ސީޝެލްސްގެ ސަލާމަތީ ބާރުތަކުން ސްރީލަންކާގެ މަސްބޯޓެއް އަންދާލައި، އޭގައި ތިބި ހަ މަސްވެރިން ހައްޔަރުކުރި މައްސަލަ ހޫނުވެއްޖެ
ބޯޓުގެ ވެރިފަރާތުން ބުނީ ކަނޑުމެދުގައި ބޯޓު އަންދާލައިގެން ނުވާނެ ކަމަށާއި، މީގެ ކުރިން އިންޑިއާ އާއި ރާއްޖޭގެ ކަނޑުގެ ސަރަހައްދުން ވެސް އެމީހުންގެ ބޯޓުފަހަރު ހިފަހައްޓައި މަސްވެރިންނަށް ގާނޫނީ ފިޔަވަޅު އަޅާފައިވާ ކަމަށާއި އެކަމަކު ދުވަހަކު ވެސް ބޯޓެއް މިގޮތަށް އަންދާލާފައެއް ނުވާ ކަމަށް.
ސީޝެލްސްގެ ސަލާމަތީ ބާރުތަކުން ސްރީލަންކާގެ މަސްބޯޓެއް އަންދާލި ކަމަށް ލަންކާގެ މަސްވެރިންގެ ޖަމްއިއްޔާ އަކުން ވަނީ ބުނެފައި | ޑެއިލީ މިރަރ
ސީޝެލްސްގެ ސަލާމަތީ ބާރުތަކުން ސްރީލަންކާގެ މަސްބޯޓެއް އަންދާލައި، އޭގައި ތިބި ހަ މަސްވެރިން ހައްޔަރުކުރި މައްސަލަ ހޫނުވެ ރަސްމީކޮށް ތަހުގީގުކޮށްދިނުމަށް "އޯލް ސިލޯން މަލްޓި-ޑޭ ޓްރޯލަރ އޯނާސް އެސޯސިއޭޝަން" އިން ބައިނަލްއަގުވާމީ އިދާރާތަކަށާއި ލަންކާ ސަރުކާރަށް ގޮވާލައިފިއެވެ.
މި ޖަމިއްޔާގެ ސެކްރެޓަރީ ރުވަން ފެނާންޑޯ އާ ހަވާލާދީ ލަންކާގެ މީޑިއާ ރިޕޯޓުތައް ބުނާ ގޮތުގައި، ވެންނަޕުވަގެ ވެލަމަންކަރަ ބަނދަރުން ހަ މީހުންނާއެކު ފުރި މި މަސްބޯޓު ސީޝެލްސްގެ ސަލާމަތީ ބާރުތަކުން ހިފަހައްޓާފައިވަނީ މިދިޔަ ޑިސެމްބަރު މަހުގެ 30 ވަނަ ދުވަހުއެވެ. އޭނާ ފާހަގަކުރި ގޮތުގައި، މަސްވެރިން ހައްޔަރުކުރުމަށްފަހު އެ ބޯޓުގައި ވަނީ އަލިފާން ރޯކޮށް އަންދާލާފައެވެ. އެހެންކަމުން، މި ހާދިސާގެ ފުރިހަމަ ތަހުގީގެއް ލަންކާ ސަރުކާރާއި ބައިނަލްއަގުވާމީ ޖަމިއްޔާތަކުން ކުރިއަށް ގެންދަންޖެހޭނެ އެވެ.
ބޯޓު ހިފެހެއްޓިކަމާއި، ހައްޔަރުކުރި ހަ މަސްވެރިންނާމެދު އަޅާނެ ފިޔަވަޅަކާ ބެހޭގޮތުން ސީޝެލްސްގެ ކަމާބެހޭ ފަރާތްތަކުން އަދި ލަންކާ ސަރުކާރަށް ރަސްމީކޮށް އަންގާފައެއް ނުވޭ. އެކަމަކު މިހާރުވެސް ބޯޓު އެވަނީ ނައްތާލާފައި. މިފަދަ ފިޔަވަޅެއް އަޅަންވާނީ ލަންކާ ސަރުކާރަށް އެކަން އެންގުމަށްފަހު."ފެނާންޑޯ
މީގެ އިތުރުން، ބޯޓުގައި ހުރި 10،000 ލީޓަރުގެ ޑީސަލާއި، އިންޖީނު ތެލާއި، ފައިބަރު ފަދަ ތަކެތި ކަނޑަށް އެޅުމުގެ ސަބަބުން ތިމާވެއްޓަށް ބޮޑެތި ގެއްލުންތަކެއް ލިބިފައިވާނެ ކަމަށްވެސް އޭނާ ފާހަގަކުރި އެވެ.
ބޯޓުގެ ވެރިފަރާތް ކަމަށްވާ ސުސިލް ފެނާންޑޯ ބުނި ގޮތުގައި، ޑިސެމްބަރު 24 ހިސާބުގައި މޮރިޝަސް ކައިރީގައި އުޅެނިކޮށް މަގު އޮޅިގެން ބޯޓަށް ސީޝެލްސްގެ ކަނޑުގެ ސަރަހައްދަށް ވަދެވުނީއެވެ.
އަހަރެންގެ މަސްވެރިންގެ ދިފާއުގައި ވާހަކައެއް ނުދައްކާނަން. ގަވާއިދާ ހިލާފުވެފައިވާނަމަ އެމީހުންނަށް ގާނޫނީ ފިޔަވަޅު އަޅަންޖެހޭނެ. ނަމަވެސް، ކަނޑުމެދުގައި ބޯޓު އަންދާލައިގެން ނުވާނެ. މީގެ ކުރިން އިންޑިއާ އާއި ރާއްޖޭގެ ކަނޑުގެ ސަރަހައްދުން ވެސް އަހަރެމެންގެ ބޯޓުފަހަރު ހިފަހައްޓައި މަސްވެރިންނަށް ގާނޫނީ ފިޔަވަޅު އަޅާފައިވޭ. އެކަމަކު ދުވަހަކުވެސް ބޯޓެއް މިގޮތަށް އަންދާލާފައެއް ނުވޭ. ލަންކާގެ ކަނޑުގެ ސަރަހައްދަށް ވަންނަ އިންޑިއާގެ ބޯޓުފަހަރާމެދު ވެސް ލަންކާ ސަރުކާރުން އަމަލުކުރަނީ މިފަދަ ގޮތަކަށް ނޫން،"ބޯޓުގެ ވެރިފަރާތް
ޖަމިއްޔާގެ ސެކްރެޓަރީ ރުވަން ފެނާންޑޯ އިތުރަށް ބުނީ، ކަނޑުމެދުގައި ބޯޓު އަންދާލުމުގެ ސަބަބުން ތިމާވެއްޓަށް ލިބުނު ގެއްލުންތަކާ ގުޅޭގޮތުން ބައިނަލްއަގުވާމީ ތިމާވެށި ޖަމިއްޔާތަކުން ވަކި ތަހުގީގެއް ހިންގުމަކީ ކޮންމެހެން ބޭނުންތެރި ކަމެއް ކަމަށެވެ. އަދި މި މައްސަލާގައި ސީޝެލްސްގެ ސަރުކާރާ އެކު ލަންކާ ސަރުކާރުން މަޝްވަރާކޮށް ހައްލެއް ހޯދަންޖެހޭ ކަމަށްވެސް އޭނާ ވިދާޅުވިއެވެ.
މަސްދަރު: ޑެއިލީ މިރަރ
