށް ޚާއްސަ މަލްޓިޕަރޕަސް ވޯކްޝޮޕްތައް ތަރައްގީކުރުމަށްވަނީ ހަމަޖެހިފަ އެވެ.
ވެލިދޫގައި ޖޫނިއަރ ކޮލެޖް ތަރައްގީ ކުރުމަށް އެމްޓީސީސީ އާއި ހަވާލުކުރައްވާފައިވަނީ 9 މަސްދުވަހުގެ ތެރޭގައި ނިންމާގޮތަށް 11.91 މިލިއަން ރުފިޔާ އަށެވެ. ވެލިދޫ ޖޫނިއާ ކޮލެޖާއި ގުޅޭ ގޮތުން މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާއި ބެހޭ ވުޒާރާ އިން 2024 ވަނަ އަހަރުގެ އޮކްޓޯބަރު މަހު ވިދާޅުވީ، އެ ކޮލެޖުގެ މަސައްކަތް 2025 ވަނަ އަހަރު ނިންމާ ކިޔަވަދޭން ވެސް ފަށާނެ ކަމަށެވެ.
ނަމަވެސް 2025 ވަނަ އަހަރު ނިމިނު އިރު ކޮލެޖުގެ މަސައްކަތް ނުނިމި، މިހާރު ވަނީ މަސައްކަތް އެއްކޮށް ހުއްޓިފަ އެވެ. ރައީސް މުއިއްޒުގެ ވެރިކަމުގެ ފުރަތަމަ ދެ އަހަރު ފާއިތުވެގެން ގޮސްފައިވާއިރު، ވެލިދޫގައި ތަރައްގީގެ އެއްވެސް މަޝްރޫޢެއް އެކަށީގެންވާ ގޮތަށް ނުހިނގާކަން އެރަށު ރައްޔިތުން ބުނެ އެވެ. ނިމިދިޔަ އެމްޑީޕީ ސަރުކާރުން އެރަށުގައި ފަށާފައިވާ މަޝްރޫޢުތައް ވެސް މިހާރު މަޑުޖެހިފައިވާކަމަށް ރައްޔިތުން ވަނީ ފާހަގަކޮށްފަ އެވެ.
