ތިން ވަނަ ދައުރަކަށް ވާދަ ކުރުމުގެ ފުރުސަތެއް ނެތް، އެކަމާ ވަރަށް ދެރަވޭ: ޓްރަމްޕް

އެމެރިކާގެ ރިޔާސީ ތިން ވަނަ ދައުރަކަށް ވާދަ ކުރެއްވުމުގެ ފުރުސަތު ބަންދުވެފައިވާ ކަމަށް ޤަބޫލު ކުރައްވާ ކަމަށް، އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ދެކުނު ކޮރެއާ އަށް ވަޑައިގަންނަވަމުން ބުދަ ދުވަހު ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، ރިޔާާސީ އިންތިޚާބުގައި އަލުން ވާދަ ކުރެއްވުމުގެ ފުރުސަތު އޭނާ އަށް ނެތް ކަމަށާއި، އެމެރިކާގެ ޤާނޫނު އަސާސީ ކިޔާލުމުން އެކަން ސާފުވާ ކަމަށެވެ. އަދި އެއީ ވަރަށް ދެރަވާ ކަމެއް ކަމަށް ވެސް ޓްރަމްޕް ވަނީ ވިދާޅުވެފަ އެވެ.

މިއީ މީގެ ކުރިން ޓްރަމްޕް ދައްކަވާފައިވާ ވާހަކަތަކާ ތަފާތު ވާހަކަ އެކެވެ. ދެ ވަނަ ދައުރަކަށް ވަޑައިގެންނެވުމަށް ފަހު ޓްރަމްޕް ވަނީ، ތިން ވަނަ ދައުރަކަށް ވަޑައިގަންނަވަން ވެސް ޝައުޤުވެރިކަން އޮތް ފަދަ މޭރުމަކުން ވާހަކަ ދައްކަވައިފަ އެވެ. ނަމަވެސް، އެމެރިކާގެ ޤާނޫނު އަސާސީގައި ބަޔާން ކޮށްފައިވާ ގޮތުން، އެއްވެސް މީހަކަށް ވެރި ކަމުގައި ހުންނެވޭނީ ދެ ދައުރަށެވެ.

އެގޮތުން އެމެރިކާގެ ޤާނޫނު އަސާސީގެ 22 ވަނަ މާއްދާގައި ބަޔާން ކޮށްފައި ވަނީ، އެއް މީހަކަށް ދެ ދައުރަށް ވުރެ އިތުރަށް ރައީސްކަން ކުރުމުގެ ފުރުސަތެއް ނޯންނާނެ އެވެ. މިހާރު ޓްރަމްޕް ހުންނެވީ އެމެރިކާގެ ރައީސް ކަމުގެ ދެ ވަނަ ދައުރުގަ އެވެ. މިއަހަރުގެ ޖަނަވަރީ މަހު ފެށުނު ޓްރަމްޕްގެ ރިޔާސީ ދެ ވަނަ ދައުރު ހަމަވާނީ، 2029 ވަނަ އަހަރުގެ ޖަނަވަރީ މަހު އެވެ.

އެކަމާ ގުޅޭ ގޮތުން އަންގާރަ ދުވަހު ވާހަކަ ދައްކަވަމުން އެމެރިކާގެ ޤާނޫނު ހަދާ މަޖިލީހުގެ ރައީސް މައިކް ޖޯންސަން ވިދާޅުވީ، އެ މައްސަލައިގައި އޭނާ އާއި ޓްރަމްޕް މަޝްވަރާ ކުރައްވާފައިވާ ކަމަށެވެ. އަދި ތިން ވަނަ ދައުރަކަށް ވާދަ ކުރެއްވުމުގެ ހުއްދަ، ނުވަތަ ފުރުސަތެއް ޤާނޫނު އަސާސީ އިން ނެތް ކަމަށާއި، ޤާނޫނު އަސާސީ އިސްލާޙު ކުރުމުގެ ފުރުސަތު ވެސް ނެތް ކަމަށް ޓްރަމްޕް ޤަބޫލު ކުރައްވާފައިވާ ކަމަށް ޖޯންސަން ވަނީ ވިދާޅުވެފަ އެވެ.

ޖޯންސަން ވިދާޅުވީ ޤާނޫނު އަސާސީ އިސްލާޙު ކުރުމަށް ވެސް ކޮންގްރެސްގެ ދެ ބައި ކުޅަ އެއް ބައި ވޯޓު ބޭނުންވާނެ ކަމަށާއި، އޭގެ ފަހުން އަދި ތިން ބައި ކުޅަ އެއް ބައި ވޯޓު ވެސް ބޭނުން ވާނެ ކަމަށެވެ. އެކަމަށް ދިހަ އަހަރުގެ މުއްދަތެއް ނެގުމަކީ ވެސް އެކަށީގެންވާ ކަމެއްކަން ފާހަގަ ކުރައްވައި ޖޯންސަން ވިދާލުވީ، އެކަމަށް މަގެއް އޮތް ކަމަށް ވެސް ޤަބޫލު ނުކުރެއްވޭ ކަމަށެވެ.

