އެމެރިކާގެ މިނިއަޕޮލިސް ސިޓީގައި 'އައިސް' އެޖެންޓަކު މީހެއްގެ ގަޔަށް ބަޑިޖަހައި ޒަޚަމްކޮށްލައިފި

އިމިގްރޭޝަން އެންޑް ކަސްޓަމްސް އެންފޯސްމަންޓް (އައިސް) ގެ އޮފިސަރަކު އެމެރިކާގެ މިނިއަޕޮލިސް ސިޓީގައި މީހެއްގެ ގަޔަށް ބަޑިޖަހައި ޒަޚަމްކޮށްލައިފި އެވެ. މިއީ މިދިޔަ ހަފުތާގައި ވެސް 'އައިސް' އެޖެންޓަކު ބަޑިޖަހައި އަންހެނަކު މަރާލި ސިޓީ އެވެ.

ޑިޕާޓްމަންޓް އޮފް ހޯމްލޭންޑް ސެކިއުރިޓީ (ޑީ.އެޗް.އެސް) އިން ނެރުނު ބަޔާނެއްގައި ބުނެފައި ވަނީ، ފެޑަރަލް އޮފިސަރުން އެމީހާގެ ފަހަތުން ކާރުގައި ދިޔައީ، އޭނާ އަކީ ވެނެޒުއޭލާ އިން އެމެރިކާ އަށް ގަވާއިދާ ޚިލާފަށް އެތެރެވެފައިވާ މީހަކަށް ވާތީ ކަމަށެވެ.

މިނިއަޕޮލިސް ސިޓީގެ އިދާރާތަކުން ކަށަވަރުކޮށްދީފައިވާ ގޮތުގައި، ބަޑިޖެހުމުގެ ސަބަބުން ޒަޚަމްވި މީހާއަށް ހޮސްޕިޓަލުގައި ފަރުވާދެމުންދާ އިރު، އޭނާގެ ފުރާނަ އަށް ނުރައްކަލެއް ނެތެވެ. މީގެ އިތުރުން، އެ ހާދިސާ ގައި ލިބުނު އަނިޔާތަކަށް 'އައިސް' އޮފިސަރަކު ވެސް ހޮސްޕިޓަލަށް ގެންގޮސް ފަރުވާދީފައިވާ ކަމަށް ޑީ.އެޗް.އެސް އިން ބުނެ އެވެ.

މިނިއަޕޮލިސް ސިޓީގެ އޮފިޝަލުން 'އެކްސް' ގައި ބުނެފައި ވަނީ، ރައްޔިތުންގެ މެދުގައި ނުރުހުމާއި ރުޅިވެރިކަން އޮތްކަން ދަންނަ ކަމަށާއި، ނަމަވެސް ހުރިހާ ފަރާތްތަކުން ވެސް ކެތްތެރިކަން އިސްކުރުމަށް އެދޭ ކަމަށެވެ. އަދި 'އައިސް' އިން ވަގުތުން އެ ސިޓީ އާއި ސްޓޭޓުން ބޭރުވުމަށް ވެސް ވަނީ ގޮވާލާފައެވެ.

ޑީ.އެޗް.އެސް އިން ބުނި ގޮތުގައި، އެމީހާ ކާރުން ފޭބުމަށް ފަހު އޮފިސަރާ ދެމެދު ކުރިމަތިލުމެއް ހިނގި އެވެ. އެ ވަގުތު ކައިރީގައި ހުރި އިމާރާތަކުން އިތުރު ދެމީހަކު ނުކުމެ އޮފިސަރަށް "ހަމަލާދިން" ކަމަށް ތުހުމަތުކޮށްފައިވެ އެވެ. ތިން މީހަކު ވެގެން އޮފިސަރު ވަށާލައި ހަމަލާދޭން ފެށުމުން، އަމިއްލަ ނަފްސާއި ފުރާނައިގެ ދިފާއުގައި އޮފިސަރު ބަޑިޖެހީ ކަމަށް ބަޔާނުގައިވެ އެވެ. އަދި ހަމަލާދިން ދެމީހުން މިހާރު ތިބީ ފުލުހުންގެ ބެލުމުގެ ދަށުގަ އެވެ.

