ޕެސިފިކްގެ ޖަޒީރާ ގައުމެއް ކަމަށްވާ ވަނުއާޓޫ އަށް 7.3 މެގްނިޓިއުޑްގެ ބާރުގަދަ ބިންހެލުމެއް އަތުވެއްޖެއެވެ.

ވަނުއާޓޫގެ ވެރިރަށް ޕޯޓް ވިލާ ކައިރި އަށް އައި ބާރުގަދަ މި ބިންހެލުމުގެ ސަބަބުން، އިމާރާތްތަކާއި އެހެނިހެން ވަސީލަތްތަކަށް ބޮޑެތި ގެއްލުންތަކެއް ވަނީ ލިބިފައެވެ.

ޔުނައިޓެޑް ސްޓޭޓްސް ޖިއޮލޮޖިކަލް ސަރވޭ (ޔޫއެސްޖީއެސް) އިން މަޢުލޫމާތު ދޭ ގޮތުގައި މި ބިންހެލުން އައީ އަންގާރަ ދުވަހު ވަނުއާޓޫ ގަޑިން 12:47 ގައި (ޖީއެމްޓީ 01:47) 57.1 ކިލޯމީޓަރުގެ ފުންމިނުގައެވެ.

މި ބިންހެލުމާ ގުޅިގެން ވަނުއާޓޫގެ ބައެއް ސަރަޙައްދުތަކަށް ކުޑަ ވަގުތުކޮޅަކަށް ސުނާމީގެ އިންޒާރު ދެވުނެވެ. ނަމަވެސް އޮފިޝަލުން ހާމަ ކުރި ގޮތުގައި މިހާރު އެ ނުރައްކާ ފިލައިގެން ގޮސްފައިވެއެވެ.

ގެއްލުން ލިބުނު މިންވަރު އަދި ސާފުނުވި ނަމަވެސް، މަދުވެގެން އެކަކު މަރުވެފައިވާ ކަމަށް ބައެއް ރިޕޯޓުތަކުގައި ބުނެފައިވެއެވެ.

ޙާދިސާގައި ޒަޚަމްވި މީހުން ހޮސްޕިޓަލަށް ގެންދާ މަންޒަރު ސޯޝަލް މީޑިއާގައި ދައުރުވާ މަންޒަރުތަކުގައި ފެނެއެވެ.

ސޯޝަލް މީޑިއާގައި ފެތުރެމުންދާ މަންޒަރުތަކުގައި ވެއްޓިފައިވާ އިމާރާތްތަކާއި، ވެއްޓިފައިވާ ތަކެތިން ޖެހި ގެއްލުންވެފައިވާ އެއްގަމު އުޅަނދުތަކާއި، އިމާރާތްތަކުގެ ތަޅުންމައްޗަށް ވެއްޓިފައިވާ ފަރުނީޗަރުތައް ފެނެއެވެ.

އާންމުން ބުނާ ގޮތުގައި މުވާސަލާތީ ޚިދުމަތްތައް ވަނީ މެދުކެނޑިފައެވެ.

އޮންލައިންކޮށް ޝާއިޢުކޮށްފައިވާ ފޮޓޯތަކުން ދައްކާ ގޮތުގައި ޕޯޓް ވިލާގައި ހުރި ޔޫއެސް އެމްބަސީ އަކީވެސް ގެއްލުން ލިބިފައިވާ އިމާރާތްތަކުގެ ތެރޭގައި ހިމެނޭ ތަނެކެވެ.

އެމެރިކާގެ އޮފިޝަލުން ބުނާ ގޮތުގައި އިމާރާތަށް ވަނީ "ބޮޑު ގެއްލުމެއް" ލިބިފައެވެ. އަދި އިމާރާތް މިހާރު ވަނީ ބަންދުކުރެވިފައި ކަމަށް ވަނީ ބުނެފައެވެ.