33 އަހަރު ފަހުން އެމެރިކާގައި ނިއުކްލިއާ ހަތިޔާރު ޓެސްޓު ކުރަން ޓްރަމްޕް އަމުރު ކުރައްވައިފި

އެމެރިކާގައި 33 އަހަރު ފަހުން، ނިއުކްލިއާ ހަތިޔާރު ޓެސްޓު ކުރަން އެ ޤައުމުގެ ރައީސް ޑޮނަލްޑް ޓްރަމްޕް އަމުރު ކުރައްވައިފި އެވެ.

ބުރާސްފަތި ދުވަހު، އެމެރިކާގެ އަސްކަރިއްޔާގެ ސިފައިންނަށް ޓްރަމްޕް އަންގަވާފައި ވަނީ 33 އަހަރު ފަހުން ފުރަތަމަ ފަހަރަށް އެ ޤައުމުގައި ނިއުކްލިއާ ހަތިޔާރު ޓެސްޓު ކުރަން ވަގުތުން ފެށުމަށެވެ. މި އެންގުން ޓްރަމްޕް އަންގަވާފައި ވަނީ، ޗައިނާގެ ރައީސް ޝީ ޖިންޕިންއާ އެކު ބޭއްވެވި ބައްދަލުވުން ފެށުމުގެ ކުޑަ ވަގުތު ކޮޅެއް ކުރިންނެވެ.

ހައިރާން ކުރުވަނިވި މި އިއުލާން ޓްރަމްޕް ކުރެއްވީ އޭނާގެ ޓުރުތު ސޯޝަލް މީޑިއާގައި ކުރެއްވި ޕޯސްޓެއްގަ އެވެ. ޗައިނާގެ ރައީސް އާއެކު އޮތް ވިޔަފާރީގެ މުހިންމު މަޝްވަރާތަކަށް ވަޑައިގަންނަވަމުން ޓްރަމްޕް ކުރެއްވި ޕޯސްޓުގައި ވިދާޅުވެފައި ވަނީ، އެހެން ނިއުކްލިއާ ބާރުރަކާ އެއްވަރަށް އެމެރިކާގެ ނިއުކްލިއާ ހަތިޔާރުތައް ޓެސްޓު ކުރުމަށް ޕެންޓަގަން އަށް އަންގަވާފައިވާ ކަމަށެވެ.

އެގޮތުން އެހެން ޤައުމު ތަކުގެ ނިއުކްލިއާ ޓެސްޓިން ޕްރޮގްރާމް ތަކުގެ ސަބަބުން، ޑިޕާޓްމަންޓް އޮފް ވޯ އަށް ޓްރަމްޕް އަންގަވާފައި ވަނީ، އެއްވެސް ލަސް ކުރުމެއް ނެތި، ވަގުތުން އެމެރިކާ އިން އެކަން ފެށުމަށެވެ. ޓްރަމްޕްގެ މި އެންގެވުން ގިނަ ބަޔަކު ސިފަ ކޮށްފައި ވަނީ، ގޮތް ނޭނގޭ އަދި ހަރިރާން ކުރުވަނިވި އެންގުމެއްގެ ގޮތުގަ އެވެ.

ޓްރަމްޕް ވިދާޅުވީ ނިއުކްލިއާ ހަތިޔާރުގެ ގޮތުން ދުނިޔޭގެ އެންމެ ކުރީގައި އެމެރިކާ އޮތް ނަމަވެސް، ދެ ވަަނައިގައި އޮތީ ރަޝިޔާ ކަމަށެވެ. އަދި ތިން ވަނައިގައި ޗައިނާ އޮތްއިރު، ފަސް އަހަރުގެ ތެރޭގައި އެކަން އެއްވަރު ވެދާނެ ކަމަށް ވެސް ޓްރަމްޕް ވަނީ ވިދާޅުވެފަ އެވެ. ނަމަވެސް، މިކަމުގެ އިތުރު އެއްވެސް ތަފްސީލެއް ޓްރަމްޕް ދެއްވާފައި ނުވެ އެވެ.

