ސަރުކާރު ސްކޫލު ތަކުގެ ޔުނިފޯމުގެ ކުލަތައް 4 ކުލައަކަށް ބަދަލު ކުރަން އެޑިއުކޭޝަނުން ނިންމާފައިވާ ކަން ހާމަވެއްޖެ
ގަމީސް ހުންނަން ޖެހޭނީ ހުދު، ސްކައި ބްލޫ، ޓީ ގްރީން އަދި ލައިޓް ރެޑް ކުލަތަކުގެ ތެރެއިން އެއް ކުލައެއްގައި ކަމަށް
ތާޖުއްދީން ސްކޫލް
ސަރުކާރު ސްކޫލުތަކުގެ ޔުނީފޯމުގެ ކުލަތައް 4 ކުލައަކަށް ބަދަލު ކުރަން އެޑިއުކޭޝަން މިނިސްޓްރީ އިން ނިންމާފައިވާ ކަން ހާމަވެއްޖެ އެވެ.
ސަރުކާރު ސްކޫލުތަކުގެ ދަރިވަރުންގެ ޔުނިފޯމު އުސޫލަށް ބަދަލު ގެނައުމަށް އެޑިއުކޭޝަން މިނިސްޓްރީ އިން ނިންމާފައިވާ ކަން ދެ ސްކޫލަކުން ވަނީ ރާއްޖެއެމްވީ އަށް ކަށަވަރު ކޮށްދީފަ އެވެ.
އެގޮތުން ނަން ހާމަ ނުކުރުމަށް ޝަރުތު ކޮށް ރާއްޖެއެމްވީ އަށް މި މައުލޫމާތު ހިއްސާ ކުރި މީހުން ވަނީ އެޑިއުކޭޝަނުގެ މި ނިންމުން ތަންފީޒު ކުރުމަށް ނިންމާފައިވާ ގޮތުގެ ތަފްސީލު ވެސް ކިޔާދީފަ އެވެ.
އެގޮތުން އެޑިއުކޭޝަނުން ސްކޫލުތަކުގެ ޕްރިންސިޕަލުންނާ ބައްދަލު ކޮށް، އިޚުތިޔާރު ތަކެއް ދީފައިވާ ކަން ވެސް ވަނީ ހާމަވެފަ އެވެ. އެޑިއުކޭޝަނުން ބުނެފައި ވަނީ ސްކޫލުތަކުގައި ބޭނުންކުރާ ޔުނިފޯމުތަކުގެ މަތި (ޓޮޕް) ހުންނަންވާނީ އެ މިނިސްޓްރީ އިން ކަނޑައަޅާ 4 ކުލައިގެ ތެރެއިން އެ ސްކޫލަކުން ކަނޑައަޅާ ކޮންމެވެސް އެއް ކުލައެއްގައި ކަމަށެވެ.
އެ ހަތަރު ކުލަ އަކީ ހުދު، ސްކައި ބްލޫ، ޓީ ގްރީން އަދި ލައިޓް ރެޑް އެވެ.
އޭގެ އިތުރުން ސްކޫލް ތަކުގައި ބޭނުންކުރާ ޔުނިފޯމުތަކުގެ ތިރި (ފަޓްލޫން/ސްކަރޓް/ސޯޓު) ހުންނަން ވާނީ މިިނިސްޓްރީ އިން ކަނޑައަޅާ 2 ކުލައިގެ ތެރެއިން އެ ސްކޫލަކުން ކަނޑައަޅާ ކޮންމެ ވެސް އެއް ކުލައެއް ގައި ކަމަށް އެޑިއުކޭޝަނުން ވަނީ ސްކޫލުތަކަށް އަންގާފަ އެވެ.
އެ ދެ ކުލައަކީ ކަޅު ކުލަ އާއި ނޭވީ ބްލޫ ކުލަ އެވެ.
މިނިސްޓްރީ އިން އަންގާފައި ވަނީ ފިރިހެން އަދި އަންހެން ދަރިވަރުންގެ ރަސްމީ ޔުނިފޯމް އަކީ އަތް ކުރު ނުވަތަ އަތް ދިގު ގަމީސް ކަމަށެވެ.
