ލަންކާގައި ކުރިއަށް ގެންދިޔަ މުބާރާތުގައި ރާއްޖޭގެ އެކަޑަމީ ތަކަށް ރަނގަޅު ނަތީޖާ ތަކެއް

ސްރީ ލަންކާގައި ކުރިއަށް ގެންދިޔަ އެސްޕަޔާ/ރިނޯން ފްލެއާ ޗެމްޕިއަންޝިޕްގައި ވާދަކޮށް، ރާއްޖޭގެ އެކަޑަމީ ތަކުން ރަނގަޅު ނަތީޖާ ތަކެއް ހޯދައިފި އެވެ. 

ލަންކާގައި ދެ ދުވަހުގެ މުއްދަތަކަށް ކުރިއަށް ގެންދިޔަ މި މުބާރާތް ރާވާފައި ވަނީ ރާއްޖޭގެ އެސްޕަޔާ އެކަޑަމީ އާއި، ރިނޯން އިންނެވެ. މުބާރާތުގައި ރާއްޖޭގެ އެސްޕަޔާ އެކަޑަމީ އާއި، ދުވާފަރު އެކަޑަމީ، ފ.މަގޫދޫ އެކަޑަމީގެ އިތުރުން، އެޑްވެންޗާސް ފުޓުބޯޅަ އެކަޑަމީ އިން ވަނީ ޗެމްޕިއަންކަން ހޯދައިފަ އެވެ. މުބާރާތުގައި ޖުމުލަ 13 އެކަޑަމީ އަކުން ވަނީ ވާދަކޮށްފަ އެވެ.

މުބާރާތުގެ އަށް އަހަރުން ދަށުގެ ޗެމްޕިއަންކަން ހޯދީ އެސްޕަޔާ އިންނެވެ. އެ އެކަޑަމީ އިން ވަނީ ފައިނަލްގައި 3-0 އިން ރިނޯންގެ މައްޗަށް ކުރި ހޯދައިފަ އެވެ. ލީގު އުސޫލުން ކުޅުނުއިރު، ފައިނަލްގެ ޖާގަ ލިބުނީ އެއް ވަނަ ޓީމާއި، ދެ ވަނަ ޓީމަށެވެ. އެސްޕަޔާ އިން ޗެމްޕިއަންކަން ހޯދީ އެއްވެސް މެޗަކުން ބަލި ނުވެ އެވެ.

މީގެ އިތުރުން 10 އަހަރުން ދަށުގެ ފައިނަލްގައި ދުވާފަރުން ވަނީ ރިނޯންގެ މައްޗަށް ކުރި ހޯދައިފަ އެވެ. މި އުމުރުފުރާގެ ފައިނަލް މެޗު ދުވާފަރުން ކާމިޔާބު ކޮށްފައި ވަނީ 2-1 އިންނެވެ. އަދި 10 އަހަރުން ދަށުގެ ޕްލޭޓް ފައިނަލްގައި ފ.މަގޫދޫ އެކަޑަމީ އިން ވާދަކޮށްފައި ވަނީ ލަންކާގެ އެކަޑަމީއަކާ އެވެ. ޕެނަލްޓީގައި ކުރި ހޯދައި މަގޫދޫ އެކަޑަމީ އިން ވަނީ ޗެމްޕިއަންކަން ހޯދައިފަ އެވެ. 

މުބާރާތުގެ 12 އަހަރުން ދަށުގެ ޗެމްޕިއަންކަން ހޯދީ އެޑްވެންޗާސް އެވެ. މި އުމުރުފުރައިގެ ފައިނަލްގައި ވާދަ ކުރީ ރާއްޖޭގެ ދެ އެކެޑަމީ އިންނެވެ. އެގޮތުން ފައިނަލްގައި އެޑްވެންޗާސް އިން ވަނީ 2-1 އިން ދުވާފަރުގެ މައްޗަށް ކުރި ހޯދައިފަ އެވެ. 12 އަހަރުން ދަށުގެ ޕްލޭޓް ފައިނަލްގައިި ވާދަ ކުރީ ބީޖީ އާއި ސައުންޑާސް އެވެ. ބީޖީ އިން ޗެމްޕިއަންކަން ހޯދީ ޕެނަލްޓީ ޖަހައިގެންނެވެ.

ރާއްޖެ އިން ތިން އުމުރުފުރާގައި ވާދަކޮށްފައިވާއިރު، ރަނގަޅު ނަތީޖާ ތަކެއް މި ވަނީ ހޯދައިފަ އެވެ. މީގެ އިތުރުން މުބާރާތުގައި 14 އަހަރުން ދަށުގެ އުމުރުފުރާ އަށް ވެސް ކުޅުން އޮތެވެ.