ގަވައިދާ ޚިލާފަށް ހިތަދޫ ޕޯޓުން އެތެރެ ކުރަން އުޅުނު ސިނގިރޭޓުގެ އަދަދު 2 މިލިއަނާ ކައިރިކުރޭ
ސަރުކާރުން ސިނގިރޭޓުގެ އިމްޕޯޓް ޑިއުޓީ މަތިކުރުމާ ގުޅިގެން ވަގު ސިނގިރޭޓު ވިޔަފާރި ފުޅާވެފައިވޭ
ކަސްޓަމަސް އިން ހިފެހެއްޓި ސިނގިރޭޓް ޝިޕްމެންޓް
އައްޑޫ ސިޓީގެ ހިތަދޫ ވިޔަފާރި ބަނދަރުން ގަވައިދާ ޚިލާފަށް އެތެރެކުރަން އުޅެނިކޮށް އަތުލައިގަތް ސިނގިރޭޓުގެ އަދަދު ގާތްގަނޑަކަށް 1.8 މިލިއަނަށް އަރާކަމަށް ކަސްޓަމްސްއިން ބުނެފިއެވެ.
މިތަކެތި އަތުލައިގަނެފައިވަނީ، ކަނޑުމަގުން ރާއްޖެއަށް އެތެރެކުރަން އުޅުނު ޝިޕްމެންޓެއް އައްޑޫ ސިޓީ ހިތަދޫ ޕޯޓުން ބަލާފާސްކުރުމުގެ ތެރެއިން ކަމަށް ކަސްޓަމްސްއިން ބުނެފައިވެއެވެ. އަތުލައިގަތް ސިނގިރޭޓުތަކުގެ ޑިއުޓީއަށް ގާތްގަނޑަކަށް 15 މިލިއަން ރުފިޔާ އަރާނެ ކަމަށް ބެލެވޭކަމަށްވެސް ކަސްޓަމްސްއިން ބުނެފައިވެއެވެ.
ކަސްޓަމްސްއިން ބުނާ ގޮތުގައި އަތުލައިގަނެވުނު ޝިޕްމަންޓުގައި ހިމެނެނީ 92،000 ކާޓަން ނުވަތަ 1،840،000 ސިނގިރޭޓެވެ.
މި ޝިޕްމެންޓަކީ ކޮންބައެއްގެ ނަމުގައި، ކޮން ތާކުން ގެނައި ޝިޕްމެންޓެއް ކަމެއް ކަސްޓަމްސްއިން ހާމަކޮށްފައެއް ނުވެއެވެ.
މި މައްސަލައިގެ ތަޙުޤީޤު މިހާރު ކުރިއަށްދާ ކަމަށް ކަސްޓަމްސްއިން ބުނެފައިވާއިރު، މިއީ މި އަހަރު އައްޑޫ މަގުން ވަގަށް ސިނގިރޭޓު އެތެރެކުރަން އުޅެނިކޮށް ހިފެހެއްޓި ފުރަތަމަ ފަހަރެއް ނޫނެވެ. މީގެ ކުރިން މި އަހަރުގެ އޭޕްރީލް މަހުވެސް އައްޑުއަށް ގަވާއިދާ ޚިލާފަށް އެތެރެކުރަން އުޅުނު އެއް ލައްކައަށްވުރެ ގިނަ ސިނގިރޭޓު ވަނީ ހިފަހައްޓާފައެވެ.
ފަހަކަށް އައިސް ރާއްޖޭގައި މިފަދަ މައްސަލަތައް އިތުރުވަމުންދާކަން ފާހަގަކުރެވެއެވެ. ސަރުކާރުން ސިނގިރޭޓުގެ އިމްޕޯޓް ޑިއުޓީ މަތިކުރުމާ ގުޅިގެން، ސިނގިރޭޓުގެ އަގު މަތިވެ، ވަގު ސިނގިރޭޓު ވިޔަފާރި ފުޅާވެފައިވާކަން ފާހަގަކުރެވެއެވެ. މިކަމާ ގުޅިގެން ގަވާއިދާ ޚިލާފަށް ސިނގިރޭޓު އެތެރެކުރުމުގެ މައްސަލަތައްވެސް ވަނީ އިތުރުވެފައެވެ.
