ހުޅުމާލެ ފޭސް 1 ގެ ރައްޔިތުންނާއި ރައީސް ބައްދަލުކުރައްވައިފި: އާދޭހާ އެކު ރައްޔިތުން އެދުނީ ރައްޔިތުންގެ އަޑު އެހުމަށް!
މި ބައްދަލުވުމުގައި އާންމުން ވަނީ ވަރަށް ގިނަ ކަންބޮޑުވުންތަކެއް ފާޅު ކޮށްފަ އެވެ. ވާހަކަ ދެއްކި ކޮންމެ މީހަކު ވެސް ވަނީ މި ސަރުކާރުން އެކަންކަން އިސްލާހުކުރުމަށް ގޮވާލާފަ އެވެ. ރައީސް ވެފައިވާ ގިނަ ވައުދުތައް ރައީސް އަށް ހަނދާން ކޮށްދީ ރައްޔިތުން ވަނީ އެ ވައުދު ފުއްދުމަށް ތަކުރާރުކޮށް ގޮވާލާފަ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިހާރު ކުރިއަށް ގެންދަވާ ސިލްސިލާ ބައްދަލުވުންތަކުގެ ތެރެއިން ހުޅުމާލޭ ފުރަތަމަ ފިޔަވަހީ ގައި ދިރިއުޅޭ ރައްޔިތުންނާއި ބައްދަލުކުރައްވައިފި އެވެ.
ރައީސް ހުޅުމާލޭ ފުރަތަމަ ފިޔަވަހީ ގައި ދިރިއުޅޭ ރައްޔިތުންނާއި ބައްދަލުކުރައްވާފައި ވަނީ އާދިއްތަ ދުވަހުގެ ރޭ 20:30 ގައި ރެހެންދި ސްކޫލްގަ އެވެ. އެ ބައްދަލުކުރެއްވުމުގައި އާންމުން ވަނީ ހުޅުމާލެ އާއި ގުޅުން ހުރި ކަންބޮޑުވުންތައް ހިއްސާކޮށްފަ އެވެ.
އާއްމުންގެ ތެރެއިން އެންމެ ގިނަ ބަޔަކު ކަންބޮޑުވުން ހިއްސާކޮށްފައި ވަނީ ގޯތި ގެދޮރުގެ މައްސަލަ އާއި މެދުގަ އެވެ. މީގެ އިތުރުން ހުޅުމާލެ އިން ބޭސް ލިބުމުގައި ހުރި ގޮންޖެހުންތަކާއި ސިއްހީ ފަރުވާ ހޯދުމަށް ހުރި ގޮންޖެހުންތަކުގެ ވާހަކައިގެ އިތުރުން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާ މެދު ވެސް ގިނަ ބަޔަކު ވަނީ ކަންބޮޑުވުން ފާޅު ކޮށް، ނުރުހުން ފާޅު ކޮށްފަ އެވެ.
އެ ބައްދަލުވުމުގައި ވާހަކަ ދެއްކި މީހަކު ވަނީ އެސްޓީއޯ ފާމަސީގެ ފަރުވާ ކުޑަކަމުން ކޮންމެހެން ވެސް ޖަހަން ޖެހޭ އިންޖެކްޝަން ނުބައިކޮށް ގެންނާތީ އެކަން ހައްލު ކޮށްދިނުމަށް އެދިފަ އެވެ. ގޮހޮރުގެ ބޮޑު ބައްޔެއް ތަހައްމަލު ކުރަމުންދާ އެ ކުއްޖާ އެދިފައި ވަނީ ސިއްހީ ނިޒާމު މިއަށްވުރެ ރަނގަޅު ކޮށްދިނުމަށެވެ.
މީގެ ކުރިން އާސަންދަ އިން ލިބެމުން ދިއަ ބޭސްތައް ދިނުން އާސަންދަ އިން ހުއްޓާލި ފަހުން ފާމަސީތަކުން އަމިއްލަ އަށް ގަންނަން ލިބުނު ނަމަވެސް، މިހާރު ބޮޑު އަގުގައި ވެސް އެ ބޭސްތައް ގަންނަން ނުލިބޭ ކަން ރައްޔިތުން ދަނީ ފާހަގަ ކުރަމުންނެވެ. ބޭސް ނެގުމަށް އެތައް ފާމަސީއަށް ގޮސްގެން ވެސް ބޭސް ހަމަނުވާ ކަމުގެ ޝަކުވާ އާއި މުހިންމު އެތައް ބޭހެއް އެއްގޮތަކަށް ވެސް ނުލިބޭކަމުގެ ޝަކުވާ ރައްޔިތުން ކުރަމުންދާ މިންވަރުން ވެސް މިފަހުން ވަނީ އިތުރުވެފަ އެވެ.
ބޭސް ލިބުން ދަތިވުމުގެ ސަބަބުން ބޮޑެތި ބަލިތަކަށް ފަރުވާކުރާ މީހުންނާއި، ދާއިމީ ބަލިތަކާއި، ނަފްސާނީ ބަލިތަކުގެ އިތުރުން އުމުރުން ދުވަސްވީ މީހުންނަށާއި މާބަނޑު މީހުންނަށް ދޭ ޚާއްސަ ބޭސްތައް ހުސްވެފައިވާތާ އެތައް ދުވަހެއް ވެފައިވާ ކަމުގެ ޝަކުވާ ވެސް ގިނަ ބަޔަކު ދަނީ ކުރަމުންނެވެ.
މީގެ އިތުރުން އެންސްޕާ އިން މަކަރާއި ހީލަތް ހަދައި އޮޅުވާލަމުންދާ ކަމުގެ ކަންބޮޑުވުން ވެސް ބައެއް މީހުން ވަނީ އެ ބައްދަލުވުމުގައި ފާޅުކޮށްފަ އެވެ.
މި ބައްދަލުވުމުގައި އާންމުން ވަނީ ވަރަށް ގިނަ ކަންބޮޑުވުންތަކެއް ފާޅު ކޮށްފަ އެވެ. ވާހަކަ ދެއްކި ކޮންމެ މީހަކު ވެސް ވަނީ މި ސަރުކާރުން އެކަންކަން އިސްލާހުކުރުމަށް ގޮވާލާފަ އެވެ. ރައީސް ވެފައިވާ ގިނަ ވައުދުތައް ރައީސް އަށް ހަނދާން ކޮށްދީ ރައްޔިތުން ވަނީ އެ ވައުދު ފުއްދުމަށް ތަކުރާރުކޮށް ގޮވާލާފަ އެވެ.
