މިދާ ރޭޓުގައި ދާނަމަ ރާއްޖޭގެ 20 އަތޮޅުގަ އާރްޓީއެލް ފެށޭއިރު އަތޮޅަކަށް އޮންނާނީ 1 ފެރީ: މެންބަރު ޒިޔާދު
މެންބަރު ވިދާޅުވީ އާރްޓީއެލް ފެރީގެ ނިޒާމަކީ ރައްޔިތުންނަށް އޭގެ ސަބަބުން ގިނަ ފައިދާތަކެއް ލިބިގެން ދިއަ، އަދި ރައްޔިތުން ނުހަނު ބަލައިގަތް ޚިދުމަތެއް ކަމަށެވެ. ނަމަވެސް މި ސަރުކާރުގެ ސިޔާސަތުތަކުގެ ސަބަބުން އެ ނިޒާމު ވެސް ފެއިލް ވެފައިވާ ކަމަށް ޒިޔާދު ވިދާޅުވި އެވެ. މިއަދު ރައްޔިތުންގެ އެންމެ ބޮޑު ޝަކުވާ އަކީ ފެރީތައް ކެންސަލް ވުމާ، ފެރީތައް ހުއްޓުމުގެ ޝަކުވާ ކަމަށް ވެސް މެންބަރު ވިދާޅުވި އެވެ.
އާރްޓީއެލް ފެރީ
ރާއްޖެ ޓްރާންސްޕޯޓް ލިން (އާރުޓީއެލް) ފެރީ ނިޒާމަށް މި ސަރުކާރުން އިހުމާލުވެފައި ވާ ކަމަށާ މިދާ ރޭޓުގައި ދާ ނަމަ 20 އަތޮޅަށް ފެރީގެ ނިޒާމު ތައާރަފު ކުރާއިރު އަތޮޅަކަށް އޮންނާނީ އެންމެ ފެރީ އެއް ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެ އެވެ.
ރާއްޖެޓީވީގެ 'ޓީވީޓޯކް' ޕްރޮގްރާމްގައި ވާހަކަ ދައްކަވަމުން މެންބަރު ވިދާޅުވީ އާރްޓީއެލް ފެރީގެ ނިޒާމަކީ ރައްޔިތުންނަށް އޭގެ ސަބަބުން ގިނަ ފައިދާތަކެއް ލިބިގެން ދިއަ، އަދި ރައްޔިތުން ނުހަނު ބަލައިގަތް ޚިދުމަތެއް ކަމަށެވެ. ނަމަވެސް މި ސަރުކާރުގެ ސިޔާސަތުތަކުގެ ސަބަބުން އެ ނިޒާމު ވެސް ފެއިލް ވެފައިވާ ކަމަށް ޒިޔާދު ވިދާޅުވި އެވެ.
މިއަދު ރައްޔިތުންގެ އެންމެ ބޮޑު ޝަކުވާ އަކީ ފެރީތައް ކެންސަލް ވުމާ، ފެރީތައް ހުއްޓުމުގެ ޝަކުވާ ކަމަށް ވެސް މެންބަރު ވިދާޅުވި އެވެ.
ހދ. އަތޮޅު މިއީ އެންމެ ރަނގަޅަށް ފެށި ހިސާބު. ވަރަށް ރަނގަޅަށް އޮޕަރޭޓް ކުރަމުން އައީ. އެހެން ނަމަވެސް މިހާރު ބައެއް ރޫޓްތައް ކެންސަލް ވަމުން ކެންސަލް ވަމުން ގޮސް މިހާރު އާރްޓީއެލް އަށް ބަރޯސާވުން ހުއްޓިއްޖެ. ދެން ވިދާޅުވީ އޭތި ފުޅާވީމަ ވާގޮތޭ. ރާއްޖޭގެ 20 އަތޮޅުގަ އާރްޓީއެލް ފެށޭއިރު އަޅުގަނޑަށް ހީވަނީ މިދާ ރޭޓުން ދަންޏާ އަތޮޅަކަށް 1 ފެރީ ހެން އޮންނާނީ. މިހާރު ހދ. އަތޮޅުން ނަގައިގެން ގޮސް ނ. އަތޮޅުގަ ފަށަނީ. ނ. އަތޮޅުން ނަގައިގެން ގޮސް ރ. އަތޮޅުގަ އެ ފަށަނީ. ހދ. މިއީ 5 ފެރީ 6 ފެރީ އިން ފެށިތަނެއް، މިހާރު އޮތީ 2 ފެރީ،ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު
ޒިޔާދު ވިދާޅުވީ ކޮންމެ އަތޮޅަކަށް ފެރީގެ ޚިދުމަތް ފަށަމުން ދަނީ އިތުރު ފެރީ ނުގެނަސް ކަމަށެވެ. އަދި އިތުރު ތިން ހަތަރު އަތޮޅަށް މި ނިޒާމު ފުޅާ ކުރުމަށް ސަރުކާރުން މަސައްކަތް ކުރަނީ އިތުރު ފެރީ ނުބަނދެ ކަމަށް ވެސް މެންބަރު ވިދާޅުވި އެވެ.
