ރޮހިންޖާ މުސްލިމުންނަށް އެހީތެރިވުމަށް ސަރުކާރުން ހާއްސަ ކޮމިޓީއެއް އެކުލަވާލައިފި އެވެ.
މިކޮމެޓީއާއި ގުޅޭ ގޮތުން ޑިފެންސް މިނިސްޓަރ އާދަމް ޝަރީފު އުމަރު ވިދާޅުވީ، ރޮހިންޖާގެ މުސްލިމުންނަށް އެހީތެރިކަން ފޯރު ކޮށްދިނުމަށް ސަރުކާރުން ގައުމީ ރޫހެއްގައި މަސައްކަތް ފަށާފައިވަނީ ރައީސުލްޖުމްހޫރިއްޔާގެ އިސްނެންގެވުމުގެ ދަށުން ކަމަށެވެ. އެގޮތުން ވަކިވަކިން ކުރިއަށްގެންދާ ހަރަކާތްތަކަށް ވެސް ކޮމިޓީ މެދުވެރިކޮށް އެހީތެރިކަން ފޯރުކޮށްދިނުމަށް ހަމަޖެހިފައިވާ ކަމަށް އޭނާ ވިދާޅުވި އެވެ.
ފައިސާ އެއްކުރުމުގެ މަސައްކަތް ކުރަމުންދާ އިރު ރޮހިންޖާގެ ރައްޔިތުންނަށް ބޭނުންވާ އެހީތެރިކަން ފޯރުކޮށްދިނުމަށް އެންމެ ރަގަޅު ގޮތެއް ބެލުމަށްޓަކައި ފޮރިން މިނިސްޓްރީ އާއެކު މަޝްވަރާ ކުރުމަށް ހަމަޖެހިފައިވާ ކަމަށް އޭނާ ވިދާޅުވި އެވެ.
މީގެ އިތުރުން މީޑިއާތައް ގުޅިގެން ޓެލެތޯނެއް ކުރިއަށް ގެންދިއުމަށް ވެސް ވަނީ ނިންމާފަ އެވެ. ޓެލެތޯން ކުރިއަށްގެންދިއުމަށް ހަމަޖެހިފައި ވަނީ މިމަހުގެ 21 އިން 23 އަށެވެ. ރޮހިންޖާ މުސްލިމުންނަށް އެހީތެރިކަން ފޯރުކޮށްދިނުމަށް ބޭންކް އޮފް މޯލްޑިވްސް އާއި އިސްލާމިކް ބޭންކާ ގުޅިގެން ފައިސާ ޖަމާ ކުރުމަށްޓަކައި ހާއްސަ އެކައުންޓެއް އެކުލަވާލުމަށް ހަމަޖެހިފައިވާ ކަމަށް އާދަމް ޝަރީފު ވިދާޅުވި އެވެ.
"މި މަސައްކަތްތައް ކުރިއަށްގެންދިއުމުގައި ވީހާވެސް ބޮޑަށް ޓްރާންސްޕޭރެންޓްކޮށް މަސައްކަތް ކުރާނަން. ދިވެހި ރައްޔިތުންގެ ކިބައިން އެންމެ ބޮޑަށް އެދެނީ، ރައްޔިތުންނަށް ތަނަވަސްކަން ހުރި މިންވަރަކުން އެހީތެރިކަން ފޯރުކޮށްދިނުން. މިފަހަރުގެ އަމާޒަކީ ފައިސާގެ އެހީތެރިކަން ފޯރުކޮށްދިނުން،" އާދަމް ޝަރީފު އުމަރު ވިދާޅުވި އެވެ.
މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އިސްލާމިކް މިނިސްޓަރ ޑރ އަހުމަދު ޒިޔާދު ބާގިރު ވިދާޅުވީ މުސްލިމު އުންމަތުގެ ބަޔަކަށް އެހީތެރިކަން ފޯރު ކޮށްދިނުމަށްޓަކާ އެންމެން ގުޅިގެން މަސައްކަތް ކުރުމަކީ ވަރަށް މުހިއްމު ކަމެއްކަން ފާހަގަކޮށްފަ އެވެ. އަދި ދިވެހިންނަކީ މިފަދަ ހާލަތްތަކުގައި އަބަދުވެސް އެހީތެރިކަން ވަރަށް ފުރިހަމައަށް ފޯރުކޮށްދޭ ބައެއްކަން ފާހަގަ ކުރެއްވި އެވެ.
"ޖަމިއްޔާ ތަކުން ވެސް އަމިއްލަ ފަރާތްތަކުން ވެސް، އަޅުގަނޑުމެންނާއި ގުޅައިގެން ރަޖިސްޓްރީކޮށްގެން ކަންކަން ކުރިއަށްގެންދިޔުން ވަރަށް މުހިއްމު. ނުވަތަ ހިލޭ ގުޅޭ ނަންބަރު 1440 އަށް ގުޅައިގެން ވެސް އެ މައުލޫމާތުތައް ހިއްސާކުރަމުންދާންވީ،" ޑރ ޒިޔާދު ވިދާޅުވި އެވެ.