އެމްޑީޕީ އެއްވުމެއްގައި މަންދީ ރައީސް މުއިއްޒުގެ ދަރިކަލުންގެ ކަރާމާތަށް އަރައިގަތް ކަމަށް ފެމިލީ ކޯޓުން ނިންމި ނިންމުން އެމްޑީޕީން ހައިކޯޓަށް އިސްތިއުނާފުކޮށްފި އެވެ. އެއީ ކޯޓުގެ ނިންމުމުގައި އެމްޑީޕީ ގާނޫނީ ޓީމުން ހުށަހެޅި ކަންކަމަށް ރިއާޔަތްކޮށްފައި ނުވާތީ އެވެ.
ރައީސްގެ ދަރިކަލުންނާއި ގުޅުވައި ދެއްކި ވާހަކައިގެ މައްސަލައިގައި މަންދި، ފައްޔާޒް އަދި އެމްޑީޕީއަށް ދައުވާކުރަން ހުށަހަޅާފައިވޭ
އެމްޑީޕީގެ އިސް އެކްޓްވިސްޓް މަރްޔަމް ޒުބައިރު (މަންދީ) ރައީސް ޑރ. މުހައްމަދު މުއިއްޒު ގެ ދަރިކަލުންގެ ކަރާމާތަށް އަރައިގަތް ކަމަށް ނިންމުމަށް ފަހު އެމްޑީޕީ ހިންގަން އޭރު ހުރި އިސް ފަރާތުގެ ހައިސިއްޔަތުން އެ ޕާޓީގެ އޭރުގެ ޗެއާރޕާސަން ފައްޔާޒް އިސްމާއީލް ޒިންމާވާން ޖެހޭނެ ކަމަށް ފެމިލީ ކޯޓުން ނިންމާފައިވާ ނިންމުން ހައިކޯޓު ގައި އިސްތިއުނާފު ކޮށްފި އެވެ.
މި މައްސަލަ އަކީ މިއީ މި އަހަރުގެ މާރޗް މަހުގެ 12، 13 އަދި 14 ވަނަ ދުވަހުގެ ރޭ އެމްޑީޕީން ބޭއްވި އެއްވުމުގައި މަންދީ ރާއްޖޭގައި ވޭޕް މަނާކުރީ ރައީސްގެ ދަރިކަލުން ވޭޕްކުރާތީ ކަމަށް ތުހުމަތުކޮށް ދެއްކި ވާހަކަތަކާއި ގުޅުން ހުރި މައްސަލަ އެކެވެ. ރައީސްގެ އަނބިކަނބަލުން ސާޖިދާ މުހައްމަދު ވަނީ މި މައްސަލަ ސިވިލް ކޯޓަށާއި ފެމިލީ ކޯޓަށް ހުށަހަޅާފަ އެވެ.
ރާއްޖެއެމްވީ އަށް އެނގިފައިވާ ގޮތުން މި މައްސަލަ އިސްތިއުނާފް ކޮށްފައި ވަނީ ނިމިދިޔަ ހަފްތާގެ ތެރޭގަ އެވެ. ނަމަވެސް މިހާތަނަށް އައި އިރު މައްސަލަ ބަލައިގަތްކަން އެމްޑީޕީގެ ޤާނޫނީ ޓީމަށް އަންގާފަ އެއް ނުވެ އެވެ. މި މައްސަލަ އިސްތިއުނާފު ކުރީ ފެމިލީ ކޯޓުން ނިންމި ނިންމުގައި އެމްޑީޕީ ޤާނޫނީ ޓީމުން ހުށަހެޅި ކަންކަމަށް ރިއާޔަތް ކޮށްފައި ނުވާތީ ކަމަށް އެމްޑީޕީގެ ޤާނޫނީ ޓީމުން ފާހަގަކުރެ އެވެ. އަދި މައްސަލައަކާއި މެދު ނިންމުމެއް ނިންމަން ވާނީ ދެ ކަންކަމަށް ބެލުމަށް ފަހުގައި ކަމަށް އެމްޑީޕީގެ ޤާނޫނީ ޓީމުން ޤަބޫލު ކުރެ އެވެ.
ފެމިލީ ކޯޓުން މި މައްސަލައިގައި ނިންމާފައި ވަނީ ރައީސްގެ ދަރިކަލުންނަށް ގާނޫނުއަސާސީ އާއި ރާއްޖެ ބައިވެރިވާ ބައިނަލްއަގުވާމީ މުއާހަދާތަކުން ލިބިދޭ ހައްގުތަކާއި ކަރާމާތާއި ރައްކާތެރިކަން ގެއްލިފައިވާ ކަމަށެވެ. އެހެންކަމުން އެކަމާއި އެމްޑީޕީގެ ޗެއާޕާސަންގެ ހައިސިއްޔަތުން ފައްޔާޒް ޒިންމާ ނަގަން ޖެހޭނެ ކަމަށް އެ ކޯޓު ގެ ނިންމުމުގައި ބުނެފައި ވެ އެވެ.
