ޖެފްރީ އެޕްސްޓީން އާ ގުޅޭ ޖަސްޓިސް ޑިޕާޓްމަންޓްގެ ފައިލްތައް ހާމަކުރުމާ ގުޅޭ ގޮތުން ނަގަން ހަމަ ޖެހިފައިވާ އޮތް ވޯޓުން ރައީސް ޓްރަމްޕް އާއި ޖިންސީ ކުށްވެރިޔާ އެޕްސްޓީން އާ އޮތް ގުޅުމާ ބެހޭ ގޮތުން ކުރެވޭ ތުހުމަތުތައް ނިމުމަކަށް އަންނާނެ ކަމަށް އެމެރިކާގެ ގާނޫނު ހަދާ މަޖިލީހުގެ ރައީސް މައިކް ޖޯންސަން އާދިއްތަ ދުވަހު ވިދާޅުވެއްޖެ އެވެ.

ޖަލުގައި ހުއްޓާ އަމިއްލަ އަށް މަރުވެފައިވާ އެޕްސްޓީން އަކީ އަންހެން ކުދިން ޖިންސީ ޝިކާރަ އަކަށް ހަދާ ކުދިން ވިއްކުމުގެ ކުށް ސާބިތުވެފައިވާ ފަރާތެކެވެ. އެމެރިކާގެ ގާނޫނު ހަދާ މަޖިލިހުން އޭނާ އާ ގުޅޭ ފައިލްތައް އާންމު ކުރުމަށް ވޯޓަކަށް ދާ މި ދަނޑިވަޅުގައި އެޕްސްޓީން އާއި އެމެރިކާގެ ރައީސް އާ ގާތް ގުޅުމެއް އޮތް ކަމުގެ ތުހުމަތުތައް ވަނީ އިތުރުވެފަ އެވެ. ޓްރަމްޕް ގެ ޕާޓީ އަށް ނިސްބަތްވާ މަޖިލީހުގެ ރައީސް ޖޯންސަން ދެކެވަޑައިގަންނަވާ ގޮތުގައި، ފައިލްތައް އާންމު ކުރުމުން ޓްރަމްޕް އާއި މި މައްސަލައާ ގުޅުމެއް އޮތް ކަމަށް ކުރާ ތުހުމަތުތައް ނިންމާލަން އެހީތެރިވާނެ ކަމަށެވެ.

މަޖިލީހުގެ ރިޕަބްލިކަން ލީޑަރު ޖޯންސަން "ފޮކްސް ނިއުސް ސަންޑޭ" ޕްރޮގްރާމްގައި ވިދާޅުވީ، ޑިމޮކްރަޓިކް ޕާޓީގެ މަޖިލިސް މެމްބަރުން ފައިލްތައް އާންމު ކުރުމަށް މަސައްކަތް ކުރަނީ ރައީސް ޓްރަމްޕް އާ އެޕްސްޓީން އާ ގުޅުން އޮތްކަމުގެ ނަޒަރިއްޔާ އިން ކަމަށާއި އެހެން ނަމަވެސް ޓްރަމްޕް އާއި އެޕްސްޓީން އާ ދެމެދު ގުޅުމެއް ނެތް ކަމުގައެވެ.

ޖޯންސަން ޑިމޮކްރެޓުންނާ ގުޅޭ ގޮތުން ވިދާޅުވީ އެޕްސްޓީން ހިންގާފައިވާ ގުޅުންތަކުގެ މައުލޫމާތު އެކުލެވޭ ފައިލް ތަކަކީ އެމީހުން ޓްރަމްޕް އާ ދެކޮޅަށް ގެންގުޅޭ އެންމެ ވަރުގަދަ ހަތިޔާރު ކަމަށާއި، އެ ހަތިޔާރު އެމީހުންގެ އަތުން ގެއްލުވާލާނެ ކަމުގައެވެ. އޭނާ އިތުރަށް ވިދާޅުވީ، "ފޮރުވަން އޮތް އެއްޗެއް ނެތް" ކަމަށެވެ.

ޓްރަމްޕާއި އެޕްސްޓީން އާ އެކުގައި ހުރި ފޮޓޯތައް އާންމު ވެފައިވީ ނަމަވެސް، ރައީސް ވިދާޅުވެފައި ވަނީ އެޕްސްޓީން އަށް ހުކުމް ކުރުމުގެ ކުރިން އެ ދެ މީހުންގެ ގުޅުން ކެނޑިފައިވާ ކަމަށެވެ. ފާއިތުވި ހަފްތާގައި މަޖިލީހުގެ ކޮމިޓީއަކުން ހާމަކުރި އީމެއިލްތަކުން ފެންނަ ގޮތުގައި އެޕްސްޓީން ގަބޫލުކުރި ގޮތުގައި ޓްރަމްޕް އަށް "އަންހެން ކުދިންގެ ވާހަކަ އެނގިވަޑައިގަންނަވާނެ،" ކަމަށެވެ. ނަމަވެސް އެ ޖުމްލައިގެ މާނައަކީ ކޮބައިކަން ސާފެއް ނޫނެވެ.

ޓްރަމްޕް އޭގެ ފަހުން ޑިޕާޓްމަންޓް އޮފް ޖަސްޓިސް އަށް އަންގަވާފައި ވަނީ، ގާނޫނު ހަދާ މަޖިލީހުގެ ޑިމޮކްރެޓުންނާ އެޕްސްޓީން އާ ދެމެދު އޮތް ގުޅުން ތަހުގީގު ކުރުމަށެވެ.

އެޕްސްޓީން އާ ޓްރަމްޕް އާ އޮތް ގުޅުމާ ބެހޭ ވާހަކަތައް ފުޅާ ވަމުންދާއިރު، އޭގެ ނަތީޖާ އެއްގެ ގޮތުން ރިޕަބްލިކަން ޕާޓީގެ ތެރޭގައި ވެސް ރެނދުއަޅަމުންދާ ކަން ފާހަގަ ކުރެވޭ ކަމަށް ރިޕޯޓުތައް ބުނެއެވެ. އެ ގޮތުން ކޮންގްރެސް ގައި ޓްރަމްޕް އަށް އެންމެ ބޮޑަށް ތާއީދުކުރާ އެއް ބޭފުޅަކު ކަމަށްވާ ޖޯޖިއާ ތަމްސީލު ކުރައްވާ މަޖިލީހުގެ މެންބަރު ޓޭލަރ ގްރީން، އެޕްސްޓީން ފައިލްތައް ހާމަ ކުރުމާ ގުޅޭ ގޮތުން ރިޕަބްލިކަނުން އަމަލު ކުރަމުންދާ ގޮތައް ފާޑުވިދާޅުވުމުން ޓްރަމްޕް ވަނީ އޭނާ އަށް ދެއްވި ތާއީދު އަނބުރާ ގެންދަވާފައެވެ.

އާދީއްތަ ދުވަހު ސީއެންއެން ގެ "ސްޓޭޓް އޮފް ދަ ޔޫނިއަން" ޕްރޮގްރާމް ގައި ގްރީން ވިދާޅުވީ، "މުއްސަނދި، ބާރުގަދަ މީހުން ކޮންމެ ނުބައި ކަމެއް ކުރުމުން އެމީހުން ހިމާޔަތް ކުރަން ޖެހޭ ކަމަށް ގަބޫލެއް ނުކުރަން" ކަމަށެވެ.