ސިއްހަތު ބަޖެޓެއްގެ ގޮތުގައި ޕްރޮމޯޓު ކުރި ނަމަވެސް ބަޖެޓު އިތުރު ކޮށްފައި ވަނީ އިދާރީ، ޑިފެންސް އަދި ގައުމިއްޔަތަށް: އަމީރު
ތިމާވެށި، ގެދޮރުވެރިކަން، ތައުލީމު އަދި އިގްތިސާދީ ތަރައްގީގެ ބަޖެޓު ވީ ކުޑަ
މި ސަރުކާރުން ދަނީ ދިފާއީ ބަރަށް ބޮޑެތި ހަރަދުތަކެއް ކުރަމުން
ސިއްހަތު ބަޖެޓެއްގެ ގޮތުގައި އަންނަ އަހަރުގެ ބަޖެޓު ޕްރޮމޯޓު ކުރި ނަމަވެސް ބަޖެޓު އިތުރު ކޮށްފައިވަނީ އިދާރީ، ޑިފެންސް އަދި ގައުމިއްޔަތަށް ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
ބުރާސްފަތި ދުވަހު ބޭއްވި އެމްޑީޕީގެ އިގްތިސާދީ ކޮމެޓީގެ ނޫސްވެރިންގެ ބައްދަލުވުމުގައި އަމީރު ވިދާޅުވީ 2026 ބަޖެޓަކީ ސިއްހަތު ބަޖެޓެއް ކަމަށް ސަރުކާރުން ބުނި ނަމަވެސް ސިއްހަތަށް އިތުރުނުވާ ކަމަށާއި، އިތުރު ކޮށްފައި ވަނީ އާއްމު ޚިދުމަތުގެ ބަޖެޓާއި، ޑިފެންސް އަދި ކުޅިވަރާއި، ސަގާފަތް ފަދަ ކަންކަމަށެވެ.
ތިމާވެށި، ގެދޮރުވެރިކަން އަދި އިގްތިސާދީ ތަރައްގީގެ ބަޖެޓުތައް ވީ ކުޑަ ކަމަށާއި، ތައުލީމަށް ކުރާ ހަރަދު ވެސް އިތުރުވެފައި ނުވާ ކަމަށް އަމީރު ވިދާޅުވި އެވެ.
ވަރަށް ބޮޑަށް ސަރުކާރުން ވަކާލާތު ކުރަމުން މިދަނީ 2026 ވަނަ އަހަރުގެ ބަޖެޓަކީ ސިއްހީ ދާއިރާއަށް ފޯކަސް ކުރެވިގެން ހުށަހެޅިފައިވާ ބަޖެޓެކޭ. އެކަމަކު ބަޖެޓުގެ ހިސާބުތަކަށް ބަލާއިރު، އެ މަންޒަރެއް ބަޖެޓަކުން ނުފެނޭ. ވަރަށް ބޮޑަށް އިތުރުވެފައި މިވަނީ ޑިފެންސް ހަރަދާ ކުޅިވަރާއި، ސަގާފަތާ މިކަންތައްތަކަށް ހަރަދުވާ މިންވަރު ވަރަށް ބޮޑުތަނުން ބޮޑުވެފައި އެބަހުރި. ތިބޭފުޅުން ޗާޓުތަކަށް ބަލާލީމަ ވެސް އެބަ ފެނޭ އަސްލު އަޅުގަނޑުމެންނަށް ހައުސިން އަށް އަސްލު ކުރާ ހަރަދު 2025 ވަނަ އަހަރާ އަޅާބަލާއިރު، ގާތްގަނޑަކަށް 29 ޕަސެންޓް ދަށް ވެފައި މިވަނީ ބަޖެޓު ކުރި މިންވަރު. އަދި އޭގެ އިތުރުން ތިމާވެއްޓާ ކަންތައްތަކަށް އަޅުގަނޑުމެން ހޭދަ ކުރާ މިންވަރު 17 ޕަސެންޓް ދަށް ވެފައި މިވަނީ.ކުރީގެ ފިނޭންސް މިނިސްޓަރު އިބްރާހިމް އަމީރު
2025 ވަނަ އަހަރުގެ ބަޖެޓު ޕްރޮމޯޓް ކޮށްފައިވަނީ ގެދޮރުވެރިކަމުގެ ބަޖެޓުގެ ގޮތުގައިކަން ފާހަގަކުރައްވައި އަމީރު ވިދާޅުވީ މި އަހަރުގެ ތެރޭގައި އެންމެ ގާ ކޮޅެއް ވެސް ނުބޭއްވޭ ކަމަށާއި، އެއްވެސް ހައުސިން މަޝްރޫއެއްގެ އަމަލީ މަސައްކަތް ފެށިފައިނުވާ ކަމަށެވެ.
އަމީރު ވިދާޅުވީ، ގެދޮރުވެރިކަމުގެ ޕީއެސްއައިޕީ އަށް މި އަހަރަށް ބަޖެޓު ކުރީ 1800.1 މިލިއަން ރުފިޔާ ކަމަށެވެ. އަދި ވިދާޅުވީ، ރިވައިޒްޑް ހަރަދުގެ ގޮތުގައި އޮތީ 392.4 މިލިއަން ރުފިޔާ (ކަނޑައެޅި ބަޖެޓުގެ 21 އިންސައްތަ) ކަމަށާއި، 23 އޮކްޓޫބަރުގެ ނިޔަލަށް ހަރަދުވީ 170.9 މިލިއަން ރުފިޔާ ކަމަށެވެ.
