އޮކްޓޯބަރ 31 އަދި ނޮވެމްބަރ 17 ވަނަ ދުވަހު ބާއްވާ ބޮޑު އެއްވުމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޒުވާނުންގެ ހިތްވަރުން ޚާއްސަ ތައްޔާރީތަކެއް ވުމަށް ޒުވާނުންގެ ހިތްވަރު ފާސްކޮށްފިއެވެ.

އެމްޑީޕީގެ ޒުވާނުންގެ ހިތްވަރުން އެފަދައިން ފާސްކޮށްފައި ވަނީ ބުރާސްފަތި ދުވަހުގެ ރޭ ބޭއްވި އެމްޑީޕީގެ ޒުވާނުންގެ ހިތްވަރުގެ ބައްދަލުވުމުގައެވެ. އެ ބައްދަލުވުމަށް ޒުވާނުންގެ ހިތްވަރުން ގދ. އަތޮޅުގެ ކައުންސިލް މެމްބަރު އަލީ މުއައްވިޒު ވަނީ އޮކްޓޯބަރ 31 އަދި ނޮވެމްބަރ 17 ވަނަ ދުވަހު ބާއްވާ ބޮޑު އެއްވުމަށް ތައްޔާރުވުމުގައި އެ ކައުންސިލްގެ ދައުރު އިތުރުކުރުމަށް ގޮވާލާ ހުށަހެޅުމެއް ހުށަހަޅުއްވާފައެވެ. އެ ހުށަހެޅުން ފާސްކުރީ ޒުވާނުންގެ ހިތްވަރުގެ ބައްދަލުވުމުގައި ބައިވެރިވި ހުރިހާ މެމްބަރުންގެ އިއްތިފާގުންނެވެ.

ބުރާސްފަތި ދުވަހުގެ ރޭ، ޒުވާނުންގެ ހިތްވަރުން ވަނީ ކޯލް ސެންޓަރ އެއް ޤާއިމްކުރުމަށާއި، މެދުކެނޑުމެއް ނެތި އެ ދެ އެއްވުން ކުރިއެރުވުމަށް ޒުވާނުންގެ ހިތްވަރުން އިސްނަގައިގެން ހަރަކާތްތެރިވުމަށް ވަނީ ފާސްކޮށްފައެވެ. އަދި ފޯކަސް ކޮށްގެން ވަކި ވަކި މީހުންނަށް ވެސް ހަރަކާތުގެ މުހިންމުކަން އަންގާދިނުމަށް މަސައްކަތް ކުރުމަށް ނިންމާފައިވެއެވެ.

"އެއްވެސް ކުށެއް ނެތި ޒުވާނުން ހައްޔަރު ކުރަމުންދަނީ. އެއީ މި ސަރުކާރުގެ ވަރަށް ފިނޑި އަމަލެއް. އަޅުގަނޑުމެން މިކަން ކުށްވެރިކުރަން. އެހެންވީމަ އަޅުގަނޑު ހުށަހަޅަން މިހާރަށް ވުރެ ފުޅާކޮށް މަސައްކަތް ކުރަން" އަލީ މުއައްވިޒު ވިދާޅުވިއެވެ.

މި ސަރުކާރު ވެރިކަމަށް އައުމަށްޓަކާ ޒުވާނުންނަށް ވީ އެއްވެސް ވައުދެއް ނުފުއްދާ ޒުވާނުން ބިކަ ކުރަމުންދާ ކަަމަށް އެ ހުށަހެޅުމުގައި ފާހަގަކޮށްފައިވެއެވެ. ވެރިކަމަށް ދެ އަހަރު ވާން ކައިރިވެފައިވާ އިރު ޒުވާނުން މަގުމަތިކޮށްފައިވާ ކަމަށް ވެސް އެ ހުށަހެޅުމުގައިވެއެވެ. މީގެ އިތުރުން ޒުވާނުންގެ ހިތްވަރުގެ ރައީސް ރިފްގާ ޝަހީމް ވަނީ މިފަދަ ކަންކަމުގައި ޒުވާނުން ހިތްވަރު ނެރުމުގެ މުހިންމު ކަމަށް އަޅުވާލައްވާފައެވެ. އަދި ސަރުކާރު ޖަވާބުދާރީ ނުކޮށް ތިބެވެން ނެތް ކަމަށް ރިފްގާ ވިދާޅުވިއެވެ.

