ފުރިހަމަ ރެކޯޑާ އެކު ރާއްޖެ ފައިނަލަށް

ރާއްޖޭގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމަންސް ކަޕްގެ ސެމީ ފައިނަލްގައި ބަންގްލަދޭޝްއާ ދެކޮޅަށް ކުޅުނު މެޗުން މޮޅުވެ ރާއްޖެ އިން މުބާރާތުގެ ފައިނަލްގެ ޖާގަ ހޯދައިފި އެވެ. 

ޒުވާނުންގެ މަރުކަޒުގެ އެތެރޭ ކޯޓުގައި ބުދަ ދުވަހުގެ ރޭ ކުޅުނު މެޗު ރާއްޖެ އިން ކާމިޔާބު ކުރީ ސީދާ ތިން ސެޓުންނެވެ. މެޗުގެ ސެޓުތައް ރާއްޖެ އިން ކާމިޔާބު ކުރީ 25-17، 25-12، އަދި 25-12 އިންނެވެ. މުބާރާތުގެ ލީގު ބުރުގައި ވެސް ރާއްޖެ އިން ވަނީ ބަންގްލަދޭޝްގެ މައްޗަށް ސީދާ ތިން ސެޓުން ކުރި ހޯދައިފަ އެވެ. ލީގު ބުރެކޭ އެއް ގޮތަށް، ސެމީ މެޗުގައި ވެސް ރާއްޖެ އިން ވަނީ މޮޅު ކުޅުމެއް ދައްކައިފަ އެވެ. 

ހަތަރު ޤައުމު ވާދަ ކުރާ މުބާރާތުގެ ލީގު ބުރުގައި ރާއްޖެ އިން ކުޅުނުު ހުރިހާ މެޗަކުން ވެސް ވަނީ މޮޅުވެފަ އެވެ. ފުރަތަމަ މެޗުގައި ބަންގްލަދޭޝް އަދި ދެ ވަނަ މެޗުގައި އަފްޣާނިސްތާންގެ މައްޗަށް ރާއްޖެ އިން ކުރި ހޯދީ ސީދާ ތިން ސެޓުންނެވެ. ލީގު ބުރުގެ ފަހު މެޗުގައި ކިރްގިސްތާން އަތުން ތިން ސެޓު އެއް ސެޓުން މޮޅުވެ، ރާއްޖެ އިން ސެމީ ފައިނަލްގެ ފުރުސަތު ހޯދީ ލީގު ބުރުގެ އެއް ވަނަ ޓީމުގެ ގޮތުގަ އެވެ.

ބުރާސްފަތި ދުވަހުގެ ރޭ އޮންނަ ތާރީޚީ ފައިނަލްގައި ރާއްޖެ އިން ނިކުންނާނީ އަނެއްކާ ވެސް ކިރްގިސްތާނާ ދެކޮޅަށެވެ. ރާއްޖެ އިން މިއަހަރުގެ މުބާރާތާ ކުރިމަތިލީ ވެސް ރަން މެޑަލް ހޯދުމުގެ އަޒުމުގަ އެވެ. އެ އަޒުމުގައި ރާއްޖެ އިން މޮޅު ކުޅުމެއް ދައްކަމުން އަންނައިރު، ތާރީޚީ ރަން މެޑަލް ހޯދުމުގެ އުންމީދު ރާއްޖެ އަށް ވަރަށް ބޮޑެވެ. 

މީގެ ކުރިން ރާއްޖޭގެ ޤައުމީ އަންހެން ޓީމުން ވަނީ ރިހި މެޑަލް ވެސް ހޯދައިފަ އެވެ. އެގޮތުން 2019 ވަނަ އަހަރު ނޭޕާލްގައި ކުރިއަށް ދިޔަ މުބާރާތުގެ ފައިނަލްގައި ރާއްޖެ އިން ކުޅުނު ނަމަވެސް، އެ ފަހަރު ވަނީ ބަލިވެފަ އެވެ. އޭގެ ފަހުން މިދިޔަ އަހަރު ރާއްޖޭގައި އޮތް ކާވާ މުބާރާތުގެ ފައިނަލްގައި ވެސް ރާއްޖެ އިން ވާދަ ކުރި އެވެ. އެ ފަހަރުގެ ފައިނަލްގައި ރާއްޖެ ބަލިވެފައި ވަނީ ކިރްގިސްތާން އަތުންނެވެ.