ޓްރަމްޕްގެ ދަޢުވާތަކާ ޚިލާފަށް، އީރާނުގެ މިސައިލް ޚަޒާނާގެ ބޮޑު ބައެއް އަލުން އިއާދަކޮށްފި
15 ނޮވެމްބަރު 2026 | އާދީއްތަ 04:42އީރާނުގެ އަސްކަރީ ގާބިލުކަން ނެތިކޮށްލެވިފައިވާ ކަމަށް އެމެރިކާއިން ބުނި ނަމަވެސް، އެ ޤައުމުގެ މިސައިލް ޚަޒާނާގެ ބޮޑު ބައެއް އަދިވެސް އެބަހުރި ކަމަށް ޖާސޫސީ ރިޕޯޓުތަކުން ދައްކާ. މި ހަމަލާތަކުގެ ސަބަބުން ސަރަހައްދުގައިވާ އެމެރިކާގެ އަސްކަރީ މަރުކަޒުތަކުގެ ނާޒުކުކަން ހާމަވެފައިވާއިރު، އިތުރު އަސްކަރީ ފިޔަވަޅު އެޅުމަށް އިސްރާއީލުން ބާރުއެޅި ނަމަވެސް އެމެރިކާއިން އިސްކަންދެނީ އިގުތިސާދީ ފިއްތުންތައް ކުރިމަތިކުރުމަށް
އީރާނުގެ އަސްކަރިއްޔާއިން ބެލިސްޓިކް މިސައިލެއް ލޯންޗު ކުރަނީ | އަނަދޮލު އޭޖެންސީ
އެމެރިކާއާއި ޔަހޫދީ އިސްރާއީލުން އީރާނުގެ ހަތިޔާރު އުފައްދާ އަދި ރައްކާކުރާ އުމްރާނީ ވަސީލަތްތަކަށް އަމާޒުކޮށް އެތައް މަހެއް ވަންދެން ދިން ހަމަލާތަކާއެކު ވެސް، އީރާނުގެ އަތުގައި އަދިވެސް 1,500 އާއި 2,500 އާ ދެމެދުގެ އަދަދަކަށް މިސައިލް އެބަހުރި ކަމަށް އެމެރިކާގެ ޖާސޫސީ އިދާރާތަކުން އަންދާޒާކޮށްފި އެވެ. މި ކަމުގެ މަޢުލޫމާތު އެންމެ ފުރަތަމަ ރިޕޯޓުކޮށްފައި ވަނީ އެމެރިކާގެ ނޫހެއް ކަމަށްވާ 'ދި ވޯލް ސްޓްރީޓް ޖަރނަލް' އިންނެވެ.
ޖާސޫސީ އިދާރާތަކުގެ މި ހޯދުންތަކަކީ، ތެހެރާނުގެ އަސްކަރީ ގާބިލުކަން ބޮޑުތަނުން ނެތިކޮށްލެވިއްޖެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ކުރައްވާ ދަޢުވާތަކާ ފުށުއަރާ ހޯދުންތަކެކެވެ. ނަމަވެސް، ހަނގުރާމައިގެ ކުރިއާ އަޅައިބަލާއިރު، އީރާނުން މިސައިލްގެ ސްޓޮކް އަލުން ބިނާކުރުމުގެ މަސައްކަތް ކުރިއަށްދަނީ ލަސް ދުވެއްޔެއްގައި ކަމަށް އެ ރިޕޯޓުގައިވެ އެވެ.
ހަމަމިއާއެކު، ސަރަހައްދުގެ އެކި އަމާޒުތަކަށް ހަމަލާ ދިނުމުގެ ގާބިލުކަން އިތުރުކޮށްދޭ ގިނަ އަދަދެއްގެ ޑްރޯނާއި ކުރު ރާސްތާގެ މިސައިލް ވެސް އީރާނުގެ އަތުގައި އަދިވެސް އެބަހުރި ކަމަށް ޖަރނަލްގެ ރިޕޯޓުގައި ބުނެފައިވެ އެވެ.
ސަރަހައްދީ އެހެން އިދާރާތަކުގެ އަންދާޒާތައް ތަފާތު ނަމަވެސް، އީރާނުގެ އަތުގައި 1,500 އަށްވުރެ ގިނަ ބެލިސްޓިކް މިސައިލް އެބަހުރި ކަމަށް ޔަހޫދީ އިސްރާއީލުގެ އަސްކަރީ އޮފިޝަލުން އަންދާޒާކުރާ ކަމަށް އެ ނޫހުން ބުންޏެވެ. މެދުއިރުމަތީގެ ކަންކަމާ ބެހޭ އެމެރިކާގެ ދިފާޢީ ވުޒާރާގެ ކުރީގެ ޑެޕިއުޓީ އެސިސްޓެންޓް ސެކްރެޓަރީ ސިމޯން ލެޑީން ވިދާޅުވީ، އެންމެ ދަށް އަންދާޒާއަށް ބެލި ނަމަވެސް، ހަނގުރާމައިގެ ކުރިން އީރާނުގައި ހުރި މިސައިލްގެ ޚަޒާނާގެ ދެބައިކުޅަ އެއްބަޔަށް ވުރެ ބޮޑު ބައެއް އެ ޤައުމުން އަލުން އިއާދަކޮށްފައިވާ ކަން އެނގޭ ކަމަށެވެ.
މީގެ އިތުރުން، އީރާނުގެ މިސައިލް އަދި ޑްރޯން ހަމަލާތަކުގެ ސަބަބުން، މެދުއިރުމަތީގައި ގާއިމުކޮށްފައިވާ އެމެރިކާގެ އަސްކަރީ މަރުކަޒުތަކާއި، ރާޑަރު ނިޒާމުތަކާއި، ކުރީބައިގައި އިންޒާރުދޭ އުމްރާނީ ވަސީލަތްތަކުގައި ހުރި ބަލިކަށި ކަން ހާމަވަމުންދާ ކަމަށް ވެސް ރިޕޯޓުގައި ފާހަގަކޮށްފައިވެ އެވެ.
އައު ބޮޑު އަސްކަރީ ހަމަލާއެއް ފެށުމުގެ ބަދަލުގައި، ދަތިކުރުމުގެ ފިޔަވަޅުތަކާއި ހިސާރުކުރުމުގެ ސިޔާސަތުތަކުގެ ތެރެއިން ތެހެރާނަށް އިގުތިސާދީ ފިއްތުންތައް ކުރިމަތިކުރުމަށް ވޮޝިންގޓަނުން މިހާތަނަށް އިސްކަންދީފައިވެ އެވެ. އީރާނުން ބަދަލުހިފުމުގެ ގޮތުން ދީފާނެ ހަމަލާތަކެއްގެ ބިރަށް ޓަކައި އަލުން ހަނގުރާމައެއް ނުފެށުމަށް ގަލްފުގެ އެކުވެރި ޤައުމުތަކުން އިންޒާރު ދެމުންދާއިރު، އިތުރު އަސްކަރީ ފިޔަވަޅުތައް އެޅުމަށް ޔަހޫދީ އިސްރާއީލުން ދަނީ ބާރުއަޅަމުން ކަމަށް ޖަރނަލްއިން ބުންޏެވެ.
މަސްދަރު: އަނަދޮލު އޭޖެންސީ