"އަޅުގަނޑުމެން އެބަ ޖެހޭ އަޑު އުފުލަން. ނުދައްކަންޏާ ހިއެއް ނުވޭ މި ދާގޮތުން އަތުފަތު ޖެހޭނެ ހެނެއް." ރިފްގާ ވިދާޅުވިއެވެ.

އެ ބައްދަލުވުމުގައި ވާހަކަދައްކަވަމުން، އެމްޑީޕީގެ އަންހެނުންގެ ރޫހުގެ ނައިބު ރައީސް މަރިޔަމް އީމާ ޝަފީގް ވަނީ ޒުވާނުންގެ ކަންބޮޑުވުންތައް ބެލުމަށް ދާދިފަހުން ދިރާސާ އެއް ކޮށްފައިވާކަމަށާއި، އެ ދިރާސާއިން އެނގުނު ގޮތުގައި މިއަދު ޒުވާނުން ތިބީ ބިކަވެފައި ކަމަށް އީމާ ވަނީ ފާހަގަ ކުރައްވާފައެވެ.

ގާތްގަނޑަކަށް 500 އެއްހާ މީހުން ދެ ދުވަހުގެ ތެރޭގައި އެ ސަރވޭގައި ބައިވެރިވި އިރު ޒުވާނުންގެ ޝަކުވާތައް އިންތިހާ އަށް ހުރިކަން އެ ސަރވޭ އިން ހާމަވި ކަމަށް އީމާ ވިދާޅުވިއެވެ. ޖިސްމާނީ އަދި ނަފްސާނީ ދުޅަހެޔޮކަން ނެތުމާއި، ތަކެތީގެ އަގު ބޮޑުވުން ފަދަ ކަންކަމުގެ ސަބަބުން ޒުވާނުންގެ ދިރިއުޅުމުގެ ހާލަތު ވަނީ އިންތިހާ އަށް ދަށްވެފައި ކަމަށް އީމާ ވިދާޅުވިއެވެ.

"ފެން ބިލް ވަނީ ބޮޑު. ކަރަންޓު ބިލް ވަނީ ބޮޑު. ކިހިނެތްތޯ ޒުވާނުން ދެކޮޅު ޖައްސާނީ. އެބަ އަހާ ކީއްވެހޭ ޒުވާނުން ގިނަ ދަރިން ނުހޯދަނީ. ކިހިނެތްތޯ ދަރިން ހޯދަނީ؟ މި ހުރީ ހާލަތު." އީމާ ވިދާޅުވިއެވެ.

އެ ބައްދަލުވުމުގައި ޤައުމީ މަޖިލީހުގެ އެހެން މެމްބަރުން ވެސް ވަނީ ވާހަކަދައްކާފައެވެ. ހުރިހާ މެމްބަރުންގެ ވާހަކައިގައި ވެސް ޒުވާނުންނާއި ޤައުމުގެ ހާލަތު އިންތިހާ އަށް ދަށަށް ދާކަން ފާހަގަކޮށްފައިވެއެވެ. އަދި ޤައުމުގެ ކަންކަން ނިންމުމުގައި ޒުވާނުން ބައިވެރި ނުކުރުމާއި، ޒުވާނުންނަށް ދޮގު ވައުދުތައް ވުން ފަދަ ކަންބޮޑުވާ އެތައް ކަމެއް ހުރި ކަމަށް ޒުވާނުންގެ ހިތްވަރުގެ މެމްބަރުން ވަނީ ފާހަގަކޮށްފައެވެ.