މިނިއަޕޮލިސްގެ ޕޮލިސް ޗީފް ބްރަޔަން އޯހާރާ ވިދާޅުވި ގޮތުގައި، އެފް.ބީ.އައި އިން ދަނީ މި ހާދިސާ ތަހުގީގު ކުރަމުންނެވެ.

މި ހާދިސާއާ ގުޅިގެން މިނިއަޕޮލިސްގެ މޭޔަރު ޖެކޮބް ފްރޭ ވަނީ މައި ސަރުކާރުގެ އޮފިސަރުން މުޅި ސްޓޭޓުގައި ހަމަނުޖެހުން އުފައްދަމުންދާ ކަމަށް ތުހުމަތު ކުރައްވާފަ އެވެ.

ބަޑިޖެހި ޚަބަރު ފެތުރުމާ އެކު، މިންސޯޓާ ސްޓޭޓްގެ އެންމެ ބޮޑު ސިޓީ ކަމަށްވާ މިނިއަޕޮލިސް ގައި 'އައިސް' އިން ހިންގާ އޮޕަރޭޝަންތަކާ ދެކޮޅަށް ގިނަ ބަޔަކު އެއްވެ މުޒާހަރާ ކުރި އެވެ. ފާއިތުވި ހަފުތާތަކުގައި މިންސޯޓާއަށް 3،000 އެއްހާ 'އައިސް' އޮފިސަރުން ވަނީ ފޮނުވާފަ އެވެ.

މިދިޔަ ހަފުތާގައި އުމުރުން 37 އަހަރުގެ ރެނޭ ނިކޯލް ގުޑް، 'އައިސް' އެޖެންޓެއްގެ އަތުން މަރުވުމާ ގުޅިގެން ވެސް އެ ސިޓީގައި ވަނީ މުޒާހަރާތައް ބާއްވާފަ އެވެ. ފެޑަރަލް އޮފިޝަލުން ބުނާ ގޮތުގައި އޭނާ މަސައްކަތް ކުރީ ކާރުން އޮފިސަރުންގެ ގައިގައި ޖެއްސުމަށެވެ. ނަމަވެސް މޭޔަރު ފްރޭ ވިދާޅުވީ އޮފިސަރު އަމަލުކުރީ ވަރަށް ޒިންމާދާރުކަން ކުޑަ ގޮތަކަށް ކަމަށެވެ.

މި ހާދިސާއާ ގުޅިގެން އެމެރިކާގެ ޑެޕިއުޓީ އެޓާނީ ޖެނެރަލް ޓޮޑް ބްލޭންޗް 'އެކްސް' ގައި ވިދާޅުވީ، މިންސޯޓާ ގައި ހިނގަމުންދާ ހަމަނުޖެހުންތަކަކީ ނާގާބިލު ގަވަރުނަރަކާއި، ގާނޫނު ތަންފީޒުކުރާ ފަރާތްތަކާ ދެކޮޅަށް އަނިޔާވެރިވުމަށް ހިތްވަރުދޭ ދަށް ފެންވަރުގެ މޭޔަރެއްގެ ސަބަބުން ކުރިމަތިވެފައިވާ ކަންތައްތަކެއް ކަމަށެވެ. 

މިންސޯޓާގެ ގަވަރުނަރު ޓިމް ވޯލްޒް ވަނީ ސޯޝަލް މީޑިއާ ގައި ވީޑިއޯ އެއް އާންމުކުރައްވައި، 'އައިސް' އޮފިސަރުން އެ ސްޓޭޓުގައި ހިންގާ "އިސްތިއުމާރީ" އަމަލުތައް ހުއްޓާލުމަށް ޓްރަމްޕަށް ގޮވާލައްވާފަ އެވެ. "މިކަމާ މެދު އޮތް ރުޅިވެރިކަން ހާމަކޮށްދޭން 'ރުޅި' އެއީ އެންމެ އެކަށީގެންވާ ލަފްޒެއް ނޫން،" ވޯލްޒް ވިދާޅުވި އެވެ.