ހުޅުމާލޭ އިންޓަރނޭޝަނަލް ޓާރމިނަލްގައި ބަހައްޓާފައި ހުރި ދެ ކޮންޓެއިނަރުގެ ސިނގިރޭޓު ވަގަށް ނެގި މައްސަލައިގެ ތުހުމަތުގައި ބަންގްލަދޭޝް ރައްޔިތަކު ހައްޔަރުކޮށްފި އެވެ.

މި މައްސަލައިގައި ހައްޔަރުކޮށްފައިވަނީ ބަންގްލަދޭޝްއަށް ނިސްބަތްވާ 36 އަހަރުގެ މުޙައްމަދު އަލަމިން މިއާ އެވެ. އޭނާ ހައްޔަރުކޮށްފައިވަނީ މި މަހުގެ 12 ވަނަ ދުވަހު އެވެ.

މި މައްސަލައިގައި ހައްޔަރުކުރި މީހާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ކޯޓުން ވަނީ ޝަރީއަތް ނިމެންދެން ބަންދުކުރުމަށް އަމުރުކޮށްފަ އެވެ. މި މައްސަލައިގެ ތަހުގީގު މިހާރު ކުރިއަށްދާއިރު، މިހާތަނަށް ޖުމުލަ 10 މީހަކު ހައްޔަރުކޮށް ތަހުގީގު ކުރަމުންދާކަން ފުލުހުން ހާމަކުރެ އެވެ.

މި މައްސަލައިގައި މީގެ ކުރިން ހައްޔަރު ކުރި މީހުންގެ ތެރޭގައި ވައްކަން ރާވައި ހިންގުމުގައި އިސްކޮށް ހަރަކާތްތެރިވި މީހުންނާއި، ވައްކަން ކުރުމުގައި އަމަލީ ގޮތުން ބައިވެރިވި މީހުންގެ އިތުރުން، ކޮންޓެއިނަރު ވަގަށް ގެންދިއުމުގައި ބޭނުންކުރި ދޯނީގައި އުޅުނު މީހުންނާ އަދި ވައްކަން ކުރުމުގައި އެކި މަރުހަލާގައި ބައިވެރިވެފައިވާ ކަމަށް ތަހުގީގުން ހޯދުނު މީހުން ހިމެނެ އެވެ.

މި މައްސަލައިގައި ބައެއް މީހުން ފުރުންވެސް މަނާކޮށްފައިވެ އެވެ. މައްސަލައިގެ ތަހުގީގުގެ ތެރެއިން އުޅަނދުތަކެއް ބަލައި ފާސްކޮށް މާލެ، ހުޅުމާލެ އަދި ތިލަފުށީގެ ބައެއް ތަންތަން ބަލައި ފާސްކޮށްފައިވެ އެވެ.