ރަޝިޔާ ގެ ސިފައިން ޔޫކްރެއިން ގެ ކުޕިއާންސްކް ސިޓީ ހިފައިފި ކަމަށް ރަޝިޔާގެ ޖެނެރަލް ސްޓާފް ވިދާޅުވެއްޖެ

ރަޝިޔާ ގެ ސިފައިން ޔޫކްރެއިން ގެ ކުޕިއާންސްކް ސިޓީ ހިފައިފި ކަމަށް ރަޝިޔާގެ ޖެނެރަލް ސްޓާފް ގެ ޗީފް ވެލެރީ ގެރާސިމޯވް، ބުރާސްފަތި ދުވަހު ރައީސް ވްލަޑިމިއަރ ޕޫޓިން އަށް ދަންނަވައިފި އެވެ.

ކްރެމްލިން އިން ކުރިން ބުނެފައިވާ ގޮތުގައި، ޕޫޓިން ވަނީ ރަޝިޔާގެ ސިފައިންގެ "ވެސްޓް" ގްރޫޕިންގ ގެ ކޮމާންޑް ޕޯސްޓަށް ޒިޔާރަތް ކުރައްވައި، ގެރާސިމޯވް އާއި އަސްކަރިއްޔާvގެ އިސްވެރިންނާ ބައްދަލު ކުރައްވާފަ އެވެ.

"ވެސްޓް ގްރޫޕިންގ ގެ ޔުނިޓްތަކުން ވަނީ ކުޕިއާންސްކް ސިޓީ މިނިވަންކޮށް، އޮސްކޯލް ކޯރުގެ ވާތްފަރާތު އައްސޭރީ ގައި ވާ ޔޫކްރެއިން ގެ ހަތިޔާރުއެޅި ސިފައިންގެ ޔުނިޓްތައް ނައްތާލުމުގެ މަސައްކަތް ރަޝިޔާ ސިފައިން ކުރިއަށް ގެންދާ،" ކަމަށް ގެރާސިމޯވް ޕޫޓިން އަށް ދެންނެވިއެވެ.

މީގެ އިތުރުން ގެރާސިމޯވް ޕޫޓިން އަށް ދެންނެވީ، ރަޝިޔާގެ ސިފައިން ޕޮކްރޯވްސްކް ގެ 70 އިންސައްތަ އަދި ވޮވްޗާންސްކް ގެ 80 އިންސައްތަ އަށް ވުރެ ބޮޑު ބައެއްގެ ކޮންޓްރޯލް ހޯދާފައިވާ ކަމަށެވެ.

އަނެއްކޮޅުން ބުރާސްފަތި ދުވަހު، ޔޫކްރެއިން ގެ އަސްކަރިއްޔާ އިން ވަނީ ރަޝިޔާއިން ދެއްކި ވާހަކަތައް ދޮގުކޮށްފަ އެވެ.

ކުޕިއާންސްކް އޮތީ ޔޫކްރެއިން ގެ ސިފައިންގެ ބާރުގެ ދަށުގައި ކަމަށް ޔޫކްރެއިންގެ އަސްކަރިއްޔާ އިން ނެރުނު ބަޔާނެއް ގައި ވަނީ ބުނެފަ އެވެ.

އަދި ހާރްކީވް ސަރަޙައްދުގެ ވޮވްޗާންސްކް ގެ 80 އިންސައްތަ އަދި ޕޮކްރޯވްސްކް ސިޓީގެ 70 އިންސައްތަ ރަޝިޔާ ސިފައިން ހިފާފައިވާ ކަމަށް ބުނާ ބުނުންތަކަކީ ވެސް ދޮގެއް ކަމަށް ޔޫކްރެއިން އިން ވަނީ ބުނެފަ އެވެ.