ބަޖެޓަކީ ރައްޔިތުންނަށް ސާފުވާ ގޮތަށް، ތަފްސީލުތަކާއެކު ހުށަހަޅަން ޖެހޭ އެއްޗެއް ކަމަށް މި ސަރުކާރުން ގަބޫލެއް ނުކުރޭ: އެމްޕީ ދީދީ
ސަރުކާރުން ބަޖެޓު ހުށަހަޅަނީ ގާނޫނުން ލާޒިމުކުރާތީ އެކަނި ކަމަށް
ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ
މި ސަރުކާރުން ބަޖެޓު ހުށަހަޅަނީ އެއީ ކޮންމެހެން ކުރަން ޖެހޭ ކަމަކަށް ވާތީ ކަމަށާ، ބަޖެޓަކީ ރައްޔިތުންނަށް ކަންކަން ސާފުވާ ގޮތަށް، ތަފްސީލުތަކާއެކު ހުށަހަޅަން ޖެހޭ އެއްޗެއް ކަމަށް މި ސަރުކާރު ގަބޫލުކުރާހެން ހީނުވާ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެ އެވެ.
ރާއްޖެޓީވީގެ 'ބަޖެޓް 2026' ޕްރޮގްރާމްގައި ވާހަކަދައްކަވަމުން މެންބަރު ވިދާޅުވީ މި ސަރުކާރުން ބަޖެޓު ހުށަހަޅަނީ އެއީ ގާނޫނުން ކޮންމެހެން ލާޒިމު ކުރާ ކަމަކަށް ވާތީ ކަމަށެވެ. އަދި މި ސަރުކާރުން ހުށަހެޅި ދެ ބަޖެޓަށް ބަލާއިރު ވެސް ހާމަވާ އެއް ކަމަކީ ބަޖެޓަކީ ތަފްސީލީ އަދި ހަގީގީ ނަންބަރުތަކެއް ޖަހައިގެން ހުށަހަޅާ އެއްޗެއްކަން މި ސަރުކާރުން ގަބޫލު ނުކުރާ ކަން ކަމަށް ވެސް މެންބަރު ވިދާޅުވި އެވެ.
އިތުރަށް ވާހަކަދައްކަވަމުން މެންބަރު ވިދާޅުވީ 2025 ވަނަ އަހަރަށް ލަފާކޮށް ދައުލަތުން ހުށަހެޅި ބަޖެޓުގެ ސަބަބުން އިދިކޮޅު މެންބަރުންނަށް ދިމާވި އެންމެ ބޮޑު އެއް މައްސަލައަކީ ސަރުކާރު ޖަވާބުދާރީ ކުރުުވުމުގެ ހުރިހާ މަގެއް ބަންދުވެގެން ދިއުން ކަމަށެވެ.
ސަބަބަކީ އެ ބަޖެޓުގައި އެއްވެސް ކަމެއްގެ ތަފްސީލު ބަޔާން ކޮށްފައި ނެތުން ކަމަށާ، އަންނަ އަހަރަށް ލަފާކޮށް ހުށަހެޅި ބަޖެޓު ވެސް އޮތީ ހަމަ އެހެން ކަމަށް މެންބަރު ދީދީ ވިދާޅުވި އެވެ.
އަޅުގަނޑޫމެންނަށް ފެނިގެންދިޔައީ މިދިޔަ އަހަރު ބަޖެޓު ހުށަހެޅިއިރު ވެސް އެއްވެސް ތަފްސީލެއް ދީފަ ނުވާތަން. ބްލޮކް ފިގަރތަކެއް މި ހުންނަނީ. ރައްޔިތުންގެ މަންދޫބުންގެ ހައިސިއްޔަތުން ރައްޔިތުންގެ މަޖިލީހުގަ ތިއްބަވާ މެންބަރުންނަށް، ސަރުކާރު ބަޖެޓާ ގުޅިގެން ޖަވާބުދާރީ ކުރެވޭނެ އެއްވެސް މަގެއް ނެތް ގޮތަކަށް، ހުރިހާ މަގެއް ބަންދު ކޮށްފަ ބަޖެޓް ހުށަހަޅަނީ،ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ
އަންނަ 2026 ވަނަ އަހަރަށް ލަފާކޮށް ދައުލަތުން ހުށަހަޅާފައި ވަނީ 64.2 ބިލިއަން ރުފިޔާގެ ބަޖެޓެކެވެ. މި ބަޖެޓަކީ ރާއްޖޭގެ ތާރީޚުގައި ވެސް އަހަރަކަށް ލަފާކުރި އެންމެ ބޮޑު ބަޖެޓެވެ.
އެގޮތުން މި ބަޖެޓަކީ ވަރަށް އިހުމާލު ބޮޑު ބަޖެޓެއް ކަމަށާއި، އެ ބަޖެޓު ރިވައިސްކޮށް ރަނގަޅު ކުރަން ޖެހޭ ކަމަށް މާލީ ދާއިރާގެ ތަޖުރިބާކާރު ބޭފުޅުން ދަނީ ވިދާޅުވަމުންނެވެ. މިކަމާ މެދު ގިނަ ބަޔަކު ކަންބޮޑުވުން ފާޅުކުރަމުންދާ އިރު މި ބަޖެޓު މިހާރު އޮތް ގޮތުން ރައްޔިތުންނަށް ބޮޑެތި ގެއްލުން ތަކެއް ލިބޭނެ ކަމަށް ވެސް ތަޖުރިބާކާރުން ވިދާޅުވެ އެވެ.
މި ބަޖެޓުން ރާއްޖޭގެ އިގްތިސާދަށް އިތުރު ފަހި ކަމެއް ގެނެވޭނެ އެއްވެސް ގޮތެއް ނެތް ކަމަށާއި، މަސްވެރިކަމާއި، ދަނޑުވެރިކަމާ އަދި އެހެނިހެން ވިޔަފާރިތަކަށް ކުރިއެރުމެއް ނުލިބޭނެ ގޮތަށް ބަޖެޓު އެކުލަވާލާފައިވާ ކަމަށް ބުނެ މާލީ ދާއިރާގައި ތަޖުރިބާ ހުރި ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.
ބަޖެޓާ ގުޅިގެން ރައްޔިތުންގެ މަޖިލީހުގައި ތިއްބަވާ އިދިކޮޅު މެންބަރުން ދަނީ މި ކަންބޮޑުވުންތައް ހިއްސާކުރެވޭނެ މަގުތައް ސަރުކާރުން ބަންދު ކޮށްފައިވާ ކަމުގެ ތުހުމަތު ކުރަމުންނެވެ.