މި މައްސަލަ ކުރިއަށް ގެންދިޔައީ ވަކި ވަކިންނެވެ. އެއީ މަންދީގެ މައްޗަށް ކުރާ ދައުވާގެ މައްސަލަ އާއި ފައްޔާޒްގެ މައްޗަށް ކުރާ މައްސަލަ އެވެ. ފެމިލީ ކޯޓުން ވަނީ އެމްޑީޕީގެ އެއްވުމުގައި މަންދީގެ އިތުރުން އަހްމަދު ސަލީމް (މާޒް ސަލީމް) ދައްކާފައިވާ ވާހަކަތަކަކީ ރައީސް މުއިއްޒުގެ 18 އަހަރު ނުފުރޭ ދަރިފުޅާއި މެދު ދެއްކި ވާހަކަތަކެއް ކަން ކޯޓަށް ސާބިތުވާ ކަމަށެވެ. އެއީ އޭނާ ގެ ސަލާމަތަށް އޮތް ނުރައްކަލެއް ކަމަށް ވަނީ ބަޔާންކޮށްފަ އެވެ.
ސާޖިދާ އަށް މަންދީ، އެމްޑީޕީ އަދި ފައްޔާޒުގެ ފަރާތުން ގެއްލުމުގެ ބަދަލު ހޯދުމަށް ހައްގު އޮތް ކަމަށް ވެސް އެ ކޯޓުން ނިންމާފައިވެ އެވެ. ފެމިލީ ކޯޓުން ބުނީ އެ ވާހަކަތަކަށް ފައްޔާޒު ހިތްވަރުދީފައިވާކަން ކޯޓަށް ސާބިތުވާ ކަމަށެވެ.
އެމްޑީޕީ އިން މަގުމަތީގައި ބޭއްވި މުޒާހަރާ އެއްގައި މަރިޔަމް ޒުބެއިރު (މަންދީ) ދެއްކި ވާހަކަ ތަކުން ރައީސް މުހައްމަދު މުއިއްޒު އާއި ސާޖިދާ މުހައްމަދުގެ ދަރިކަލުން އުމެއިރު މުހައްމަދުގެ އަބުރު ގެއްލުނު ކަން ސާބިތުވާ ކަމަށް މި އަހަރުގެ ޖުލައި މަހު ސިވިލް ކޯޓުން ވެސް ވަނީ ޙުކުމްކޮށްފަ އެވެ.
ސިވިލް ކޯޓުގެ ހުކުމުގައި އިތުރަށް ބުނެފައި ވަނީ އެ ވާހަކަ ތަކަށް އެމްޑީޕީ ގެ ޗެއަރޕާސަން ފައްޔާޒު އިސްމާއީލް އާއި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ޒިންމާ ނަގަން ޖެހޭ ތަނެއް ނެތް ކަމަށެވެ. ނަމަވެސް
މި މައްސަލަ ހުށަހެޅުމާ ގުޅިގެން އެމްޑީޕީ އިން ބުނެފައި ވަނީ މި ދައުވާތަކަކީ ރައީސުލްޖުމްހޫރިއްޔާގެ ހުދުމުހުތާރުކަމާ ދެކޮޅަށް އަޑު އުފުލަމުންދާ ފަރާތްތަކުގެ އަޑު ކަނޑުވާލައި، ސިޔާސީ ޕާޓީތަކަށާއި، ސިޔާސީ މީހުންނަށް ބިރު ދެއްކުމަށް ރައީސް ޑރ. މުހައްމަދު މުއިއްޒުގެ އެންގެވުމަށް އެމަނިކުފާނުގެ އަނބިކަނބަލުން ސާޖިދާ މުހައްމަދު ކުރައްވާ ދައުވާތަކެއް ކަމަށް އެމްޑީޕީ އިން ދެކޭ ކަމަށެވެ.
އެ ޕާޓީން ސަރުކާރާ ދެކޮޅަށް ކުރި މުޒާހަރާއެއްގައި އެއްވެސް ކުޑަކުއްޖެއްގެ ނަމެއް ހާމަކޮށްފައި ނުވާނެ ކަމަށް އެމްޑީޕީން ބުނެފައި ވެ އެވެ. ވަކިން ހާއްސަކޮށް، ދައުވާ އުފުލާފައިވާ އެ ޕާޓީގެ މެންބަރު މަންދީގެ ވާހަކައިގައި ވެސް އެއްވެސް ކުއްޖެއްގެ ނަމެއް ގެނެސްފައި ނުވާކަން އެ މުޒާހަރާގެ ރިކޯޑިންތަކުން ސާފުކޮށް އެނގޭނެ ކަމަށް ވެސް ވަނީ ބުނެފަ އެވެ.
