އއ. ބޮޑުފޮޅުދޫއަށް ކުރީގެ ރައީސް އިބްރާހިމް މުހައްމަދު ޞާލިހް ކުރައްވަމުން ގެންދަވާ ދަތުރުފުޅުގެ ތެރެއިން، ބޮޑުފޮޅުދޫގައި އެމްޑީޕީގެ ހަރަކާތްތަކުގައި އިސްކޮށް އުޅުއްވާ ބޭފުޅުންނާ ބައްދަލު ކުރައްވައިފިއެވެ.

ރައީސް ޞާލިހް، ބޮޑޫފޮޅުދޫ އެމްޑީޕީގެ އިސް މެމްބަރުންނާއެކު ބޭއްވި މި ބައްދަލުވުމުގައި ގިނަ މަޝްވަރާތަކެއް ކޮށްފައިވެއެެވެ. އެގޮތުން ލޯކަލް ކައުންސިލް އިންތިހާބަށް ތައްޔާރުވުން އަދި ބޮޑުފޮޅޫދޫގައި އެމްޑީޕީގެ ހަރަކާތްތަށް އިތުރަށް ފުޅާކުރުމުގެ މަޝްވަރާތައް ކުރިޔަށް ގެންގޮސްފައިވެއެެވެ.

މީގެ އިތުރުން ބޮޑުފޮޅުދޫގެ އެމްޑީޕީ މެމްބަރުން ވަނީ ރައީސް ސާލިހުގެ ދައުރުގައި އެރަށަށް ކޮށްދީފައިވާ ކަންކަމަށް ޝުކުރު އަދާކުރައްވާފައެެވެ. އަދި ރައީސް ޞާލިހުގެ ވެރިކަމުގައި އެރަށުގައި ފަށާފައިވާ މުހިންމު މަޝްރޫއުތައް، ރައީސް މުއިއްޒުގެ ސަރުކާރުން ކުރިޔަށް ނުގެންދާތީ އެކަން ހިތާމަޔާއެކު ފާހަގަ ކުރަށްވާފައިވެއެވެ.

ރައީސް ޞާލިހުގެ މި ދަތުރުފުޅަކީ ބޮޑުފުޅަދޫގެ އެމްޑީޕީ މެމްބަރުންގެ ޚާއްސަ ދައުވަތަކަށް ކުރައްވާ ދަތުރުފުޅެކެވެ. ރައީސް ސާލިހް ބުރާސްފަތި ދުވަހު ހަވީރު ބޮޑުފޮޅުދޫ އަށް ވަޑައިގެންނެވި އިރު އެމަނިކުފާނަށް ވަނީ އެރަށުން ހޫނު މަރުހަބާއެއް ދަންނަވާފައެވެ.

މިދަތުރުފުޅުގައި ބޮޑުފޮޅުދޫ ކައުންސިލުން ވަނީ ޚާއްސަ ހަފްލާއެއް ބާއްވާ، އއ. ބޮޑުފޮޅުދޫ ކައުންސިލުން އެރުވޭ ޚިދުމަތުގެ އެންމެ މަތީ ޝަރަފުގެ އައްޑަނަ ރައީސް ޞާލިހަށް އަރުވާފައެވެ. މި އައްޑަނަ ރައީސް ޞާލިހަށް އެރުވީ އެމަނިކުފާނުގެ ވެރިކަމުގައި ބޮޑުފޮޅުދޫގެ ތަރައްޤީއަށް ކުރިމަގަށްޓަކައި ކޮށްދެއްވާފައިވާ އަގުހުރި މަސައްކަތުގެ އަގުވަޒަން ކުރުމުގެ ގޮތުން ކަމަށް ކައުންސިލު އިން ވަނީ ބުނެފަ އެވެ.

މީގެ އިތުރުން ރައީސް ސާލިހުގެ މި ދަތުރުފުޅުގައި ވަނީ ބޮޑުފޮޅުދޫ ރައްޔިތުންނާ ބައްދަލު ކުރުމަށް އެރަށު ބަނދަރު ސަރަހައްދުގައި ބޭއްވި ޖަލްސާގަވެސް ބައިވެރިވެވަޑައިގެންފައެވެ. އަދި ރައީސް ޞާލިހް ވަނީ އެ ރަށު އިސްރަށްވެހިންނާއި ޚާއްސަ އެހީ އާއި ރައްކާތެރިކަމަށް ބޭނުންވާ ފަރާތްތަކަށް ޒިޔާރަތް ކުރަށްވާފައެވެ.

ރައީސް ޞާލިހުގެ ސަރުކާރުގައި ވަނީ ބޮޑުފުޅަދޫގައި ތަރައްގީގެ ގިނަ މަޝްރޫއު ތަކެއް ކުރިޔަށް ގެންގޮސްފައެެވެ. މިގޮތުން ބޮޑުފުޅަދޫގެ ފެނާއި ނަރުދަމާ ނިޒާމުގެ މަސައްކަތް ފެއްޓެވުމާއި، 300 މީހުންގެ ޖާގައިގެ މިސްކިތެއް އެޅުމާއި ސިއްހީ މަރުކަޒުގައި ލެބޯޓަރީގެ ހިދުމަތް ގާއިމް ކުރުން ހިމެނެއެވެ.

ބޮޑުފުޅަދޫގައި ރައީސް ޞާލިހުގެ ސަރުކާރުން ކުރެއްވި އެންމެ މުހިންމު ކަމެއްގެ ގޮތުގައު އެރަށު ރައްޔިތުން ފާހަގަކުރާ ކަމަކީ ރަށުގެ ބިން ހިއްކުމެވެ. ބިން ހިއްކުމާއެކު، ތިރީހަކަށް އަހަރަށްފަހު ބޮޑުފުޅަދޫ ރައްޔިތުން އަމިއްލަ ރަށުން ގޯތި ލިބުމަށް އެދި ދެކެމުން އައި ހުވަފެން ވަނީ ހަގީގަތަކަށްވެފައެެވެ.

ބޮޑުފޮޅުދޫގެ ރައްޔިތުން ސިފަކުރާގޮތުގައި، ރައީސް އިބްރާހިމް މުހައްމަދު ޞާލިހަކީ ބޮޑުފޮޅުދޫގެ ތަރައްގީގެ ބާނީއެވެ.