އުމުރުފުޅުން މިހާރު 79 އަހަރުވެފައިވާ ޓްރަމްޕް ގެންދަވަނީ އޭނާގެ ޖަލްސާ ތަކުގައި ތިން ވަނަ ދައުރެއްގެ ވާހަކަ ކޮންމެ ވެސް ވަރަކަށް ދައްކަމުންނެވެ. އެގޮތުން "ޓްރަމްޕް 2028" ޖަހާފައިވާ ތަކެތި ވެސް އަންނަނީ ބޭނުން ކުރަމުންނެވެ. ނަމަވެސް، ޖޯންސަން އެކަން ސިފަ ކުރެއްވީ ސިޔާސީ ތަމްސީލެއްގެ ގޮތުގަ އެވެ. އެގޮތުން އެއީ އިދިކޮޅު ޑިމޮކްރަޓިކް ޕާޓީގެ އިސްވެރިން ހާސްކުރުމުގެ މަޤުސަދުގައި ކުރައްވާ ކަމެއް ކަމަށް އޭނާ ވިދާޅުވި އެވެ.

މި ހަފުތާގެ ކުރީ ކޮޅު ޓްރަމްޕް ވިދާޅުވެފައި ވަނީ އޭނާގެ ނައިބު ރައީސް ޖޭޑީ ވޭންސް އަދި ސެކްރެޓަރީ އޮފް ސްޓޭޓް މާކޯ ރޫބިއޯ އަކީ، 2028 ވަނަ އަހަރު އޮންނަ ރިޔާސީ އިންތިޚާބުގައި ރިޕަބްލިކަން ޕާޓީ އިން ވާދަ ކުރައްވާނެ ކެންޑިޑޭޓުންގެ ގޮތުގައި ސިފަ ކުރައްވައިފަ އެވެ.

އެމެރިކާގެ ރައީސް ކަމުގެ ފުރަތަމަ ދައުރަށް ޓްރަމްޕް ވަޑައިގެންނެވީ 2017 ވަނަ އަހަރު އެވެ. އެއީ 2016 ވަނަ އަހަރު އޮތް ރިޔާސީ އިންތިޚާބުގައި ހިލަރީ ކްލިންޓަންގެ މައްޗަށް ކުރި ހޯއްދަވައިގެންނެވެ. ޓްރަމްޕްގެ ރިޔާސީ ފުރަތަމަ ދައުރު ހަމަވީ 2021 ވަނަ އަހަރު އެވެ. 2020 ވަނަ އަހަރުގެ ފަހު ކޮޅު އޮތް އެމެރިކާގެ ރިޔާސީ އިންތިޚާބުގައި ޓްރަމްޕް ވާދަ ކުރެއްވީ ދެ ވަނަ ދައުރެއް ހޯއްދެވުމަށެވެ. ނަމަވެސް، ކުރީގެ ރައީސް ޖޯ ބައިޑަންއާާ ވާދަ ކުރައްވައި ޓްރަމްޕް އަށް ވަނީ ނާކާމިޔާބުވެފަ އެވެ.

އޭގެ ފަހުން ބައިޑަންގެ ދައުރު ހަމަވާން ކައިރިވެފައި ވަނިކޮށް، 2024 ވަނަ އަހަރުގެ ފަހު ކޮޅު އޮތް ރިޔާސީ އިންތިޚާބުގައި ޓްރަމްޕް ވާދަ ކުރެއްވި އެވެ. ޑިމޮކްރަޓިކް ޕާޓިގެ ރިޔާސީ ޓިކެޓު ބައިޑަން ދޫކޮށްލެއްވުމާ އެކު، ދެން އިންތިޚާބުގައި ވާދަ ކުރެއްވީ ކުރީގެ ނައިބު ރައީސް ކަމަލާ ހެރިސް އެވެ. އިންތިޚާބުގައި ކަމަލާގެ މައްޗަށް ކުރި ހޯއްދަަވައި، ޓްރަމްޕް ވަނީ ރިޔާސީ ދެ ވަނަ ދައުރެއް ހޯއްދަވައިފަ އެވެ. ދެ ވަަނަ ދައުރުގެ ހުވާ ޓްރަމްޕް ކުރެއްވީ މިއަހަރުގެ ޖަނަވަރީ މަހުގެ ތެރޭގަ އެވެ.