މި މުޖުތަމައުއިން ދޮގު ފުހެލުމަށް ކުރިއަށް އޮތް ކައުންސިލް އިންތިޚާބު ގައި ރައީސް މުއިއްޒުގެ ހުރިހާ ކެންޑިޑޭޓުންނަށް ނޫނެކޭ ބުނަން ޖެހޭ: ޝަރީފް

މި މުޖުތަމައުއިން ދޮގު ފުހެލުމަށް  އޮތް ކުރިއަށް ލޯކަލް ކައުންސިލް އިންތިޚާބު ގައި ރައީސް ޑރ.މުހައްމަދު މުއިއްޒުގެ ހުރިހާ ކެންޑިޑޭޓުންނަށް ނޫނެކޭ ބުނަން ޖެހޭ ކަމަށް ކެލާ ދާއިރާގެ ކުރީގެ މެންބަރު އިބްރާހިމް ޝަރީފް ވިދާޅުވެއްޖެ އެވެ.

އަންގާރަ ދުވަހުގެ ރޭ ކުރިއަށް ގެންދިޔަ އެމްޑީޕީ ހަރުގެ ޖަލްސާގައި ޝަރީފް ވަނީ ރައީސް މުއިއްޒު ވެރިކަމަށް ވަޑައިގަތުމަށް ހެއްދެވި ދޮގުތަކަށް އިޝާރާތް ކުރައްވައި ވާހަކަ ދައްކަވާފަ އެވެ. މިހާރު ހުރިހާ ރައްޔިތުންނަށް ވެސް އެއީ ދޮގުކަން ހާމަވެފައިވާ ކަމަށާއި، އެދޮގުތަކުގެ މައްޗަށް އިތުރު ދޮގުތައް ހަދައި އަދިވެސް އޮޅުވާލުމަށް މަސައްކަތް ކުރާ ކަމަށް އޭނާ ވިދާޅުވި އެވެ. 

ޝަރީފް ވިދާޅުވީ މިސަރުކާރާއެކު މިހާރު ދޮގު އާއްމުވެފައިވާ ކަމަށާއި، މި ދޮގުތަކުން ސަލާމަތްވެ، މުޖުތަމައުގައި ތެދު އާއްމު ކުރަން ބޭނުންވާ ކަމަށްވާނަމަ ކުރިއަށް އޮތް ލޯކަލް ކައުންސިލް އިންތިޚާބުގައި ސަރުކާރުގެ ޕާޓީ ޕީއެންސީގެ ހުރިހާ ކެންޑިޑޭޓުންނަށް އަދި އަމިއްލަ ގޮތުން ވާދަކުރި ނަމަވެސް ރައީސް މުއިއްޒުގެ ރުހުމާއެކު ނުކުންނަ ހުރިހާ ކެންޑިޑޭޓުންނަށް ރައްޔިތުން ނޫނެކޭ ބުނަން ޖެހޭ ކަމަށެވެ. 

އަޅުގަނޑުމެން ކިޔަމުން ގެންދިޔައިން މަޖިލިސް އިންތިޚާބުގައި ދޮގު ދޮލަނގެއްގެ ވާހަކަ. ދޮގު ތައް މިހާރު ވަނީ ފަޅާއަރާފައި. އެބޭފުޅުންނަށް އޭރު މާ ބޮޑަކަށް ފަހުމެއް ނުވޭ އަޅުގަނޑުމެން މިކިޔާ އެއްޗެއް. ދޮގު ދޮލަނގަކާ ދޮގު ޖާޑިޔާއެއްގެ ވާހަކައެއް ދައްކަމުން ދިޔައިން. އެހެން ނަމަވެސް އެދޮގުތައް މިއަދު މިވަނީ ފަޅާ އަރާފައި. އަދި އެ ދޮގުގެ މައްޗަށް މިހާރު އިތުރު ދޮގުތައް އަރަމުން މިދަނީ. ދެން ވެސް ހަދާނީ ދޮގު. އެހެންވީމަ ދޮގު ސަރުކާރެއް. ދޮގު އަޅުގަނޑުގެ ތެރޭގައި ފުހެލަން ބޭނުންވަންޏާ ތެދުވެރިކަން އަޅުގަނޑުމެންގެ ތެރޭގައި އެއީ އާއްމު އެއްޗަކަށް ހަދަން ބޭނުންވާ ކަމަށްވާނަމަ މިހާރު މިއޮތް ސަރުކާރުގެ ފަރާތުން ކުރިމަތިލާ ކޮންމެ ކެންޑިޑޭޓަކަށް ވެސް ނޫނެކޭ ބުނަން.

ކެލާ ދާއިރާގެ ކުރީގެ މެންބަރު އިބްރާހިމް ޝަރީފް 

މި ސަރުކާރުން ކައުންސިލް ތަކުގެ ބާރު ކަނޑުވާލާފައިވާކަން ފާހަގަ ކުރައްވައި ޝަރީފް ވިދާޅުވީ ކުރީގައި ކައުންސިލްތަކަށް ފައިސާ ލިބުނު އުސޫލުން މިހާރު ފައިސާ ނުލިބޭނެ ކަމަށެވެ. ހަމަހަމަ އުސޫލެއްގެ ތެރެއިން  ހުރިހާ ރަށެއް ތިޔާގިވެ، ރައްޔިތުން ބާރުވެރިވާން ސަރުކާރުން ނޭދޭނެ ކަމަށެވެ. 

ކުރިއަށް އޮތްތަނުގައި ވެސް ކައުންސިލްތަކުގެ ގާބިލްކަން އިތުރުކޮށް ރަށް ކުރިއަށް ގެންދަން ބޭނުންވާ ކަމަށްވާނަމަ އެމްޑީޕީގެ ކެންޑިޑޭޓުންނަށް ވޯޓު ދޭން ޖެހޭ ކަމަށް އޭނާ ވިދާޅުވި އެވެ.