އާ ޓަރމިނަލް ސީޕްލޭން ޗެކިންގ ކައުންޓަރ ހަދައިގެން ރިސޯޓް ރެޕުންނަށް ލިބުނު މޮޅެއް ނެތް!
ވެލާނާ އެއަރޕޯޓުގެ އާ ޓަރމިނަލަށް ސީޕްލޭން ޚިދުމަތް ބަދަލުކުރުމުގައި ގިނަ މައްސަލަތައް ދިމާ ވޭ. ރިސޯޓް ރެޕުންނަށް ކައުންޓަރުތަކާއި ފައިލް ބަހައްޓާނެ ތަނެއް ނެތުމުގެ ސަބަބުން ވަރަށް ބޮޑެތި ދަތިތަކާ ކުރިމަތިލާން ޖެހިފައިވޭ.
ވެލާނާ އިންޓަނޭޝަނަލް އެއަރޕޯޓުގެ ޓަރމިނަލް އެކަކުން ސީޕްލޭންތަކަށް ޚިދުމަތް ދިނުމަށް ހަދާފައިވާ ޓަރމިނަލް
ވެލާނާ އިންޓަނޭޝަނަލް އެއަރޕޯޓުގެ ޓަރމިނަލް އެކަކުން ސީޕްލޭންތަކަށް ޚިދުމަތް ފެށި އިރު އެ ތަނުގައި ސީޕްލޭން ޗެކިންގ ކައުންޓަރ ހަދައިގެން ރިސޯޓް ރެޕުންނަށް ލިބުނު މޮޅެއް ނެތްކަން ހާމަވެއްޖެ އެވެ.
ޑިސެމްބަރު މަހުގެ 25 ހިސާބުން ފެށިގެން ސީޕްލޭންގެ ޚިދުމަތް އާ ޓަރމިނަލް އަށް ބަދަލުކުރަން ފެށި ނަމަވެސް ގިނަ މައްސަލަތަކެއް މި މަރުހަލާގެ ތެރެއިން ވަނީ ފެންމަތި ވެފަ އެވެ. އެމްއޭސީއެލް އިން މީގެ ކުރިން ބުނީ ސީޕްލޭން އަށް ޗެކިންގ ވާ ފަރާތްތައް، ސީޕްލޭން ޓަރމިނަލަށް ގެންދިއުމަށްޓަކައި އޮޕަރޭޓަރުން ބޭނުން ކުރާނެ ބަސް ރޫޓުތައް ކަނޑައަޅާ އެ މަރުހަލާ އަށް ތައްޔާރުވެފައިވާ ކަމަށެވެ.
އެމްއޭސީއެލްއިން ވަނީ ބަސް ރޫޓުތައް ކަނޑައެޅުމުގެ އިތުރުން، އެއަރޕޯޓުގެ އައު ޓަރމިނަލުގެ އެރައިވަލް ގޭޓް 4 ދެކުނު ޕާކިންގ ޒޯން ސީޕްލޭން އޮޕަރޭޓަރުންނަށާއި އެމްއޭސީއެލް ސްޓާފް ބަސްތައް ބެހެއްޓުމަށް ޚާއްސަކޮށްފަ އެވެ.
ރާއްޖެ އެމްވީ އަށް އިތުބާރު ހުރި މަސްދަރަކުން މައުލޫމާތު ދިން ގޮތުގައި ޑިސެމްބަރ 25 އިން ފެށިގެން ސީޕްލޭންގެ ޚިދުމަތް އާ ޓަރމިނަލް އަށް ބަދަލުކުރުމުގެ މަސައްކަތް ދަނީ ކުރަމުންނެވެ. މިހާތަނަށް އައި އިރު މަންޓާ، ފްލައިމީ، ޓީއެމްއޭ އަދި މޯލްޑިވިއަންގެ ޚިދުމަތް ވަނީ އާ ޓަރމިނަލް އަށް ބަދަލުކޮށްފަ އެވެ.
