ސުޕްރީމް ކޯޓް މަޅީގައި ޖެހިއްޖެ: މެމްބަރު ފައްޔާޒު
ސިރާޖު ކުރެއްވި ޓުވީޓެއްގައި ވިދާޅުވީ އެއްވެސް ވަކީލެއް ކައިރިން ސޮއި ކުރެއްވި ތޯ އައްސަވާ ނުލައްވާ އެންމެން ސަސްޕެންޑުކޮށްފައިވާ ކަމަށް
ރާއްޖެޓީވީގެ ފަލަސުރުޙީ ޕްރޮގްރާމްގައި ފައްޔާޒު
ގާނޫނީ ވަކީލުން ފަތުރާލައިފައިވާ މަޅީގައި ސުޕްރީމް ކޯޓުން ރަގަޅަށް ޖެހިފައިވާ ކަމަށް ރައްޔިތުންގެ މަޖިލީހުގެ ގަމު ދާއިރާގެ މެމްބަރު ފައްޔާޒު އިސްމާއީލް ވިދާޅުވެއްޖެ އެވެ.
ފައްޔާޒުގެ އިތުރުން ބައެއް އެހެން ވަކީލުން ސުޕްރީމް ކޯޓަށް ފާޑުކިޔަމުން ދަނީ، 54 ވަކީލުން ސަސްޕެންޑްކުރީ ރާއްޖޭގެ ޝަރުއީ ނިޒާމާ ދޭތެރޭ ކަންބޮޑުވުންފާޅުކޮށް، އެ މައްސަލަތަކަށް ހައްލު ހޯދައިދޭން އެދި ސުޕްރީމް ކޯޓަށް ހުށަހެޅި ޕެޓިޝަނާ ގުޅިގެންނެވެ.
ޤާނޫނީ ވަކީލް އަލީ ޒާހިރު ކުރެއްވި ޓްވީޓެއްގައި ވަނީ ދެ މީހެއްގެ ނުފޫޒުގައި ޤާނޫނު އަސާސީ ވީދައި ކަމުން ދާ ކަމަށާއި ޖުޑިޝަރީގެ ހާލަތު ވަރަށް ރަގަޅަށް ފެނިގެން ގޮސްފައިވާ ކަމަށެވެ.
ޤާނޫނު އަސާސީ އަދި ޤާނޫނޭ ކިޔާ މަލާމަތް ކުރަން ލަދު ނުގަންނޭތޯ ވިދާޅުވެ އަލީ ޒާހިރު ވަނީ ސުވާލު އުފައްދަވައިފަ އެވެ.
އަލީ ޒާހިރު ކުރެއްވި އެހެން ޓުވީޓެއްގެ ވިދާޅުވީ ނެރުއްވާ އަމުރަކުން ކުރައްވާ ސަސްޕެންޑަކުން ހުރުމަތެއް އަދި ޤަދަރެއްވެސް ލިބިނުލައްވާނެ ކަމަށެވެ.
ޤާނޫނީ ވަކީލް މޫސާ ސިރާޖު ކުރެއްވި ޓުވީޓެއްގައި ވިދާޅުވީ އެއްވެސް ވަކީލެއް ކައިރިން ސޮއި ކުރެއްވި ތޯ އައްސަވާ ނުލައްވާ އެންމެން ސަސްޕެންޑުކޮށްފައިވާ ކަމަށާއި ވަކީލުންގެ ތެރޭގައި ގާރީ ރަޝީދެއް ހުރެދާނެ ކަމަށެވެ.
ސިރާޖު އިޝާރާތް އެ ކުރެއްވީ ކޮންކަމަކާ ގުޅިގެން ކަމެެއް އަދި ކާކަށް ކަމެއް ނޭނގެ އެވެ. މި އަހަރުގެ ޖުލައި މަހު ރައްޔިތުންގެ މަޖިލީހުގެ ރައީސް އަބްދުﷲ މަސީހްގެ އިތުބާރު ނެތްކަމުގެ މައްސަލަ ވެއްދުމަށް އިސްދޫ ދާއިރާގެ މެންބަރު އަހުމަދު ރަޝީދުގެ ނަމުގައި ކޮށްފައިވަނީ ވަގު ސޮޔެއް ކަމަށް އޭނާ ވަނީ ކުރިން ވިދާޅުވެފައެވެ. އެހެން ނަމަވެސް އެއީ ސައްޚަ ސޮޔެއް ކަމަށް ފަހުން އޭނާ ވަނީ އެއްބަސްވެވަޑައިގެން ފައެވެ.
