މޯލްޑިވްސް ޒަކާތު ހައުސް ޤާއިމުކޮށްފި
ޒަކާތުގެ ޤާނޫނަށް ޢަމަލުކުރަން ފެށުމުގެ ކުރިން އިސްލާމީ ވުޒާރާގެ ދަށުން ހިނގަމުން އައި ޒަކާތު ހައުސް އުވާލައި، ޤާނޫނުގެ ދަށުން ހިނގާ އިދާރާއެއްގެ ގޮތުގައި އާ ޒަކާތު ހައުސެއް ޤާއިމުކޮށްފި. ޒަކާތުގެ ފުރަތަމަ ޤާނޫނު 2025 ޑިސެންބަރު 6 ގައި ރައީސް ތަސްދީޤުކުރައްވައި، އާ އަހަރާއެކު ޢަމަލުކުރަން ފަށައިފި.
ޒަކާތް ދިނުން: މޯލްޑިވްސް ޒަކާތު ހައުސް ވަނީ ބުރާސްފަތި ދުވަހު ރަސްމީކޮށް ގާއިމުކުރައްވާފަ
ޒަކާތުގެ ޤާނޫނުގެ ދަށުން، އިސްލާމީ ކަންތައްތަކާ ބެހޭ ވުޒާރާގެ ދަށުން ހިނގަމުންދާ އިދާރާއެއްގެ ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ބުރާސްފަތި ދުވަހު މޯލްޑިވްސް ޒަކާތު ހައުސް ޤާއިމު ކުރައްވައިފި އެވެ.
މިއާއެކު، ޒަކާތުގެ ޤާނޫނަށް ޢަމަލުކުރަން ފެށުމުގެ ކުރިން އިސްލާމީ ކަންތައްތަކާ ބެހޭ ވުޒާރާގެ ދަށުން ހިނގަމުން އައި މޯލްޑިވްސް ޒަކާތު ހައުސް، ވަނީ އުވާލައްވާފަ އެވެ.
ޒަކާތުގެ ފުރަތަމަ ޤާނޫނު ރައީސުލްޖުމްހޫރިއްޔާ ތަސްދީޤު ކުރެއްވީ، ނިމިދިޔަ 2025 ވަނަ އަހަރުގެ ޑިސެންބަރު 6 ވަނަ ދުވަހު އެވެ. އަދި މި ފެށުނު އާ އަހަރާއެކު، މި ޤާނޫނަށް ޢަމަލުކުރަން ފެށޭނެ އެވެ.
މި ގާނޫނު ގައި ކުށެއްގެ ގޮތުގައި ކަނޑައަޅައިފައިވާ ކަންތައްތަކުގެ ތެރޭގައި، ޒަކާތް ދެއްކުން ނޫން ލާޒިމް މީހެއްގެ އަތުން ޒަކާތް ނެގުމާއި ޒަކާތް ދެއްކުން ލާޒިމުނުވާ މުދަލަކުން ޒަކާތް ނެގުން ހިމެނެ އެވެ. އަދި ޒަކާތު ފައިސާ ހައްގު ނޫން ގޮތުގައި ބެހުމާއި އިންވެސްޓުކުރުން ވެސް ކުށެއްގެ ގޮތުގައި ބަޔާންކޮށްފައިވެ އެވެ.
އޭގެ ތެރެއިން ކުށެއް ކޮށްފި ނަމަ 1،000 ރުފިޔާ އާއި އެއްލައްކަ ރުފިޔާ އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް ގާނޫނުގައިވެ އެވެ.
ޒަކާތު ހައުސް ގެ މަސައްކަތްތަކުގެ ތެރޭގައި، ޒަކާތް ބަލައިގަތުމުގެ އިންތިޒާމު ހަމަޖެއްސުމާއި ޒަކާތް ހައްގުވާ ފަރާތްތަކަށް ޒަކާތް ދޫކުރުމުގެ އިންތިޒާމުތައް ހަމަޖެއްސުމާއި ކޮންމެ ހަ މަހަކުން އެއްފަހަރު މުދަލު ޒަކާތުގެ ނިސާބު އިއުލާނުކުރުން ހިމެނެއެވެ. އަދި ކަމާބެހޭ އިދާރާތަކާ ގުޅިގެން ފަގީރުންނާއި މިސްކީނުންގެ ދަފުތަރު އެކުލަވައިލައި އަދާހަމަކޮށް ބެލެހެއްޓުމުގެ މަސައްކަތް ވެސް އެ އިދާރާއިން ކުރަން ޖެހެއެވެ.
