ހަ ޕްރޮސެކިޔުޓަރަކު އިސްތިއުފާ ދެއްވައިފި !
އެމެރިކާގެ އިމިގްރޭޝަން އެންޑް ކަސްޓަމްސް އެންފޯސްމަންޓް (ICE) ގެ އޭޖެންޓަކު ދިން ބަޑީގެ ހަމަލާއެއްގައި މަރުވި އަންހެން މީހާ އާއި ދެކޮޅަށް ޖިނާއީ ތަޙުޤީޤެއް ހިންގުމަށް ޖަސްޓިސް ޑިޕާރޓްމަންޓުގެ އިސްވެރިން އެންގުމާ ގުޅިގެންނާ އަދި ހަމައެއާއެކު، ބަޑިޖެހި އޭޖެންޓުގެ މައްސަލަ ބެލުމަށް ޖަސްޓިސް ޑިޕާޓްމަންޓުން ފަސްޖެހެމުންދާތީ އެކަމާ ނުރުހުން ފާޅުކުރުމުގެ ގޮތުން އެމެރިކާގެ މިނެސޯޓާ ސްޓޭޓްގެ އިސް ހަ ޕްރޮސެކިޔުޓަރަކު 13 ޖެނުއަރީ ވީ ޢަނޮގާރަ ދުވަހު އިސްތިއުފާ ދެއްވައިފިއެވެ.
ޖޯސެފް އެޗް. ތޮމްސަން -އެމެރިކާގެ އެޓަރނީ އޮފީސް ގެ ފެޑަރަލް ޕްރޮސެކިޔުޓަރ | ނިއު ޔޯކް ޓައިމްސް
އެމެރިކާގެ އިމިގްރޭޝަން އެންޑް ކަސްޓަމްސް އެންފޯސްމަންޓް (ICE) ގެ އޭޖެންޓަކު ދިން ބަޑީގެ ހަމަލާއެއްގައި މަރުވި އަންހެން މީހާ އާއި ދެކޮޅަށް ޖިނާއީ ތަޙުޤީޤެއް ހިންގުމަށް ޖަސްޓިސް ޑިޕާރޓްމަންޓުގެ އިސްވެރިން އެންގުމާ ގުޅިގެން، އެމެރިކާގެ މިނެސޯޓާ ސްޓޭޓްގެ އިސް ހަ ޕްރޮސެކިޔުޓަރަކު މިއަދު އިސްތިއުފާ ދެއްވައިފިއެވެ.
މިދިޔަ ހަފުތާގައި މިނިއަޕޮލިސްގައި ހިނގި މި ހާދިސާގައި މަރުވެފައިވަނީ އުމުރުން 37 އަހަރުގެ ރެނޭ ނިކޯލް ގުޑް އެވެ. އޭނާ މަރުވީ އައި.ސީ.އީ އޭޖެންޓަކު އޭނާ ދުއްވަން އިން ކާރަށް ބަޑިޖެހުމުގެ ސަބަބުންނެވެ.
ނިއު ޔޯކް ޓައިމްސް އިން ރިޕޯޓްކުރާ ގޮތުގައި، އިސްތިއުފާ ދެއްވި ބޭފުޅުންގެ ތެރޭގައި މިނެސޯޓާގެ ޔޫ.އެސް އެޓަރނީ އޮފީހުގެ ދެވަނައަށް އެންމެ އިސްވެރިޔާ ޖޯސެފް އެޗް. ތޯމްސަން ހިމެނިވަޑައިގަންނަވައެވެ. ތޯމްސަން އަކީ އެ ސްޓޭޓްގައި ހިންގާ ބޮޑެތި މަކަރާއި ހީލަތުގެ މައްސަލަތައް ބެއްލެވުމުގައި އިސްކޮށް އުޅުއްވާ، ގިނަ ދުވަސްވީ ތަޖުރިބާކާރު ޕްރޮސެކިޔުޓަރެކެވެ.
މި ބޭފުޅުން އިސްތިއުފާ ދެއްވަން ނިންމެވީ، މަރުވި ރެނޭ ގުޑްގެ އަނބިމީހާ ބެކާ ގުޑް އާއި އެކްޓިވިސްޓް ގްރޫޕްތަކާ އޮތް ގުޅުން ތަޙުޤީޤުކުރުމަށް ވޮޝިންގޓަންގެ އިސް އޮފިޝަލުން ބާރުއަޅުއްވަން ފެއްޓެވުމުންނެވެ. އަދި ހަމައެއާއެކު، ބަޑިޖެހި އޭޖެންޓުގެ މައްސަލަ ބެލުމަށް ޖަސްޓިސް ޑިޕާޓްމަންޓުން ފަސްޖެހެމުންދާތީ އެކަމާ ނުރުހުން ފާޅުކުރުމުގެ ގޮތުންނެވެ.
މީގެ އިތުރުން، މި ހާދިސާގެ ތަޙުޤީޤުގައި ސްޓޭޓްގެ ފުލުހުންނާއި ތަޙުޤީޤީ އިދާރާތައް ބައިވެރިކުރުމަށް އެފް.ބީ.އައި އިން އިންކާރުކުރުމަކީ ވެސް ޕްރޮސެކިޔުޓަރުންގެ ކަންބޮޑުވުން އޮތް ކަމެކެވެ.
މި އިސްތިއުފާތަކާ ގުޅިގެން ވައިޓް ހައުސް އިންނާއި ޖަސްޓިސް ޑިޕާޓްމަންޓުގެ އިސްވެރިން ބުނަމުންދަނީ، މިއީ ކުރިންވެސް ރޭވިފައިވާ ރިޓަޔަރމަންޓްތަކެއް ކަމަށެވެ. ނަމަވެސް، މަސްރަޙު ދިރާސާކުރާ ފަރާތްތަކުން ބުނާ ގޮތުގައި މިއީ ޓްރަމްޕް ސަރުކާރުގެ ދެވަނަ ދައުރުގައި ޖަސްޓިސް ޑިޕާޓްމަންޓުގެ މިނިވަންކަމަށް އަސަރު ކުރަމުންދާކަމުގެ ބޮޑު ހެއްކެކެވެ.
މި ހާދިސާއާ ގުޅިގެން މިނިއަޕޮލިސްގެ މަގުތަކުގައި އާންމުން ދަނީ މުޒާހަރާ ކުރަމުންނެވެ. އެމީހުން ބުނަމުންދަނީ ސަރުކާރުން މަސައްކަތް ކުރަނީ އަނިޔާ ލިބުނު ފަރާތް ކުށްވެރިކޮށް، ބަޑިޖެހި އޭޖެންޓް ސަލާމަތްކުރުމަށް ކަމަށެވެ.
