ތައިލެންޑް އާއި ކެމްބޯޑިއާ ދެމެދު ހަނގުރާމަ ހިނގާތާ 3 ދުވަސް

ތައިލެންޑާއި ކެމްބޯޑިއާ އާ ދެމެދު ހިނގަމުންދާ ހަނގުރާމަ ތިންވަނަ ދުވަހަށް ދިގުދެމިގެން ހިނގައްޖެއެވެ. ބޯޑަރު ހުރަސްކޮށް ބޮން އަޅައި، ވައިގެ ހަމަލާތައް ދިނުމުގެ ސަބަބުން ފަސްލައްކަ އަށް ވުރެ ގިނަ އާންމުން އެމީހުންގެ ގޭދޮރު ދޫކޮށް، ހިމާޔަތް ހޯދުމަށް އެހެން ސަރަހައްދުތަކަށް ހިޖުރަކޮށްފައިވާ ކަމަށް ރަސްމީ އިދާރާތަކުން ބުނެފައިވެ އެވެ.

ދެކުނު އިރުމަތީ އޭޝިއާ ގައި އޮންނަ މި ދެ ގައުމުގެ އޮފިޝަލުން ބުދަ ދުވަހު ބުނެފައި ވަނީ، މި ހަފްތާގައި މިހާތަނަށް މަދުވެގެން 13 ސިފައިންނާއި އާންމުން މަރުވެ، ބޯޑަރުގެ ދެފަރާތުން 500,000 އަށް ވުރެ ގިނަ މީހުން ރައްކާތެރިކަމަށްޓަކައި ހިޖުރަކުރަން ޖެހުނު ކަމަށެވެ. ދެ ފަރާތުން ވެސް ބުނަނީ ހަމަލާތައް އަލުން ފެށީ އަނެއް ފަރާތުން ކަމުގައެވެ.

ތައިލެންޑްގެ އަސްކަރިއްޔާ އިން ބުނި ގޮތުގައި، ބުދަ ދުވަހުގެ ހެނދުނު ކެމްބޯޑިއާ އިން ފޮނުވާލި ރޮކެޓުތަކެއް ސުރިން ގައި ހުންނަ ފެނޮމް ޑޮންގް ރަކް ހޮސްޕިޓަލް ކައިރިއަށް ވެއްޓި، އެ ހޮސްޕިޓަލުގެ ބަލިމީހުންނާއި މުވައްޒަފުން ބަންކަރެއްގެ ތެރޭގައި ހިމާޔަތް ހޯދަން ޖެހުނެވެ.

ކެމްބޯޑިއާ ގައި، "ފަސް ޕްރޮވިންސެއްގެ 101,229 ރައްޔިތުން ރައްކާތެރި ހިޔާތަކަށާއި ގާތްތިމާގެ މީހުންގެ ގޭގެއަށް ބަދަލުކޮށްފައިވާ" ކަމަށް ކެމްބޯޑިއާގެ ގައުމީ ދިފާއީ ވުޒާރާގެ ތަރުޖަމާނު ވިދާޅުވިއެވެ.

ކެމްބޯޑިއަން މީޑިއާ ބްރޯޑްކާސްޓިންގ ކޯޕަރޭޝަން އިން ހިންގާ ވެބްސައިޓެއް ކަމަށްވާ ކެމްބޯޑިއަނެސް އިން ރިޕޯޓުކޮށްފައިވާ ގޮތުގައި، ތައިލެންޑްގެ އެފް-16 ޖެޓުތަކުން އެ ގައުމުގެ ދެ ސަރަހައްދަކަށް ހަމަލާދީފައިވާއިރު، ތައިލެންޑްގެ ބޮންއެޅުން އެހެން އިތުރު ތިން ސަރަހައްދުގައި ކުރިއަށް ގޮސްފައިވެއެވެ.

ތައިލެންޑްގެ މެޓިޗޮން އޮންލައިން ނިއުސް ޕޯޓަލުން ވެސް ރިޕޯޓުކޮށްފައިވަނީ، އެ ގައުމުގެ އަސްކަރިއްޔާއިން ބުދަ ދުވަހުގެ ހެނދުނު ބޯޑަރު ކައިރީގައި ވާ "ކެމްބޯޑިއާ ގެ އަސްކަރީ މަރުކަޒަކަށް" ހަމަލާދިނުމަށް އެފް-16 ބޭނުންކޮށްފައިވާ ކަމަށެވެ.

ތައިލެންޑްގެ "ދަ ނޭޝަން" ނޫހުން އަސްކަރީ މަސްދަރުތަކާ ހަވާލާދީ ރިޕޯޓުކޮށްފައިވާ ގޮތުގައި، ކެމްބޯޑިއާގެ ރޮކެޓުތަކާއި އާޓިލަރީ ހަމަލާތައް ވަނީ ހެނދުނު ވަގުތުގައި ތައިލެންޑްގެ ހަތަރު ޕްރޮވިންސެއްގެ 12 ފްރަންޓްލައިން ސަރަހައްދަކަށް އަމާޒުކޮށްފައެވެ. މި ހަމަލާތަކުން ލިބުނު ގެއްލުންތަކުގެ ވަގުތީ އެއްވެސް ރިޕޯޓެއް އަދި ލިބިފައެއް ނުވެއެވެ.

ތައިލެންޑްގެ ސުރިން ޕްރޮވިންސުން ރިޕޯޓު ކުރަމުންދާ އަލްޖަޒީރާގެ ރޮބް މެކްބްރައިޑް ބުނެފައިވަނީ، ބުދަ ދުވަހުގެ ކުރީކޮޅު ތައިލެންޑްގެ އަސްކަރިއްޔާ އިން ރިޕޯޓުކޮށްފައިވާ ގޮތުގައި، ކެމްބޯޑިއާ އާ ބޯޑަރު ހިއްސާ ކުރާ ހުރިހާ ޕްރޮވިންސެއްގައި ހަނގުރާމަ ހިނގާފައިވާ ކަމަށެވެ.