މި ނޫހަށް މައުލޫމާތު ދިން މީހަކު ބުނީ އެތަނުގެ އިންތިޒާމްތައް ހުރީ ވަރަށް ދޯދިޔާކޮށް ކަމަށެވެ. މިހާތަނަށް އައި އިރު ރިސޯޓް ކައުންޓަރު ބަހައްޓާނެ ތަނެއްހާ މިންވަރު ވެސް ޕްލޭންކޮށްލާފައި ނެތްކަން އޭނާ ފާހަގަކުރި އެވެ.
ހަމައެހެންމެ އެއާޕޯޓުގައި މިހާރު ވެސް ޚިދުމަތްދޭ 200 އަށް ވުރެ ގިނަ ރެޕުން ތިބި އިރު އެ އެންމެންގެ ފައިލްތައް ބަހައްޓާނެ ތަނެއް ނެތި އެތައް ތަކުލީފަކާއި ރެޕުންނަށް ވަނީ ކުރިމަތިލާން ޖެހިފަ އެެވެ. އާ ޓަރމިނަލްގައި ކައުންޓަރތައް ނެތުމުން ރެޕުންނަށް ފަސޭހަ ވާނެހެން ލޮކަރުތަކެއް ބަހައްޓާދޭނެ ކަމަށް ކަމާއި ގުޅުން ހުރި ފަރާތްތަކުން ވަނީ ބުނެފަ އެވެ.
ނަމަވެސް ހަފްތާ އެއްހާ ދުވަސް ހޭދަވީ ރެޕުން ބޭނުން ކުރާ ސައިންބޯޑާއި އެ ނޫން ވެސް ތަކެތި ވެސް ބަހައްޓާނެ ތަނެއް ނެތި އެވެ.
މީގެ އިތުރުން އެއާޕޯޓްގެ ޖާގަ ދަތިވުމުން އިންތިހާ ދަތިތަކާއި ކުރިމަތި ވެ އެ ޝަކުވާތައް ކުރި ނަމަވެސް ހައްލެއް ލިބިފަ އެއް ނުވެ އެވެ. ހަމައެހެންމެ، އެ ތަނަށް ދޮވެމި ފިހާރަ ލުމުގެ ސަބަބުން ކުރިން އޮތް ޖާގަ ވެސް އިތުރަށް ކުޑަ ވެގެން ދާނެ ކަން ފާހަގަކޮށްލެވެ އެވެ.
" ޑޮމެސްޓިކަށް ގެންދާ ގެސްޓުން ގެންދަން ޖެހޭ ވަގުތަށް ނުގެންދެވުމުގެ މައްސަލަ ދިމާވޭ. ބިޒްނަސް ކްލާސް ކްލައިންޓުން މިހާރު ވެސް އެއް ގަޑި އިރަށް ވުރެ ގިނަ އިރު ވޭ. މިފަދަ އެތައް މައްސަލަ އެއް އެބަ ދިމާވޭ." އޭނާ ވަނީ ބުނެފަ އެވެ.
.ވެލާނާ އެއަރޕޯޓުގެ އައު ޓަރމިނަލް މިދިޔަ ޖުލައި މަހު 26 ވަނަ ދުވަހު ޚިދުމަތް ދޭން ވަނީ ފަށާފަ އެވެ. މި ޓަރމިނަލުގައި ސީޕްލޭންތަކަށް ޚިދުމަތް ދިނުމަށްޓަކައި ޙާއްސަ 24 ޗެކިންގ ކައުންޓަރ ވަނީ ޤާއިމް ކުރެވިފަ އެވެ. ރާއްޖެއަކީ ދުނިޔޭގެ އެންމެ ބޮޑު ސީޕްލޭން އޮޕަރޭޝަން އޮންނަ ޤައުމުކަން ފާހަގަކޮށްލެވެ އެވެ.