އެހެން ކަމުން ފެރީގެ ނިޒާމު ހަރުދަނާ އަތޮޅުތަކަށް ވެސް މިކަމުގެ ސަބަބުން މިހާރު އުނދަގޫތައް ކުރިމަތިވާ ކަމަށް ޒިޔާދު ވިދާޅުވި އެވެ.
ފެރީގެ ނިޒާމުން ރަށްތައް ގުޅާލީމަ ވަރަށް ބޮޑު ފައިދާ އެއް ރައްޔިތުންނަށް މި ވަނީ. އެއީ ކޮންމެ ދުވަހު އޮވޭ ޔަގީން ކަން. ހެނދުނު ދެވޭނެ ކަމުގެ. ޑޮކްޓަރަށް ދާ މީހުންނާ، ސްކޫލަށް ދާ މީހުންނާ ވިޔަފާރި ކުރަން ދާ މީހުންނަށް ވަރަށް ބޮޑު ފައިދާ އެއް ވޭ. އެކަމު އެ ހުއްޓާލާފަ މިހާރު ،ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު
މި ސަރުކާރުގެ ކަންނެތްކަމުން އާރްޓީއެލް ފެރީގެ ޚިދުމަތް ރަނގަޅަށް ގާއިމްނުކުރެވޭނެ ކަމަށް މާލެސިޓީގެ މޭޔަރު އާދަމް އާޒިމް ވެސް މިފަހުން ވަނީ ވިދާޅުވެފަ އެވެ. މިކަމާ ގުޅިގެން އާޒިމް ވިދާޅުވީ އާޒިމް ވިދާޅުވީ އާރްޓީއެލް ފެރީގެ ޚިދުމަތަކީ އަތޮޅުތެރޭގެ ރައްޔިތުންނަށް ވަރަށް ބޭނުންވާ ޚިދުމަތެއް ކަމަށާއި، މި ޚިދުމަތް ފުޅާކޮށް، ދެމެހެއްޓެނިވި ގޮތެއްގައި ގާއިމް ކުރަންޖެހޭ ކަމަށެވެ.
އާޒިމް ވިދާޅުވީ ރަނގަޅަށް ޚިދުމަތް ނުދެވުމުން ކުރީ ސަރުކާރު ކުށްވެރި ކުރި ނަމަވެސް މި ޚިދުމަތް މެއިންޓެއިން ކުރުމަކީ މިސަރުކާރުގެ ޒިންމާއެއް ކަމަށެވެ. ނަމަވެސް މެއިންޓެއިން ކުރުމަކީ ބޮޑު މަސައްކަތެއް ކަމަށާއި، މިމަސައްކަތް ކުރެވޭނީ ވަރަށް މުރާލި ވެގެން ކަމަށް އޭނާ ވިދާޅުވިއެވެ. އަދި ވިދާޅުވީ ކަންނެތް ސަރުކާރަކަށް މި ޚިދުމަތް ފުޅާކޮށް، މެއިންޓެއިން ނުކުރެވޭނެ ކަމަށެވެ.
އެމްޑީޕީގެ ސަރުކާރުގައި އާރްޓީއެލް ފެރީގެ ޕްރޮޖެކްޓް އެންމެ ލަސްވެގެން 2025 ވަނަ އަހަރު އެއްކޮށް ނިންމުމަށް ކަނޑައަޅާފައިވާ ކަމަށް ވެސް އާޒިމް ވަނީ ބުނެފަ އެވެ. ނަމަވެސް މިސަރުކާރުން މި ޕްރޮޖެކްޓް ނިންމުމަށް ކަނޑައަޅާފައިވަނީ 2028 ނުވަތަ 2029 ކަމަށެވެ.
އާރްޓީއެލް ޚިދުމަތް ފުޅާކުރުމަށް އިންޑިއާއިން ރާއްޖެ އަށް 100 މިލިއަން ރުފިޔާގެ އެހީގައި މިއަށްވުރެ އަވަހަށް ނިންމުމަށް މަސައްކަތް ކުރާނެ ކަމަށް އުންމީދުކުރާ ކަމަށް މޭޔަރު އާޒިމް ވިދާޅުވި އެވެ.
މީގެ ކުރީގެ ސަރުކާރުގައި ވަރަށް ރަނގަޅަށް ދެމުންއައި އާރްޓީއެލް ފެރީގެ ޚިދުމަތަށް މިސަރުކާރުން ވަރަށް ބޮޑަށް އިހުމާލުވެފައިވާ ކަމަށް ބައެއް އާއްމު ރައްޔިތުން ދަނީ ބުނަމުންނެވެ. ދަތުރު ކަނޑައަޅާ ޝެޑިއުލްއާ އެއްގޮތަށް ދަތުރުނުކުރާ ކަމުގެ ޝަކުވާއާއި، ހުކުރު ދުވަހު ދަތުރުތައް މެދުކަނޑާލާފައިވާތީ އެކަމުގެ ކަންބޮޑުވުން ވެސް އާއްމު ރައްޔިތުން ކޮށްފައިވެއެވެ. އަދި ހުކުރު ދުވަހު ދަތުރުތައް ނެތުމަކީ ހަފްތާ ބަންދުގައި ރަށްރަށަށް ދަތުރުކުރަން ބޭނުންވާ މީހުންނަށް ލިބޭ ވަރަށް ބޮޑު ގެއްލުމެއް ކަމަށް އެމީހުން ބުނެ އެވެ.
