ހުސްވި ނޮވެމްބަރު މަހު 463 މިލިއަން ރުފިޔާ އިތުރަށް ޚަރަދު ކޮށްފި
ހުސްވި އަހަރުގެ ތިންވަނަ ކުއާޓަރު ނިމުނުއިރު ދައުލަތުގެ ޖުމްލަ ދަރަނި (ސަރުކާރުން ގެރެންޓީ ދީފައިވާ ދަރަނި ނުހިމަނައި) ހުރީ 130.2 ބިލިއަން ރުފިޔާގައި.
މޯލްޑިވްސް މަނިޓަރީ އޮތޯރިޓީ
ހުސްވި ނޮވެމްބަރު މަހު އޭގެ ކުރީ އަހަރު (2024) ގެ ނޮވެމްބަރު މަހާ އަޅާ ބަލާއިރު 463.9 މިލިއަން ރުފިޔާ އިތުރަށް ޚަރަދު ކޮށްފި ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހާމަ ކޮށްފި އެވެ.
އެންމެ ފަހުގެ ތަފާސްހިސާބުތަކަށް ބަލާއިރު، 2025 ވަނަ އަހަރުގެ ތިންވަނަ ކުއާޓަރު ނިމުނުއިރު ދައުލަތުގެ ޖުމްލަ ދަރަނި (ސަރުކާރުން ގެރެންޓީ ދީފައިވާ ދަރަނި ނުހިމަނައި) ހުރީ 130.2 ބިލިއަން ރުފިޔާގަ އެވެ. މިއީ ދެވަނަ ކުއާޓަރާ އަޅާބަލާއިރު 2 އިންސައްތައިގެ އިތުރުވުމެކެވެ. ހަމައެއާއެކު، އުފެއްދުންތެރިކަމުގެ ނިސްބަތުން ދައުލަތުގެ ދަރަނި 110 އިންސައްތައިގައި ހުރި އިރު، ތިންވަނަ ކުއާޓަރު ނިމުނުއިރު 112 އިންސައްތަ އަށް ދަރަނީގެ ނިސްބަތް ވަނީ އުފުލިފަ އެވެ. މި މުއްދަތުގައި ދައުލަތުގެ ދަރަނި އިތުރުވުމުގެ މައިގަނޑު ސަބަބަކީ އެތެރޭގެ ދަރަނި (ޑޮމެސްޓިކް ޑެޓް) އިތުރުވުމެވެ.
ހިނގަމުންދާ ޑިސެމްބަރު މަހު އެމްއެމްއޭ އިން ނެރުނު އިކޮނޮމިކް އަޕްޑޭޓް ގައި ބުނެފައި ވަނީ، ނޮވެމްބަރު 2024 އާ އަޅާބަލާއިރު 2025 ވަނަ އަހަރުގެ ނޮވެމްބަރު މަހު ދައުލަތަށް ލިބުނު ޖުމްލަ އާމްދަނީ (ހިލޭ އެހީ ނުހިމަނައި) 294.2 މިލިއަން ރުފިޔާ (13%) އިތުރުވެފައިވެ އެވެ. މިއީ މައިގަނޑު ގޮތެއްގައި ޓެކުހުގެ ގޮތުގައި ލިބުނު އާމްދަނީ އިތުރުވުމާ ގުޅިގެން އައި ބަދަލެކެވެ. އެގޮތުން، ޓެކްސް އާމްދަނީ ގެ ގޮތުގައި 449.6 މިލިއަން ރުފިޔާ އިތުރުވި އިރު، ޓެކްސް ނޫން ގޮތްގޮތުން ލިބުނު އާމްދަނީ ވަނީ 155.4 މިލިއަން ރުފިޔާ ދަށްވެފަ އެވެ.
ލޯނު އަނބުރާ ދެއްކުން ނުހިމަނައި، ދައުލަތުގެ ޖުމްލަ ޚަރަދު 2024 ވަނަ އަހަރުގެ ނޮވެމްބަރު މަހާ އަޅާބަލާއިރު 2025 ވަނަ އަހަރުގެ ނޮވެމްބަރު މަހު ވަނީ 351.1 މިލިއަން ރުފިޔާ (ނުވަތަ 9%) އަށް ދަށްވެފަ އެވެ. މިއީ މައިގަނޑު ގޮތެއްގައި ކެޕިޓަލް ޚަރަދުތަކުން 815.0 މިލިއަން ރުފިޔާ ޚަރަދު ނުކޮށް ހުރުމުގެ ސަބަބުން އައި ބަދަލެކެވެ. ނަމަވެސް، ހިންގުމުގެ ޚަރަދަށް ބަލާއިރު، 2024 ނޮވެމްބަރާ އަޅާބަލާއިރު 2025 ނޮވެމްބަރު މަހު ވަނީ 463.9 މިލިއަން ރުފިޔާ އިތުރުވެފަ އެވެ.
