ރައްޔިތުންގެ މަޖިލީހުގެ 30 އިންސައްތަ ގޮނޑި 35 އަހަރުން ދަށުގެ ޒުވާނުންނަށް ހާއްސަކުރުމަށް ގާނޫނުއަސާސީ އަށް އިސްލާހު ގެނައުމުގެ ބިލެއް ރައްޔިތުންގެ މަޖިލީހަށް ހުށަހަޅައިފި އެވެ.

މި ބިލު ހުށަހަޅުއްވާފައިވަނީ ގަލޮޅު ދެކުނު ދާއިރާގެ މެންބަރު މީކާއިލް އަޙްމަދު ނަސީމެވެ. މި އިސްލާހާ ގުޅޭ ގޮތުން އެކްސްގައި ކުރެއްވި ޕޯސްޓެއްގައި މީކާއިލް ވިދާޅުވީ ރާއްޖޭގެ އާބާދީގެ 45 ޕަސެންޓަކީ ޒުވާނުން ކަމުގައިވީ ނަމަވެސް ވިހިވަނަ މަޖިލީހުގައި ޒުވާނުން ކަމަށް ބަލާ އުމުރުފުރާގައި ހިމެނެނީ އެންމެ 11 ޕަސެންޓު މެންބަރުން ކަމަށެވެ. އެހެންކަމުން ޒުވާނުންގެ ބައިވެރިވުން މަޖިލީހުގައި އިތުރު ކުރުމަށް މަޖިލީހުގެ 30 އިންސައްތަ ގޮނޑި ޒުވާނުންނަށް ހާއްސަ ކުރުމަށް ހުށަހަޅައިފި ކަމުގަ އެވެ.

ބިލު ހުށަހެޅި ސަބަބުތައް ބަޔާން ކުރައްވަމުން މީކާއިލް ފާހަގަ ކުރެއްވީ ދިވެހިރާއްޖޭގެ އާބާދީގެ އެންމެބޮޑު ބައެއް ހިއްސާކުރާ އެއްބަޔަކީ ޒުވާނުންކަމަށްވީ ނަމަވެސް، ސިޔާސަތު އެކުލަވައިލުމާއި ގައުމުގެ މުހިންމު ނިންމުންތައް ނިންމުމުގައި ޒުވާނުންގެ ސީދާ ބައިވެރިވުން ވަރަށް ކުޑަ ކަމަށެވެ.

މި ބިލު ހުށަހެޅުމުގެ މައިގަނޑު މަގުސަދަކީ، ގައުމުގެ ކަންކަމުގައި އެންމެ އިސް ސަފުގައި ބަސްބުނުމުގެ ހައްޤު އެންމެ ފުޅާ ދާއިރާއެއްގައި ހޯދުމުގެ ފުރުސަތު ދައުލަތުން ޒުވާނުންނަށް ތަނަވަސް ކޮށްދިނުމެވެ. މީގެ އިތުރުން، ޒަމާނަށް އަންނަމުންދާ އަވަސް ބަދަލުތަކާއި ޓެކްނޮލޮޖީ އާއި މުއާސަލާތުގެ ވަސީލަތްތަކާއި ދުނިޔޭގެ ކަންކަމަށް ފުރިހަމައަށް ލޯ ހުޅުވިފައިވާ ބަޔަކީ ޒުވާނުންކަމަށް ވާތީ، މުސްތަގުބަލުގައި ގައުމު ކުރިއަށް ގެންދާނެ ޒުވާނުންނާ ގައުމުގެ މުހިންމު ކަންކަން ހަވާލުކުރުމުގެ މަރުހަލާތައް ނިޒާމީ ގޮތެއްގައި ފެށުން، މި ބިލު ހުށަހެޅުމުގެ މަގުސަދުތަކުގެ ތެރޭގައި ހިމެނޭ ކަމަށް މީކާއިލް ފާހަގަކުރެއްވި އެވެ.

މި ބިލުގެ ދަށުން ގާނޫނުއަސާސީއަށް ގެންނަން ހުށަހަޅާފައިވާ އިސްލާހުގައި ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 72 ވަނަ މާއްދާގެ (ނ) ގެ ފަހަތައް އަކުރެއް އިތުރުކުރުމަށް ހުށަހަޅާފައިވެ އެވެ.

އިސްލާހުގައިވާ ގޮތުން ރައްޔިތުންގެ މަޖިލީހަށް މެންބަރުން އިންތިޚާބުކުރާއިރު، މެންބަރުންގެ ޢަދަދު ކަމަށް ކަނޑައަޅާ ޖުމްލަ އަދަދުގެ ތިރީސް އިންސައްތަ ދާއިރާއަކީ، އުމުރުން ތިރީސްފަސްއަހަރު ނުފުރޭ މީހުންނަށް ހާއްސަ ދާއިރާތަކެއްގެ ގޮތުގައި އެކަށައަޅާންވާނެ އެވެ. އަދި ރައްޔިތުންގެ މަޖިލީހުގައި ހިމެނޭ އިންތިޚާބީ ދާއިރާތަކުގެ ތެރެއިން، އުމުރުން ތިރީސްފަސްއަހަރު ނުފުރޭ މީހުންނަށް ހާއްސަކުރާ ދާއިރާތައް ކަނޑައަޅާނޭ ގޮތް ޤާނޫނަކުން ބަޔާންކުރާންވާނެ އެވެ.

މި ޤާނޫނަށް ޢަމަލުކުރަން ފަށާނީ، މި ޤާނޫނު ފާސްވެ، ތަޞްދީޤުކޮށް، ދިވެހިސަރުކާރުގެ ގެޒެޓުގައި ޝާއިޢުކުރާ ދުވަހުން ފެށިގެން ކަމަށް ބިލުގައި ބަޔާން ކޮށްފައިވެ އެވެ.

މި ބިލު ފާސްވެއްޖެނަމަ، ރާއްޖޭގެ ސިޔާސީ ނިޒާމުގައި ޒުވާނުންގެ ބައިވެރިވުން އިތުރުވެ، ގައުމުގެ ކަންކަމުގައި ނިންމުންތައް ނިންމުމުގައި ޒުވާނުންގެ ޚިޔާލާއި ފިކުރު ބޮޑު ދައުރެއް އަދާކުރާނެ އެވެ. މީގެ އިތުރުން، ޒުވާން ޖީލަށް ސިޔާސީ ލީޑަޝިޕް ހޯދުމުގެ ފުރުސަތު ފަހިވެ، ގައުމުގެ މުސްތަގުބަލަށް ތައްޔާރުވެފައިވާ ޒުވާން ލީޑަރުންގެ އަދަދު އިތުރުވެގެންދާނެ ކަމަށް ގިނަ ބަޔަކު ފާހަގަކުރެ އެވެ.