ވާނުވާގައި ތިބި މީހުންގެ ތެރެއިން އެއް އަހަރަށްވުރެ ގިނަ ދުވަސްވީ ހުރިހާ މައްސަލަތައް މި އަހަރު ނިމޭނެ: ކްރިމިނަލް ކޯޓު
ކްރިމިނަލް ކޯޓުން ބުނީ 2025 ވަނަ އަހަރު ފެށުނު އިރު ޝަރީއަތް ނިމެންދެން ބަންދުކޮށްފައި ހުރީ 272 މީހުން ނަމަވެސް އަހަރު ނިމުނު އިރު ބަންދުގައި ތިބީ 128 މީހުން. ކޯޓުން މަހަކު 175 މައްސަލަ ނިންމާ ބާރުމިނުގައި ހުރުމުން 2026 ވަނަ އަހަރު ނިމޭއިރު އެއް އަހަރަށްވުރެ ގިނަ ދުވަސްވީ ހުރިހާ މައްސަލައެއް ނިމޭނެ.
ހުޅުމާލޭގައި ހުންނަ ކްރިމިނަލް ކޯޓުގެ އެނެކްސް އިމާރާތް | ރާއްޖެ އެމްވީ
ޝަރީއަތް ނިމެންދެން ބަންދުގައި ތިބި މީހުންގެ ތެރެއިން އެއް އަހަރަށްވުރެ ގިނަ ދުވަސްވީ ހުރިހާ މައްސަލަތައް މި އަހަރު ނިމޭނެ ކަމަށް އަންދާޒާކުރެވޭ ކަމަށް ކްރިމިނަލް ކޯޓުން ބުނެފި އެވެ.
2025 ވަނަ އަހަރު ތަފާސް ހިސާބު އާންމު ކުރަމުން ކްރިމިނަލް ކޯޓުން ބުނީ 2025 ވަނަ އަހަރު ފެށުނު އިރު، ޝަރީއަތް ނިމެންދެން ބަންދުކޮށްފައިވާ މީހުންގެ އަދަދަކީ 272 ކަމަށެވެ. އަދި މި މީހުންގެ ތެރެއިން 2025 ވަނަ އަހަރު ނިމުނު އިރު ބަންދުގައި ތިބީ 128 މީހުންނެވެ.
އެ ކޯޓުން ބުނީ 2025 ވަނަ އަހަރު ނިމުނު އިރު ކްރިމިނަލް ކޯޓުގައި ނުނިމި އޮތީ ޖުމްލަ 1735 މައްސަލަ އެވެ. އަދި ކޯޓުގެ ދުވެލި މި ވަގުތު ހުރީ މަހަކު 175 މައްސަލަ ނިންމުމުގެ ބާރުމިނުގައި ކަމުގައިވާތީ، މި ރޭޓުން މަސައްކަތް ކުރިއަށް ދާނަމަ އަހަރު ނިމޭއިރު ދެ ހާހަށްވުރެ ގިނަ މައްސަލަ ނިމޭނެ ކަމަށް ބުނެފައިވެ އެވެ. އަދި މި އަންދާޒާގެ 85 އިންސައްތަ އަށް މަސައްކަތް ކުރެވުނު ކަމުގައިވީނަމަވެސް، 2026 ވަނަ އަހަރު ނިމޭ އިރު އެއް އަހަރަށްވުރެ ގިނަ ދުވަސްވީ ހުރިހާ މައްސަލައެއް ނިމެނޭ ކަމަށް އަދަދުތަކުން އެނގޭ ކަމަށް ކްރިމިނަލް ކޯޓުން ބުނެފައިވެ އެވެ.
ކްރިމިނަލް ކޯޓުން ބުނީ 2026 ވަނަ އަހަރަކީ ކްރިމިނަލް ކޯޓުގެ މަސައްކަތުގެ ދުވެލި، އެ ކޯޓުގެ ތާރީހުގައި ވެސް ނުދެކޭހާ ބާރުމިނުގައި ހުންނާނެ އަހަރެއް ކަމަށް ބެލެވޭ އިރު، މި އަހަރަކީ ބެކްލޮގުގައި ހުރި މައްސަލަތައް ވެސް ނިމެނޭ އަހަރެއް ކަމަށް ބެލެވޭ ކަމަށް ބުނެފައިވެ އެވެ.
މީގެ އިތުރުން ޝަރިއަތް ނިމެންދެން ބަންދުގައި ތިބި މީހުންގެ ތެރެއިން އެއް އަހަރަށްވުރެ ގިނަ ދުވަސްވީ މަައްސަލަތައް މި އަހަރު ނިމެނޭ ކަމަށާއި، އައު އިމާރާތުގެ ސަބަބުން ކޯޓުން މައްސަލަ ނިންމާ ރޭޓަށް އައި ކުރިއެރުމަށް ބަލާއިރު، ކުރެވޭ އުއްމީދީ އަންދާޒާއެއް ކަމަށް ބުނެފައިވެ އެވެ.
އަދި ޝަރީއަތް ނިމެންދެން ބަންދުގައި ތިބި ފަރާތްތަކުގެ މައްސަލަރައް ދިގުލައި ނުނިމި އޮތް އޮތުން 2026 ވަނަ އަހަރުގެ ތެރޭގައި ހައްލުވާނެކަމަށް ބުނެފައިވެ އެވެ. މީގެ އިތުރުން މި އަހަރުގެ ފެށުނު އިރު ބަންދުގައި ތިބި ފަރާތްތަކުގެ ތެރެއިން އެއްވެސް ފަރާތެއް މި އަހަރު ނިމޭ އިރު ބަންދުގައި ނުހުންނާނެ ކަމަަށް ވެސް ކްރިމިނަލް ކޯޓުން ބުނެފައިވެ އެވެ.
މިދިޔަ އަހަރު ކްރިމިނަލް ކޯޓުން ނިންމި މައްސަލަތަކުގެ ތެރޭގައި ޖިނާއީ މައްސަލަތަކާއި މަސްތުވާތަކެތީގެ މައްސަލަތަކާއި ޓްރެފިކް މައްސަލަތައް ހިމެނެ އެވެ. އެގޮތުން ޖިނާއީ މައްސަލަތަކުގެ ތެރެއިން ގިނަ އަދަދަކީ ޖިންސީ ގޯނާގެ މައްސަލަތަކާއި ހަމަލާގެ މައްސަލަތައް ކަމަށް ތަފާސް ހިސާބުތަކުން ދައްކަ އެވެ.
