މުވައްޒަފަކާ އެކު ލޯބީގެ ގުޅުމެއް ހިންގައިގެން ނެސްލޭގެ ސީއީއޯ ވަޒީފާއިން ވަކިކޮށްފި

ނެސްލޭގެ ސީއީއޯ ކުންފުނީގެ މުވައްޒަފަކާ ސިއްރު ލޯބީގެ ގުޅުމެއް ހިންގުމުން ވަޒީފާ އިން ވަކި ކޮށްފިއެވެ.

މަގާމުން ވަކި ކުރި އިރު އެ ވަޒީފާގައި އޭނާ ހޭދަ ކޮށްފައި ވަނީ އެންމެ އަހަރެއްހާ ދުވަހެވެ.

ކުންފުނިން ބުނީ ވަޒީފާ އިން ވަކި ކުރީ "ސީދާ އޭނާގެ ދަށުން މަސައްކަތްކުރާ" މުވައްޒަފަކާއެކު އޮތް "ލޯބީގެ ގުޅުން" ހާމަ ނުކުރުމުގެ ސަބަބުން ކަމަށެވެ.

ކިޓްކެޓް ޗޮކްލެޓް އާއި ނެސްޕްރެސޯ ކޮފީ ކެޕްސިއުލް އުފައްދާ ސުވިސް ކުންފުނިން ބުނެފައި ވަނީ ލޯރެން ފްރެކްސް ވަނީ "ވަގުތުން" ވަޒީފާ އިން ވަކިކޮށްފައި ކަމަށެވެ.

އޭނާ ވަކި ކުރީ ނެސްލޭގެ ޗެއަރމަނާއި ލީޑް އިންޑިޕެންޑެންޓް ޑިރެކްޓަރ ހިންގި ތަޙްޤީޤަކަށްފަހުގައެވެ.

ބީބީސީ އިން ރިޕޯޓު ކޮށްފައިވާ ގޮތުގައި މި ތަޙްޤީޤު ފެށުނީ ކުންފުނީގެ ވިސްލްބްލޯވިންގ ޗެނަލް މެދުވެރިކޮށް ހުށަހެޅުނު ރިޕޯޓަކާ ގުޅިގެންނެވެ.

ނެސްލޭގެ ޗެއަރ ޕޯލް ބުލްކް ވިދާޅުވީ: "މިއީ ކޮންމެހެން ނިންމަންޖެހުނު ނިންމުމެކެވެ. ނެސްލޭގެ އަގުހިފެހެއްޓުމާއި ހިންގުމުގެ އުސޫލުތަކަކީ ކުންފުނީގެ ވަރުގަދަ ބިންގަލެވެ. ލޯރަން ނެސްލޭ އަށް ކޮށްދެއްވި ޚިދުމަތަށް ޝުކުރު އަދާކުރަމެވެ."

ބީބީސީ އިން ބުނީ އެނގިފައިވާ ގޮތުގައި މި ގުޅުމަކީ އެގްޒެކެޓިވް ބޯޑުގައި ނުހިމެނޭ މުވައްޒަފަކާ އެކުގައި އޮތް ގުޅުމެކެވެ. އަދި މިއީ މަސްލަހަތު ފުށުއަރާ ކަމަކަށްވާތީ ތަޙްޤީޤު ހިންގީ ކަމުގައެވެ.

ފައިނޭންޝަލް ޓައިމްސް އިން ރިޕޯޓުކޮށްފައިވާ ގޮތުގައި މިއަހަރު ކުރީކޮޅު މިކަން ފެންމަތިވެ ފްރެކްސް އޭނާގެ ދަށުން މަސައްކަތް ކުރާ މުވައްޒަފަކާ ދެމެދު އޮތް ގުޅުމާ ބެހޭގޮތުން ކުންފުނީގެ މުވައްޒަފުން ކަންބޮޑުވުން ވަނީ ފާޅު ކޮށްފައެވެ. އެހެން ނަމަވެސް މި ކަންބޮޑުވުންތަކާ އެކު ހިންގި އިންޓަރނަލް ތަޙްޤީޤަކަށްފަހު، މި ތުހުމަތުތައް ސާބިތުނުވާ ކަމަށް ނިންމުނެވެ. ނަމަވެސް ޝަކުވާތައް އޭގެ ފަހުން ވެސް ދެމިގެން ދިޔުމާއެކު، ނެސްލޭ އިން ހިންގި އިތުރު ތަހުގީގަކުން ތުހުމަތުތައް ސާބިތުވިއެވެ.

ނެސްލޭގެ ސްޕޯކްސްޕަރސަން ބުނެފައިވަނީ: "ކުންފުނިން ހުރިހާ ވަގުތެއްގައިވެސް ޢަމަލުކުރީ އެންމެ ރަނގަޅު ކޯޕަރޭޓް ގަވަރނަންސް އުސޫލުތަކާ އެއްގޮތައް ކަމަށެވެ. އަދި ކުންފުނީގެ ނިންމުން ދައްކުވައިދެނީ، ކުރެވޭ ތުހުމަތުތަކާއި ތަޙްޤީޤުތަކަށް ސީރިއަސްކޮށް ރިޢާޔަތް ކުރާކަމެވެ."

ވަޒީފާ އިން ވަކި ކުރި ފްރެކްސް ވަނީ ނެސްލޭގައި 40 އަހަރާ ގާތްކުރާ މުއްދަތެއް ހޭދަކޮށްފައެވެ. ނަމަވެސް މާކް ޝްނައިޑަރގެ ބަދަލުގައި ގްލޯބަލް ސީއީއޯގެ މަޤާމަށް އޭނާ އައީ މިދިޔަ ސެޕްޓެމްބަރުގައެވެ. ނެސްލޭ އިން ކަށަވަރުކޮށްދީފައި ވަނީ ވަޒީފާ އިން ވަކި ކުރި އިރު އޭނާއަށް އެގްޒިޓް ޕެކޭޖެއް ނުލިބޭނެ ކަމަށެވެ.

2001 އިން ފެށިގެން ނެސްލޭގައި މަސައްކަތް ކުރާ ފިލިޕް ނަވްރަޓިލް ވަނީ ފްރެކްސްގެ ބަދަލުގައި ސީއީއޯ ގެ މަގާމަށް އައްޔަން ކޮށްފައެވެ.

ދުނިޔޭގެ މަޝްހޫރު އެހެން ބައެއް ކުންފުނިތަކުންވެސް ވަނީ އިންޓާނަލް ތަހުގީގުތަކަށް ފަހު ސީއީއޯ އިން ވަކިކޮށްފައެވެ.

އެ ގޮތުން ތިން އަހަރު ވަންދެން ތެޔޮ ޖަޔަންޓް ބީޕީ ކުންފުނި ހިންގި ސީއީއޯ ބަރނާޑް ލޫނީ ވަނީ އިންޓާރނަލް ތަހުގީގަކާ ގުޅިގެން އިސްތިއުފާ ދީފައެވެ.

މުވައްޒަފަކާ އޮތް ގުޅުމެއް ފަޅާ އެރުމުން ސްޓީވް އީސްޓަރބްރުކް ވަނީ 2019 ގައި މެކްޑޮނަލްޑްސް އިން ވަކިކޮށްފައެވެ.