ތިން ވަނަ ޑިވިޝަންގެ ފުޓުބޯޅަ މުބާރާތުގައި ބައިވެރިވުމަށް ހުޅުވާލައިފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ތިން ވަނަ ޑިވިޝަން ފުޓުބޯޅަ މުބާރާތުގައި ބައިވެރިވުމުގެ ފުރުސަތު ހުޅުވާލައިފި އެވެ.

އެގޮތުން ގެޒެޓުގައި އެފްއޭއެމް އިން ކޮށްފައިވާ އިއުލާނެއްގައި ބުނެފައި ވަނީ، މި ހިނގާ 2026 ވަނަ އަހަރުގެ އޭޕްރީލް މަހުގެ ތެރޭގައި ތިން ވަނަ ޑިވިޝަންގެ ފުޓުބޯޅަ މުބާރާތް އޮންނާނެ ކަމަށެވެ. އެގޮތުން ކޮމިޝަނާ އޮފް ސްޕޯޓްސް ގައި ރަޖިސްޓްރީ ކޮށްފައިވާ ކުލަބުތަކާއި، ޖަމިއްޔާ ޖަމާއަތް ތަކުން މުބާރާތުގައި ބައިވެރިވުމުގެ ފޯމު ހުށަހެޅުމަށް ވަނީ ހުޅުވާލައިފަ އެވެ.

މުބާރާތުގައި ބައިވެރިވުމުގެ ފޯމު ހުށަހެޅުމުގެ ސުން ގަޑި އަކީ މި ހިނގާ ޖަނަވަރީ މަހުގެ 22 ވާ ބުރާސްފަތި ދުވަހުގެ 15:00 ގެ ކުރިންނެވެ. މުބާރާތުގައި ބައިވެރިވާ ޓީމު ތަކުން ފޯމު ފުރިހަމަ ކުރުމަށް ފަހު، އެފްއޭއެމްގެ league@famaldives.com އަށް މެއިލް ކުރުމަށް ވެސް އެ އެސޯސިއޭޝަން އިން ވަނީ އެދިފަ އެވެ. 

މީގެ އިތުރުން އެ އިއުލާނުގައި އެފްއޭއެމް އިން ބުނެފައި ވަނީ،  މުބާރާތުގައި ބައިވެރިވާ ޓީމު ތަކުގެ އަދަދަށް ބެލުމަށް ފަހު، މުބާރާތް ކުޅޭނެ ގޮތާއި އަދި ފޯމެޓު ޓީމުތަކާ ހިއްސާ ކުރާނެ ކަމަށެވެ. 

މިއީ ގާތް ގަނޑަކަށް ތިން އަހަރު ދުވަހުގެ މެދު ކެނޑުމަކަށް ފަހު އެފްއޭއެމް އިން ތިން ވަނަ ޑިވިޝަންގެ ފުޓުބޯޅަ މުބާރާތް ބާއްވާ ފަހަރެވެ. އެންމެ ފަހުން އެފްއޭއެމް އިން ތިން ވަނަ ޑިވިޝަންގެ ފުޓުބޯޅަ މުބާާރާތް ބާއްވާފައި ވަނީ 2022 ވަނަ އަހަރު އެވެ. އެ ފަހަރުގެ ދެ ވަނަ ޑިވިޝަންގެ ފުޓުބޯޅަ މުބާރާތް ކާމިޔާބު ކުރީ ލެގޫންސް ސްޕޯޓްސް ކުލަބު އިންނެވެ. 

އެފްއޭއެމް އިން ތިން ވަނަ ޑިވިޝަންގައި ބައިވެރިވުމަށް ހުޅުވާލާފައިވާއިރު، އެފްއޭއެމް އިން ވަނީ ގިނަ ދުވަސް ތަކެއް ވަންދެން ވަޅު ޖެހިފައި އޮތް ދިވެހި ފުޓުބޯޅަ އަލުން ދިރުވުމަށް ގިނަ މަސައްކަތް ތަކެއް ކުރަމުންނެވެ. އެގޮތުން ދިވެހި ޕްރިމިއާ ލީގުގެ ކުޅުން ފެށިފައިވާއިރު،. އެފްއޭއެމް އިން ވަނީ އަންހެން ލީގު ވެސް ބާއްވައިފަ އެވެ. އޭގެ އިތުރުން ޒުވާން އުމުރުފުރާގެ މުބާރާތްތައް ކުރިއަށް ގެންދިޔުމަށް ވެސް އެފްއޭއެމް އިން އަންނަނީ މަސައްކަތް ކުރަމުންނެވެ.