މި ސަރުކާރުން ފުވައްމުލައް ސިޓީގައި ތަރައްގީގެ މަޝްރޫއު ތަކަށް އެންމެ ވެލި ފުކެއް ވެސް އަޅާފައި ނުވޭ: ކުރީގެ މެންބަރު ހުސެއިން މުހައްމަދު ދީދީ
މި ސަރުކާރުން ގެންގުޅެނީ ބާލިދީ ބަޖެޓެއް، ރައްޔިތުންނަށް އޮޅުވާ ނުލެވޭނެ
ރާއްޖެޓީވީގެ ވައުދުނާމާ ޕްރޮގްރާމް ގައި ފުވައްމުލަކު މެދު ދާއިރާގެ ކުރީގެ މެންބަރު ހުސެއިން މުހައްމަދު ދީދީ ވާހަކަ ދައްކަވަނީ
ރައީސް ޑރ.މުހައްމަދު މުއިއްޒުގެ ސަރުކާރުން މިހާތަނަށް ފުވައްމުލައް ސިޓީގައި ތަރައްގީ ގެ މަޝްރޫއު ތަކަށް އެންމެ ވެލި ފުކެއް ވެސް އަޅާފައި ނުވާ ކަމަށް ފުވައްމުލަކު މެދު ދާއިރާގެ ކުރީގެ މެންބަރު ހުސެއިން މުހައްމަދު ދީދީ ވިދާޅުވެއްޖެ އެވެ.
ފުވައްމުލައް ތަރައްގީއާ ގުޅޭ ގޮތުން ރާއްޖެޓީވީގެ ވައުދުނާމާ ޕްރޮގްރާމް ގައި ހުސެއިން މުހައްމަދު ވިދާޅުވީ އެ ސިޓީގެ ތަރައްގީ އަށް ރައީސް މުއިއްޒު ގިނަ ވައުދުތަކެއް ވެވަޑައިގެންނެވި ކަމަށެވެ. ނަމަވެސް މި ސަރުކާރަށް ދެ އަހަރު ވާން ދާއިރު އައު އެއްވެސް މަޝްރޫއެއްގެ އަމަލީ މަސައްކަތް ފެށިފައި ނުވާ ކަމަށެވެ. އަދި ކުރީ ސަރުކާރުގައި ފަށާފައިވާ ބައެއް މަޝްރޫއުތައް ވަރަށް ލަސްލަހުން ކުރިއަށްދާ ކަމަށް އޭނާ ވިދާޅުވި އެވެ.
މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރޫއަށް އިޝާރާތް ކުރައްވައި ހުސެއިން މުހައްމަދު ވިދާޅުވީ ކުރީ ސަރުކާރު ގައި މަގު ހެދުމުގެ -ފޭސް އެކެއްގެ ހުރިހާ މަގެއްގައި ސްޓޯމް ވޯޓާ ސިސްޓަމާއެކު ތާރު އަޅާ ނިންމި ކަމަށާއި، މި ސަރުކާރުން މަޖިލިސް އިންތިޚާބާ ދިމާކޮށް މަގު ހެދުމުގެ ދެވަނަ-ފޭސް އިއުލާންކޮށް، މަގެއްގައި ހޮޅިއެއް ބޭއްވި ކަމަށެވެ.
ދެން މިސަރުކާރުން ރައީސުލްޖުމްހޫރިއްޔާ މަޖިލިސް އިންތިޚާބަށް ގޮސް ކުރި ކަމަކީ އެއް މަގެއްގައި ހޮޅިއެއް އެޅި. އެ ހޮޅި އެޅުމަށްފަހު އަދި މިހިސާބަށް އައިރުގައި ފުވައްމުލަކު ގައި ނެތް ތާރުކޮޅެއް އަދި އޭބީސީގެ އެއްވެސް މަސައްކަތެއް ކޮށްފައި ނުވޭ. އަނެހެން މަގުގެ މަސައްކަތް ވެސް މިސަރުކާރަށް މިވަނީ އެއްވެސް ވަރަކަށް ނުކުރެވިފައި. އެތާގައި ތާރު އަޅާ މެޝިނެއް ވެސް ނެތް ކަމަށް މީހުން ބުނަނީ. އޭބީސީ މަސައްކަތެއް ވެސް ކުރެވޭނެ ގޮތެއް ވެސް ނެތް ކަމަށް ވަނީ.ފުވައްމުލަކު މެދު ދާއިރާގެ ކުރީގެ މެންބަރު ހުސެއިން މުހައްމަދު ދީދީ
ރައީސް މުއިއްޒު 19 ފެބްރުއަރީ 2024 ގައި ފުވައްމުލައް ސިޓީގެ ކައުންސިލާ ބައްދަލުކުރައްވައި އެ ކައުންސިލުން އެދުނު ގޮތަށް އަދި އެމަނިކުފާނު ވައުދުވި ގޮތަށް އެ ސިޓީގެ ހުރިހާ މަގެއް ޒަމާނީ ފެންވަރަށް ތަރައްގީ ކޮށްދެއްވާނެ ކަމުގެ ޔަގީންކަން ދެއްވި އެވެ.
ފުވައްމުލައް ސިޓީގެ މަގު ހެދުމުގެ ދެވަނަ ފިޔަވަހީގެ ދަށުން 50 މަގެއްގައި ތާރު އަޅައި ޒަމާނީ ފެންވަރަށް ތަރައްގީ ކުރުން ހިމެނެ އެވެ. އެއީ ގާތްގަނޑަކަށް 12.7 ކިލޯ މީޓަރެވެ.
މީގެ އިތުރުން ހުސެއިން މުހައްމަދު ވިދާޅުވީ، އެރަށުގައި ބަނދަރު ބޮޑު ކުރުމާއި، އެއަރޕޯޓު ބޮޑު ކުރުމުގެ މަޝްރޫއު އަދި 500 ހައުސިން ޔުނިޓް އަޅައި، ބޯހިޔާވަހިކަމުގެ ދަތިކަމަށް ހައްލެއް ގެނެސްދެއްވާނެ ކަމަށް ރައީސް މުއިއްޒު ވައުދުވެ ވަޑައިގެންނެވި ކަމަށެވެ. އަދި ވިދާޅުވީ ތައުލީމީ ދާއިރާ ކުރި އެރުވުމަށް އެމްއެންޔޫ ފެކަލްޓީއެއް އަޅާނެ ކަމަށާއި، ޒުވާނުންނަށް ޚާއްސަކޮށް އެކި ކުޅިވަރުތައް ކުޅުމަށް ޚާއްސަ ދަނޑުތައް އަޅައިދެއްވާނެ ކަމަށް ވައުދުވެވަޑައިގެންނެވި ކަމަށެވެ.
ނަމަވެސް މިއަދާ ހަމައަށް މި މަސައްކަތްތަކާ ގުޅޭ އެއްވެސް އަމަލީ މަސައްކަތެއް ކުރިއަށް ގެންގޮސްފައިނުވާ ކަމަށް އޭނާ ވިދާޅުވި އެވެ. އަދި ވިދާޅުވީ މި ސަރުކާރުން ގެންގުޅެނީ ބާލިދީ ބަޖެޓެއް ކަމަށާއި، ރައްޔިތުންނަށް ކަންކަން އޮޅުވާލުމަށް މަސައްކަތް ކުރި ނަމަވެސް ހަގީގަތް އެނގޭ ކަމަށެވެ.
