މަސްރަހު ހޫނުވެ، ތައިލެންޑުން ކެމްބޯޑިއާ އަށް ވައިގެ ހަމަލާތަކެއް ދީފި

ހަމަނުޖެހުންތައް އަލުން ހޫނުވެ، ތައިލެންޑުން ކެމްބޯޑިއާ އަށް ވައިގެ ހަމަލާތަކެއް ދީފިއެވެ.

އެމެރިކާގެ ރައީސް ޑޮނަލްޑް ޓްރަންޕް މެދުވެރިވެގެން ވެފައިވާ ހަނގުރާމަ ހުއްޓާލުމުގެ އެއްބަސްވުމާ ދެ ގައުމުން ވެސް ޚިލާފުވެފައިވާ ކަމަށް އެއް ގައުމުން އަނެއް ގައުމަށް ތުހުމަތު ކޮށްފައިވަނިކޮށް، ތައި ސިފައިން ހޯމަ ދުވަހު ބުނީ ކެމްބޯޑިއާ ގެ ބޯޑަރު ސަރަހައްދުތަކަށް ވައިގެ ހަމަލާތަކެއް ދީފައިވާ ކަމަށެވެ.

ތައިލެންޑުގެ ބޮޑުވަޒީރު އަނޫތިން ޗާންވީރަކުލް ވިދާޅުވެފައިވަނީ ތައިލެންޑުން "ހަމަލާދޭން ބޭނުންނުވާ" ކަމަށާއި، ނަމަވެސް އެ ގައުމުގެ ސިޔާދަތު ރައްކާތެރިކުރުމަށްޓަކައި "ބޭނުންވާ އެންމެހާ ފިޔަވަޅުތައް އަޅާނެ" ކަމަށެވެ.

މޭ މަހު ފެށުނުފަހުން، މި ދެގައުމުގެ ގުޅުން ގޯސްވެ، ހަމަނުޖެހުންތައް އިތުރުވެ އެތައް ބަޔަކު މަރުވެފައިވެއެވެ. މީގެ އިތުރުން ދެ ގައުމުން މުދާ އެތެރެކުރުން މަނާކުރުމާއި، ދަތުރުފަތުރު ކުރުމަށްވެސް ހުރަސްތައް ވަނީ ކުރިމަތިވެފައެވެ.

ހޯމަދުވަހު، ތައިލެންޑުގެ އަސްކަރިއްޔާއިން ބުނެފައިވަނީ، ތައިލެންޑުގެ އުބޮން ރަތްޗަތާނީ ޕްރޮވިންސަށް ކެމްބޯޑިއާ އިން ދިން ހަމަލާތަކަށް ތައި ސިފައިން ރައްދު ދީފައިވާ ކަމަށާއި، މިގޮތުން އެ ސަރަހައްދުގައި ވައިގެ ހަމަލާތައް ވެސް ދީފައިވާ ކަމަށެވެ. ނަމަވެސް، ނޮމްޕެން ގެ ދިފާއީ ވުޒާރާ އިން ބުނެފައިވަނީ، ކެމްބޯޑިއާ ގެ ޕްރެއާ ވިއޭރާ ޕްރޮވިންސަށް ފުރަތަމަ ހަމަލާ ދީފައިވަނީ ތައިލެންޑު ގެ ސިފައިން ކަމަށެވެ.

ދެފަރާތުގެ އޮފިޝަލުން ހާމަކުރި ގޮތުގައި، ހޯމަ ދުވަހުގެ ހަމަނުޖެހުންތަކުގެ ސަބަބުން މަދުވެގެން ތައިލެންޑުގެ ސިފައިންގެ މީހަކާއި، ކެމްބޯޑިއާގެ ހަތަރު އާއްމު ރައްޔިތުން މަރުވެފައިވެއެވެ. އަދި ގާތްގަނޑަކަށް 12 މީހުންނަށް ވަނީ އެކިވަރުގެ އަނިޔާ ލިބިފައެވެ.

ތައިލެންޑުން ނެރުނު ބަޔާނުގައި ބުނެފައި ވަނީ، "ތައިލެންޑުން މިހާރު ވަނީ (ކެމްބޯޑިއާގެ) އެތައް ސަރަހައްދެއް ގައި ހުރި އަސްކަރީ މައިގަނޑު ތަންތަނަށް ހަމަލާދިނުމަށް ވައިގެ ބާރު ބޭނުންކުރަން ފަށާފައި،" ކަމަށެވެ.

ކެމްބޯޑިއާ ގެ ދިފާއީ ވުޒާރާ އިން ނެރުނު ބަޔާނެއް ގައި ބުނެފައި ވަނީ، ގަސްތުގައި ހަމަނުޖެހުން އުފެއްދުމުގެ އަމަލުތައް ދުވަސްތަކެއް ވަންދެން ހިންގުމަށްފަހު، ތައި އަސްކަރިއްޔާ އިން އެގައުމުގެ ސިފައިން ތިބި ދެ ސަރަހައްދަކަށް ހަމަލާދީފައިވާ ކަމަށާއި، ނަމަވެސް ކެމްބޯޑިއާ ސިފައިން އަދި ރައްދު ހަމަލާއެއް ދީފައި ނުވާ ކަމަށެވެ.

ތައިލެންޑުގެ ސިފައިން ބުނީ، ކެމްބޯޑިއާގެ އަސްކަރިއްޔާ އިން ތައިލެންޑުގެ އާންމުން ދިރިއުޅޭ ސަރަހައްދުތަކަށް ރޮކެޓް ހަމަލާ ދީފައިވާ ކަމަށާއި، ނަމަވެސް އެ ހަމަލާތަކުގައި އެއްވެސް މީހަކަށް ގެއްލުމެއް ލިބިފައިވާކަމުގެ ރިޕޯޓެއް ލިބިފައި ނުވާ ކަމަށެވެ.

ސަރަހައްދީ މި ހަމަނުޖެހުން ޖުލައި މަހު ފަސް ދުވަހުގެ ހަނގުރާމައަކަށް ބަދަލުވިއެވެ. އެއަށްފަހު މެލޭޝިއާ ގެ ބޮޑުވަޒީރު އަންވަރު އިބްރާހީމް އާއި ޓްރަމްޕް މެދުވެރިވެގެން ހަނގުރާމަ ހުއްޓާލުމުގެ އެއްބަސްވުމެއް ވެފައިވެއެވެ. އަދި އޮކްޓޫބަރު މަހު ކުއާލަލަމްޕޫރު ގައި ދެ ގައުމުގެ މެދުގައި ސުލްހައިގެ އެއްބަސްވުމެއް ގައި ސޮއިކޮށްފައި ވެސް ވެއެވެ.

ޖުލައި މަހު ހިނގި ހަމަނުޖެހުންތަކުގައި މަދުވެގެން 48 މީހުން މަރުވެ، ގާތްގަނޑަކަށް 300,000 މީހުން ހާލުގައި ޖެހި، ދެގައުމުގެ ދެމެދުގައި ރޮކެޓް އާއި ބަރުހަތިޔާރުން ހަމަލާ ބަދަލުކޮށްފައިވެއެވެ.