ޓްރަމްޕްގެ އެ ޕޯސްޓާ ގުޅިގެން، ޗައިނާގެ ރައީސް އާއެކު އޭނާ ބޭއްވެވި ބައްދަލުވުމުގެ ފަހުން ވެސް ނޫސްވެރިން ވަނީ ސުވާލު ކޮށްފަ އެވެ. ނަމަވެސް، އެއްވެސް ސުވާލަކަށް ޓްރަމްޕް ޖަވާބު ދެއްވާފައި ނުވެ އެވެ. ޓްރަމްޕް ވިދާޅުވެފައި ވަނީ ނިއުކްލިއާ ބޮމުގެ އިކްސްޕްލޯސިވް ޓެސްޓިންގެ ކަންތައްތަކާ ބެހޭ ގޮތުންތޯ، ނުވަތަ ނިއުކްލިއާ ހަތިޔާރު އުފުލާ މިސައިލްތައް ޓެސްޓު ކުރުމާ ބެހޭ ގޮތުންތޯ ކަމެއް ވެސް ސާފުވެފައި ނުވެ އެވެ. ނިއުކްލިއާ ބޮމުގެ އިކްސްޕްލޯސިވް ޓެސްޓިން ހިންގަނީ ނޭޝަނަލް ނިއުކްލިއާ ސޭފްޓީ އެޑްމިނިސްޓްރޭޝަން އިންނެވެ.

އެމެރިކާ އިން އެންމެ ފަހުން ނިއުކްލިއާ ހަތިޔާރު ޓެސްޓު ކޮށްފައި ވަނީ 1992 ވަނަ އަހަރު އެވެ. އެއަށްފަހު އެމެރިކާ އިން ނިއުކްްލިއާ ހަތިޔާރު ޓެސްޓު ކުރުން ހުއްޓާލައި، އެކަން ކުރުމުން ދުރުހެލިވެފައިވެ އެވެ. އެމެެރިކާ އިން އެ ފިޔަވަޅު ނަގާފައި ވަނީ، ބައިނަލްއަޤުވާމީ މުޖުތަމައުގެ ފަރާތްތަކުން ނިއުކްލިއާ ހަތިޔާރު ފެތުރުން ހުއްޓުވުމަށް ކުރަމުން އައި މަސައްކަތާ އެއްގޮތަށެވެ.

ޓްރަމްޕްގެ މި ނިންމުން އައިސްފައި ވަނީ ދުނިޔޭގެ ނިއުކްލިއާ ބާރުތަކާ ދެމެދު އުފެދިފައިވާ ނުތަނަވަސްކަން އިތުރު ވަމުން އަންނަ ދަނޑިވަޅެއްގަ އެވެ. ޗައިނާ އާއި ރަޝިޔާ އިން ނިއުކްލިއާ ހަތިޔާރުގެ ދާއިރާގައި ހޯދަމުން އަންނަ ތަރައްޤީ އާއި ކުރިއެރުމަށް އެމެރިކާ އިން ކަންބޮޑުވުން ފާޅުކޮށްފައިވެ އެވެ.

މި ނިންމުމަކީ ބައިނަލްއަގުވާމީ މުޖުތަމައުގެ ފަރާތުން ބޮޑެތި ސުވާލު ތަކެއް އުފެދޭނެ ނިންމުމެކެވެ. ދުނިޔޭގެ އެކި ގައުމު ތަކުން ނިއުކްލިއާ ހަތިޔާރު ޓެސްޓު ކުރުން ހުއްޓުވުމަށް ގޮވާލަމުން އައިސްފައިވާ އިރު، އެމެރިކާ އިން މި ނިންމުން ނިންމުމަކީ ބައިނަލްއަގުވާމީ އަމާން ކަމަށް ނުރައްކާވެ ދާނެ ކަމެއް ކަމަށް ބައެއް ތަޖުރިބާ ކާރުން ދެކެ އެވެ.