ސަރުކާރު ހިއްސާވާ ކުންފުނިތަކަށް ލިބުނު އާމްދަނީ އާއި ސާފު ފައިދާ ދަށްވެ، ކުންފުނިތަކުގެ ޖުމްލަ ދަރަނި 55.8 ބިލިއަނަށް!

ކުރީ އަހަރާ އަޅާ ބަލާއިރު 2024 ވަނަ އަހަރު ސަރުކާރު ހިއްސާވާ ކުންފުނިތަކަށް ލިބުނު އާމްދަނީ 13 އިންސައްތަ ދަށަށް ގޮސް ސާފު ފައިދާ 3 އިންސައްތަ ދަށަށް ހިނގައްޖެ އެވެ.

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ނެރުނު 2024 ވަނަ އަހަރުގެ އަހަރީ ރިޕޯޓު ގައި ބުނެފައިވަނީ، ހުސްވި އަހަރު 13 ކުންފުންޏަކަށް ގެއްލުންވެފައިވާ ކަމަށެވެ. އޭގެ ތެރެއިން ގިނަ ކުންފުނިތަކަކީ ސަރުކާރުން ފައިސާ ދީގެން ހިންގާ ކުންފުނިތަކެއް ކަމަށް ވެސް ޕީސީބީ އިން ބުނެފައިވެ އެވެ.

ޕީސީބީ އިން ބުނީ 2024 ވަނަ އަހަރު ނިމުނު އިރު ކުންފުނިތަކުގެ ޖުމްލަ ދަރަނި 55.8 ބިލިއަނަށް އަރާ ކަމަށެވެ. އެއީ ކުރީ އަހަރާ ބަލާއިރު 17.5 އިންސައްތަ އިތުރު އަދަދެއް ކަމަށް ވެސް ބުނެފައިވެ އެވެ.

2024 ވަނަ އަހަރު ނިމުނު އިރު ސަރުކާރު ހިއްސާވާ ކުންފުނިތަކުގެ ގޮތުގައި 33 ކުންފުނި އޮތެވެ. އޭގެ ތެރޭގައި ސައްތައިން ސައްތަ ސަރުކާރުގެ ހިއްސާ އޮންނަނީ 23 ކުންފުންޏެވެ.

ޕީސީބީ އިން ބުނީ، ކުންފުނިތަކުގެ މާލީ ކަންކަން ބެލެހެއްޓުމުގައި ކުންފުނިތަކުގެ ބޯޑުގައި ފައިނޭންސް ދާއިރާ އިން ތައުލީމާއި ތަޖުރިބާ ލިބިފައިވާ މީހުން މަދުވުމަކީ ކުންފުނިތައް ހިންގުން ހަރުދަނާ ކުރުމަށް ދިމާވެފައިވާ ބޮޑު ގޮންޖެހުމެއް ކަމުގައެވެ.

ޗީފް ފައިނޭންޝަލް އޮފިސަރުންގެ ގޮތުގައި 2024 ވަނަ އަހަރު ވެސް 4 ކުންފުންޏެއް ގައި ޕީސީބީ އިން ކަނޑައަޅާފައިވާ ފެންވަރުގެ މުވައްޒަފުން ނެތް ކަމަށާއި، 13 ކުންފުންޏެއްގެ އެކްސްޓާނަލް އޮޑިޓް ނިމިފައި ނުވާތީ އަހަރީ އާންމު ޖަލްސާ ބޭއްވިފައި ނުވާ ކަމަށާއި އަހަރީ ރިޕޯޓު ވެސް ތައްޔާރުވެފައި ނުވާ ކަމަށެވެ. މީގެ ތެރޭގައި އެއް އަހަރަށް ވުރެ ގިނަ އަހަރު އޮޑިޓް ކޮށްފައި ނުވާ ކުންފުނިތައް ހުރި ކަމަށް ވެސް ބުނެފައިވެއެވެ.

2024 ވަނަ އަހަރު ސަރުކާރު ހިއްސާވާ ކުންފުނިތަކުގެ ޑިރެކްޓަރުންގެ ބޯޑު ގައި ސަރުކާރު ތަމްސީލު ކުރާ 202 މީހުން ތިއްބެވެ.