ރައްޔިތުންގެ ހައްގުަތައް ފޯރުކޮށް ނުދޭ ނަމަ މުޒާހަރާ ވެސް ކުރާނަން، ވެރިކަމުން ބާލަން ކުރަން ޖެހޭ ކަންކަން ވެސް ކުރާނަން: މައުރޫފް

ރައީސް ޑރ.މުހައްމަދު މުއިއްޒު ވެރިކަމަށް ވަޑައިގަންނަވަން ވައުދުވީ ގޮތަށް ރައްޔިތުންގެ ހައްގުަތައް ފޯރުކޮށް ނުދޭ ނަމަ އެމްޑީޕީން މުޒާހަރާ ވެސް ކުރާނެ ކަމަށާއި، ވެރިކަމުން ދުރުކުރުމަށް ވެސް މަސައްކަތް ކުރާނެ ކަމަށް ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެ އެވެ.

އޭނާ އެފަދައިން ވިދާޅުވީ ސަރުކާރުގެ ގެދޮރުވެރިކަމުގެ ސިޔާސަތު ފެއިލް ވާތީ އެކަމާއި މެދު ބޭއްވި އޯޕެން މައިކް ސެޝަން އެއްގައި ވާހަކަދައްކަވަމުންނެވެ.

މި އަހަރުގެ ބަޖެޓަކީ ބޯހިޔާވަހިކަމުގެ ބަޖެޓެއް ކަމަށް ބުނެ ރައީސް ޑރ.މުހައްމަދު މުއިއްޒު ދިވެހިންނަށް ދިނީ ލަނޑެއް ކަމަށާއި އެފަދައިން ދިވެހިންނަށް އަނިޔާދޭ ތަން ބަލަން ނުތިބެވޭނެ ކަމަށް މައުރޫފް ވަނީ ވިދާޅުވެފަ އެވެ. އޭނާ ވިދާޅުވީ ވެރިކަމަށް އަންނަން ރައީސް ޑރ.މުއިއްޒު އެންމެ ބޮޑަށް ދެއްކެވި ވާހަކަ އަކީ ބޯހިޔާވަހިކަމުގެ ވާހަކަ ކަމަށެވެ. އަދި މުއިއްޒު ވެރިކަމަށް ހޮވިވަޑައިގަތީ ވެސް އެ ވާހަކައިގެ ސަބަބުން ކަމަށް މައުރޫފް ވިދާޅުވި އެވެ.

ބޯހިޔާވަހިކަމާއި މެދު މުއިއްޒު ދެއްކެވި ވާހަކަ އަކީ އެއީ އޮޅުވާލަން ދެއްކެވި ވާހަކަ އެއްކަން މިއަދު އެނގޭ ކަމަށް މައުރޫފް ވިދާޅުވި އެވެ. އޭނާ ވިދާޅުވީ ވެރިކަމުގައި މުއިއްޒު ހުންނެވީ ދިވެހިންނަށް "ދޯކާ" ދީފައި ކަމަށާއި މުއިއްޒު ވެރިކަމުން ބާލަން ޖެހޭ ކަމަށެވެ. އަދި ވެރިކަމުގެ ނިޒާމް އޮތީ ވެރިކަމަށް އަންނަން ވާ ވައުދުތައް ނުފުއްދުމުން ވެރިކަމުގައި ހުންނަވާ ބޭފުޅާ ވެރިކަމުން ބޭލޭ ގޮތަށް ކަމަށް މައުރޫފް ވަނީ ވިދާޅުވެފަ އެވެ.

"2025 ވަނަ އަަހަރުގެ ބަޖެޓަކީ ބޯހިޔާވަހިކަމުގެ ބޯހިޔާވަހިކަމުގެ ބަޖެޓް ކަމުގައި ވިދާޅުވެ އަހަރު ހުސްވީ އެއްކަމެއް ނުކޮށް. ކީއްކުރަންތޯ ދިވެހިންނަށް އެވަރު ލަނޑެއް ތިދެނީ. ކީއްކުރަންތޯ އެހާލުގައި ތި ޖައްސަވަނީ. މިއީ އަޅުގަނޑުމެންގެ ކަންބޮޑުވުމަކީ. އަޅުގަނޑުމެން ސިޔާސީ މީހުން މިކަން މިހެން ހިނގާ އިރު ބަލަން ނުތިބެވޭނެ. އެހެންވެގެން އެމްޑީޕީން ހައްގުތައް ހޯދަން ތަކުރާރުކޮށް ނުކުންނަނީ." މައުރޫފް ވިދާޅުވި އެވެ.

ހަގީގީ މާނައިގައި ގޯއްޗާއި ފްލެޓްގެ މަސައްކަތް އާއްމުން ބޭނުންވާ ގޮތަށް މަސައްކަތް ކުރާ ހަމައެކަނި ޕާޓީ އަކީ އެމްޑީޕީ ކަމަށް އޭނާ ވިދާޅުވި އެވެ. އެގޮތުން ރާއްޖޭގެ ރަށްތަކުގައި އެންމެ ފުރަތަމަ ފްލެޓް އަޅަން ނިންމީ އެމްޑީޕީ އިން ކަމަށާއި އެކަން ކުރެވިދާނެ ކަމާއި މެދު ވެސް އޭރުގެ އދިިކޮޅު ފަރާތްތަކުން ސުވާލު އުފެއްދި ކަމަށް މައުރޫފް ވިދާޅުވި އެވެ. އަދި ނިމިދިޔަ އެމްޑީޕީގެ ސަރުކާރުގައި ވެސް ބޯހިޔާވަހިކަމުގެ މައްސަލަ އަށް ހައްލު ލިބޭނެ ރަނގަޅު ސިޔާސަތުތަކެއް އެކުލަވާލާފައިވާ ކަމަށް މައުރޫފް ވިދާޅުވި އެވެ.

1 އޮކްޓޯބަރގައި ކާނިވާ ސަރަހައްދަށް އެއްވެ ބޯހިޔާވަހިކަމުގެ މައްސަަލައިގައި ހުރި ކަންބޮޑުވުންތައް ފާޅުކުރުމަށް އެމްޑީޕީން ދަނީ ތައްޔާރުވަމުންނެވެ.