މޭޔަރ އާޒިމް، ރައީސް މުއިއްޒު އަށް: ވެރިކަމުގެ ހުވާ ކުރައްވައިގެން ހުންނަވާ ދޮގު ހެއްދެވުން ހުއްޓާލައްވާ!
އެކި ފަހަރު މަތިން ފާއިތުވި ދެ އަހަރުގެ ތެރޭގައި ތަފާތު އެކި ބައްދަލުވުންތައް ބާއްވާ މަޝްވަރާ ކުރެވި، އެމްއޯޔޫއެއްގެ ދަށުން މުނިސިޕަލް މަސައްކަތް ސިޓީ ކައުންސިލްގެ ބެލުމުގެ ދަށަށް ގެންނަން ތައްޔާރަށް އޮތް ކަމަށާއި ނަމަވެސް އެމަސައްކަތް ލަސްވެފައިވަނީ، ވެރިކަމުގައި ތިއްބެވި ފަރާތްތަކުގެ އިޚްލާސްތެރިކަމެއް ނެތުމުން ކަމަށް އާޒިމް ވިދާޅުވި.
މާލެ ސިޓީ ކައުންސިލްގެ މޭޔަރ އާދަމް އާޒިމް - ރާއްޖެޓީވީ އަށް އިންޓަވިއު ދެއްވަނީ - 22-12-2025
ހުޅުމާލޭގެ މުނިސިޕަލް ޚިދުމަތް ދިނުން މާލެ ސިޓީ ކައުންސިލް އާއި ހަވާލު ނުކުރެވިގެން އުޅެނީ ކައުންސިލް އިން އެކަމަށް ބޭނުން ނުވާތީ ކަމަށް ވިދާޅުވެ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްކެވި ވާހަކަފުޅަށް، މާލެ ސިޓީ ކައުންސިލްގެ މޭޔަރ އާދަމް އާޒިމް ވަރުގަދަ ރައްދެއް ދެއްވައިފި އެވެ.
ހުޅުމާލެ ފޭސް އެކެއްގެ ރައްޔިތުންނާއި ބައްދަލު ކުރެއްވުމަށް ރެހެންދި ސްކޫލު ހޯލު ގައި އާދިއްތަ ދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުން ރައީސް މުއިއްޒު ވަނީ ހުޅުމާލޭގެ މުނިސިޕަލް ޙިދުމަތްތައް މިހާރު ދެމުން އަންނަ އެޗްޑީސީގެ އަތުން އެ ޙިދުމަތް، މާލެ ސިޓީ ކައުންސިލްގެ ދަށަށް ބަދަލު ނުކުރެވިގެން އުޅެނީ ކައުންސިލުގެ ސަބަބުން ކަމަށް ދޭހަވާ ގޮތަށް ވާހަކަފުޅު ދައްކަވާފަ އެވެ. މިކަމަށް ރައްދު ދެއްވަމުން ރާއްޖެއެމްވީ އިން ކުރި ސުވާލަކަށް ޖަވާބު ދެއްވަމުން މާލެ ސިޓީ ކައުންސިލްގެ މޭޔަރ އާދަމް އާޒިމް ވިދާޅުވީ، ރައީސް މުއިއްޒު އެހެއްދެވީ ކަނޑައެޅިގެން އިތުރުފުޅެއް ކަމަށެވެ.
ފާއިތުވި ދެ އަހަރުގެ ތެރޭގައި އެކި ފަހަރު މަތިން، ތަފާތު އެކި ބައްދަލުވުންތައް ބާއްވާ މަޝްވަރާ ކުރެވި، އެމްއޯޔޫއެއްގެ ދަށުން މުނިސިޕަލް މަސައްކަތް ސިޓީ ކައުންސިލްގެ ބެލުމުގެ ދަށަށް ގެންނަން ތައްޔާރަށް އޮތް ކަމަށާއި ނަމަވެސް އެމަސައްކަތް ލަސްވެފައިވަނީ، ވެރިކަމުގައި ތިއްބެވި ފަރާތްތަކުގެ އިޚްލާސްތެރިކަމެއް ނެތުމުން ކަމަށެވެ.
ޤާނޫނު ލާޒިމް ކުރާ ގޮތުގައި ސިޓީ ކައުންސިލްގެ މަސައްކަތްތަކުގެ ތެރޭގައި ހަމަ އެކަނި ހިމެނެނީ މުނިސިޕަލް ޙިދުމަތް ނޫން ކަން ފާހަގަކުރައްވަމުން، މޭޔަރ ވިދާޅުވީ ހުޅުމާލޭގެ ކަންކަން އެޗްޑީސީގެ ދަށުން ވަކިން އޮތުމުގެ ސަބަބުން ރައްޔިތުންނަށް ޙިދުމަތް ދިނުމުގައި ދަތިތަކެއް ކުރިމަތިވާ ކަމަށާއި އަދި ޙިދުމަތް ލިބިގަންނަ ރައްޔިތުންނަށް ވެސް އެތައް އުނދަގޫ ތަކާއި ކުރިމަތިވާ ކަމަށެވެ. އެހެންކަމުން ހުޅުމާލެ މުނިސިޕަލް ޙިދުމަތް ދިނުމަށް ސިޓީ ކައުންސިލް އޮތީ ތައްޔާރަށް ކަމަށާއި މިކަން ވީހާވެސް އަވަހަށް ކުރިއަށް ގެންދެވޭނެ ގޮތް ސަރުކާރުން ހަމަޖައްސަވައި ދެއްވުމަށް އާޒިމް އެދިވަޑައިގެންނެވި އެވެ.
މީގެ އިތުރުން ރައީސް މުއިއްޒު ވެރިކަމަށް ވަޑައިގެންނެވީ ހުޅުމާލެ މުނިސިޕަލް ޚިދުމަތް ސިޓީ ކައުންސިލްގެ ބެލުމުގެ ދަށަށް ގެންނާނެ ކަމަށް ވައުދުވެ ވަޑައިގެން ކަމަށާއި، ދޮގު ހެއްދެވުން ހުއްޓާލެއްވުމަށްފަހު ވައުދު ފުއްދާ ދެއްވުމަށް މޭޔަރު އާޒިމް ވަނީ ރައީސް މުއިއްޒު އަށް އިލްތިމާސް ކުރައްވާފަ އެވެ.
ހުޅުމާލެ މުނިސިލް ހިދުމަތް އެޗްޑީސީގެ ދަށުން އޮތުމުގެ ސަބަބުން ރައްޔިތުންގެ ގިނަ ހައްގުތަކެއް ގެއްލި ރައްޔިތުންނަށް ފަސޭހައިން ލިބެންޖެހޭ ޚިދުމަތްތައް ލިބުމުގައި ދަތިތަކެއް ކުރިމަތިވެފައިވާ ކަމުގެ ޝަކުވާ ހުޅުމާލެ ރައްޔިތުން ދަނީ ކެނޑި ނޭޅި ކުރަމުންނެވެ.
