ޖަރުމަނާއި ޗައިނާގެ ގުޅުން ގޯސްވެ، ޖަރުމަނުގެ ފޮރިން މިނިސްޓަރު ޔޯހާން ވެޑެފުލް ޗައިނާ އަށް ކުރައްވަން އޮތް ދަތުރުފުޅު ކެންސަލް ކުރައްވައިފި އެވެ.

ޗައިނާ އިން ރަޝިޔާ އަށް މަދަދުވެރިވާ މައްސަލައިގައި، ޖަރުމަނުން ޗައިނާ އަށް ހަރުކަށި އިންޒާރުތައް ދީފައިވެ އެވެ. އަދި ޕެސިފިކް ސަރަހައްދު ގައި ޗައިނާ އިން ގެންގުޅޭ ހަރުކަށި އުސޫލު ތަކަކީ ޖަރުމަނުން އެކަމާ ދެކޮޅަށް ބަސް ބުނާ ކަންކަމެވެ.

މިފަހުން ދެ ގައުމުގެ ގުޅުން އިތުރަށް ގޯސްވީ ޗައިނާ އިން އެ ގައުމުގައި ނަގާ ރެއާ އާތު މިނެރަލްސް ބޭރު ކުރުން ކޮންޓްރޯލް ކުރުމާ ގުޅިގެންނެވެ. ވެޑެފުލްގެ ދަތުރުފުޅު ގައި ބައްދަލު ކުރައްވަން އެދިލެއްވި ބޭފުޅުންގެ ތެރެއިން ޗައިނާ އިން ބައްދަލުވުން ހަމަޖައްސައި ދިނީ ހަމައެކަނި ޗައިނާގެ ޚާރިޖީ ވަޒީރު ވާންގް ޔީ އާ އެވެ.

ޖަރުމަނުގެ ފޮރިން މިނިސްޓްރީ އިން ވަނީ ވަކި ތާރީޚެއް ނެތް ގޮތައް ވެޑެފުލްގެ ދަތުރުފުޅު ފަސް ކުރެވިފައިވާކަން "ހިތާމަޔާއެކު" ފާހަގަކޮށްފަ އެވެ. މިއީ ޖަރުމަނުގެ ޗާންސެލަރު ފްރެޑްރިކް މާޒްގެ ކެބިނެޓްގެ ވަޒީރަކު ޗައިނާ އަށް ކުރައްވާ ފުރަތަމަ ދަތުރުފުޅެވެ.

ވެޑެފުލް އަކީ ޗައިނާ މައްސަލައިގައި ޖަރުމަނުގެ ކުރީގެ ޚާރިޖީ ވަޒީރު އެނަލީނާ ބެއާބޮކް އަށްވުރެ ވެސް ހަރުކަށި ބޭފުޅެކެވެ. ބެއާބޮކް އަކީ ޗައިނާގެ ރައީސް ޝީ ޖިންގްޕިންގް އަކީ ޑިކްޓޭޓަރެއް ކަމަށް ވިދާޅުވި ބޭފުޅެކެވެ.