ފައުންޑޭޝަން އަދި ކީ ސްޓޭޖް 1 ގެ ފިރިހެން ދަރިވަރުން ރަސްމީ ޔުނިފޯމާއެކު ބޭނުން ކުރާނީ ސޯޓު ނުވަތަ ފަޓުލޫނު ކަމަށް ވެސް އެޑިއުކޭޝަނުން ވަނީ ނިންމާފަ އެވެ. އަދި އެ އުމުރުފުރާގެ އަންހެން ދަރިވަރުން ރަސްމީ ޔުނިފޯމާއެކު ބޭނުން ކުރާނީ ސްކަރޓް ނުވަތަ ފަޓުލޫނު ކަމަށާ ސްކަރޓް އާއެކު ހަރުވާޅު ބޭނުން ކުރެވޭނެ ކަމަށް ވެސް އެޑިއުކޭޝަނުން ނިންމާފައި ވެއެވެ.
ކީ ސްޓޭޖް 2، 3، 4 އަދި 5 ގެ ފިރިހެން ދަރިވަރުން ރަސްމީ ޔުނިފޯމާއެކު ބޭނުން ކުރަން ޖެހޭނީ ފަޓްލޫނެވެ. މި ކީ ސްޓޭޖްގެ އަންހެން ދަރިވަރުން ރަސްމީ ޔުނިފޯމާއެކު ލާންޖެހެނީ ފަޓްލޫން އެވެ. ދަރިވަރުން ބޭނުން ނަމަ ރަސްމީ ޔުނިފޯމާއެކު ސްކަރޓް ލެވޭނެ ކަމަށް އެޑިއުކޭޝަނުން ބުނެ އެވެ.
ރާއްޖެއެމްވީ އަށް މައުލޫމާތު ހިއްސާ ކުރި މީހުން ބުނީ އެޑިއުކޭޝަނުން މިކަން ނިންމާ ސްކޫލުތަކުގެ ޕްރިންސިޕަލުން ނަށް އަންގާފައިވާ ކަމަށެވެ. އަދި މިކަން ރަސްމީ ކޮށް އިއުލާނު ކުރަން ނިންމި ތާރީޚަކީ މި މަހުގެ 26 ވަނަ ދުވަސް ކަމަށެވެ. އެ ތާރީޚު ފަހަނައަޅާ ދިޔައިރު ވެސް އެކަން އިއުލާނު ނުކުރީ ކީއްވެ ކަން ނޭނގޭ ކަމަށް އެ މީހުން ބުންޏެވެ.
އޭގެ އިތުރުން މިކަމާ ގުޅިގެން ސްކޫލުތަކުން ޕްރޮމޯޝަނަލް ވީޑިއޯތައް ވެސް ހެދުމަށް އަންގާފައިވާ ކަމަށާ ބައެއް ސްކޫލުތަކުން އެކަން ކޮށް ނިންމާފައިވާ ކަމަށް ވެސް މައުލޫމާތު ހާމަ ކުރި މީހުން ވަނީ ބުނެފަ އެވެ.
މިކަމާ ގުޅިގެން ރާއްޖެއެމްވީ އިން އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އަށް ގުޅުމުން ވިދާޅުވީ އެކަހަލަ ނިންމުމެއް ނިންމާފައި ނުވާނެ ކަމަށާ، ސްކޫލު ތަކަށް އެއްވެސް އެންގުމެއް ވެސް އަންގާފައި ނުވާނެ ކަމަށެވެ. ނަމަވެސް ޔުނިފޯމު ބަދަލު ކުރުމަށް ޕްރިންސިޕަލުންނާއެކު މަޝްވަރާ ކޮށްފައިވާ ކަމަށާ މިހާރު ވެސް މަޝްވަރާ ކުރިއަށް ދާ ކަމަށް މިނިސްޓަރު ވިދާޅުވި އެވެ.
