ސިނގިރޭޓު ކޮންޓެއިނަރު ވަގަށް ނެގި މައްސަލައިގައި އިތުރު 3 މީހަކު ހައްޔަރުކޮށްފި

މޯލްޑިވްސް ޕޯޓްސް ލިމިޓެޑްގެ ހުޅުމާލެ އިންޓަރނޭޝަނަލް ޓާރމިނަލްގައި ބަހައްޓާފައި ހުރި ސިނގިރޭޓު ކޮންޓެއިނަރު ވަގަށް ނެގި މައްސަލައިގައި އިތުރު 3 މީހަކު ހައްޔަރު ކޮށްފި އެވެ.

މި މައްސަލައިގައި ހައްޔަރު ކުރެވުނު ފަރާތްތަކުގެ ތެރޭގައި ހިމެނެނީ ހދ. ވައިކަރަދޫ، ނޫރަލީގޭ އަޙްމަދު ޝަހީމް (42އ)، ސ. ހިތަދޫ، ޗާނދަނީގޭ ޙުސައިން ސާމިޙު (35އ) އަދި ހ. ރުމޭނިޔާ، އަޙްމަދު ފިރުސާން (35އ) އެވެ. މި 3 ފަރާތް ހައްޔަރުކޮށްފައިވަނީ 2025 އޮކްޓޯބަރު 24 ވަނަ ދުވަހުގެ ވަގުތެއްގައި ކަމަށް ފުލުހުން ބުނެ އެވެ.

Advertisement

ފުލުހުން ބުނީ، ސިނގިރޭޓު ކޮންޓެއިނަރު ވަގަށް ނެގި މައްސަލައަކީ 2025 އެޕްރީލް 26 ވަނަ ދުވަހު މޯލްޑިވްސް ކަސްޓަމްސް ސަރވިސްއިން ހިފަހައްޓާފައި ހުރި 2 ކޮންޓެއިނަރެއްގެ ސިނގިރޭޓް ވަގަށް ނެގުމާ ގުޅިގެން 2025 އޮކްޓޯބަރު 09 ވަނަ ދުވަހު ފުލުހުންނަށް ހުށަހެޅުނު މައްސަލައް ކަމަށެވެ.

ހައްޔަރުކުރެވުނު ފަރާތްތަކުގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، އަޙްމަދު ޝަހީމް އާއި ޙުސައިން ސާމިޙު 7 ދުވަހުގެ މުއްދަތަށް ބަންދުކުރުމަށް ކޯޓުން ވަނީ އަމުރުކޮށްފަ އެވެ. އަދި އަޙްމަދު ފިރުސާން 5 ދުވަހުގެ މުއްދަތަށް ބަންދު ކުރުމަށް ވެސް ވަނީ އަމުރު ކޮށްފައެވެ.

މި މައްސަލައާއި ގުޅިގެން އެންމެ ފުރަތަމަ ހައްޔަރު ކޮށްފައިވަނީ 4 މީހެކެވެ. އެއީ އެޕޯލޯ ހޯލްޑިންގްސްގެ ވެރިޔާ މުހައްމަދު ވަހީދު (ދިގަލި) އާއި ލޮޓަސް ފިހާރައިގެ ވެރިޔާ އަހުމަދު އާރިފް (އާއްޓޭ) އާއި ހުޅުމާލެ ބަނދަރުގައި އިސްކޮށް މިހާރު މަސައްކަތް ކުރި ކަސްޓަމްސްގެ އޮފިސަރު ޒިވާރު އިސްމާއިލްގެ އިތުރުން ކަސްޓަމްސްގެ ކުރީގެ ސީނިއާ ސުޕްރިންޓެންޑެންޓް މުއާޒް އަލީ އެވެ.

މި ހަތަރު މީހުންގެ ފަހުން ސިނގިރޭޓް ދެ ކޮންޓެއިނާ އުފުލި ދޯނީގެ ކެޕްޓަން، ނ. މިލަދޫ، ކެނެރީގެ، އާދަމް ވަހީދާއި ކ. ތުލުސްދޫ، ލިންކް، ހަސަން އަބްދުއްރަހްމާން ނަމަކަށް ކިޔާ މީހަކު ވެސް ވަނީ ހައްޔަރުކޮށްފައެވެ. އަދި މި މައްސަލައާއި ގުޅިގެން 12 މީހަކު ރާއްޖޭން ފުރުން ވެސް ވަނީ މަނާކޮށްފައެވެ.

މި މައްސަލައިގައި ހައްޔަރުކުރެވުނު މުޙައްމަދު ވަޙީދުގެ ބަންދާމެދު ގޮތެއް ނިންމުމަށް ދެވަނަ ފަހަރަށް ކޯޓަށް ހާޒިރުކުރުމުން، އޭނާ ޝަރީޢަތް ނިމެންދެން ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައި ކަމަށް ފުލުހުން ބުނެފައިވެ އެވެ.