ވޯލްޑްކަޕް ކޮލިފައިން: އެއްވަރުވެ، ކޮލިފައިވުމަށް އާޖެންޓީނާއަށް އިތުރު ހުރަސްތަކެއް
ވެނެޒުއޭލާއާ އާޖެންޓީނާ ވާދަކުރި މެޗު ނިމުނީ 1-1 އަކުން އެއްވަރުވެގެން
އާޖެންޓީނާއާ ވެނެޒުއޭލާ ވާދަކުރި މެޗުގެ ތެރެއިން
2018 ވަނަ އަހަރު އޮންނަ ފީފާ ވޯލްޑްކަޕް ކޮލިފައިންގައި ދުނިޔޭގެ ފުޓުބޯޅައިގެ ގަދަ ބާރެއް ކަމަށްވާ އާޖެންޓީނާ ކުޅުނު މެޗުން އެ ޓީމު އެއްވަރުވެއްޖެއެވެ.
އާޖެންޓީނާއިން އަމިއްލަ ގައުމުގައި ވެނެޒުއޭލާއާ ދެކޮޅަށް ކުޅުނު މެޗުން އެއްވަރުވެފައި ވަނީ 1-1 ގެ ނަތީޖާއަކުންނެވެ. ވެނެޒުއޭލާއަކީ މިވަގުތު ކޮމްބެލްގެ ވޯލްޑްކަޕް ކޮލިފައިން ގްރޫޕުގެ އެންމެ ފުލުގައި އޮތް ޓީމެވެ. މުޅި މެޗުވެސް ޑޮމިނޭޓުކޮށް މޮޅު ކުޅުމެއް އާޖެންޓީނާއިން ދެއްކި ނަމަވެސް އެ ޓީމަށް މި މެޗުން ތިން ޕޮއިންޓް ހޯދިފައެއް ނުވެއެވެ.
މެޗުގެ ފުރަތަމަ ހަމަލާ އުފެއްދީވެސް އާޖެންޓީނާއިންނެވެ. އެގޮތުން މަޝެރާނޯ ތަނަވަސްކޮށްދިން ފުރުސަތެއްގައި މައުރޯ އިކާޑީ ފޮނުވާލި ހަމަލާ ވެނެޒުއޭލާގެ ކީޕަރުވަނީ ހުށިޔާރު ކަމާއެކު ދިފާއުކޮށްފައެވެ. މެޗުގެ 22 ވަނަ މިނުޓުގައި ޒުވާން ފޯވާޑް ޕައުލޯ ޑިބާލާ ފޮނުވާލި ހަމަލާގެވެސް ހުރަހަކަށްވީ ވެނެޒުއޭލާގެ ޒުވާން ކީޕަރު ފަރިނޭޒްއެވެ. އާޖެންޓީނާގެ ފޯވާޑުންނަށް ވެނެޒުއޭލާގެ ގޯލު ފުރަތަމަ ހާފުގައި ހުޅުވާލެވިފައި ނުވާއިރު މި ހާފް ނިމިގެން ދިޔައީ 0-0 ގެ ނަތީޖާއަކުން ދެ ޓީމު އެއްވަރުވެ އޮވެގެންނެވެ.
ދެވަނަ ހާފު ފެށިގެންވެސް އާޖެންޓީނާއިން މޮޅު ކުޅުމެއް ދެއްކި ނަމަވެސް މެޗުގެ ފުރަތަމަ ލަނޑު ޖަހާ ލީޑު ނެގީ ވެނެޒުއޭލާއިންނެވެ. އެގޮތުން މެޗުގެ 50 ވަނަ މިނުޓުގައި އާޖެންޓީނާގެ މިޑްފީލްޑުން ހެދުނު ގޯހެއްގެ ފައިދާ ނަގައި ވެނެޒުއޭލާގެ ފޯވާޑް މުރީލޯ ވަނީ އެ ޓީމަށް ލީޑު ނަގައިދީފައެވެ. އެހެންނަމަވެސް އާޖެންޓީނާއިން ވަނީ އޭގެ ހަތަރު މިނުޓު ފަހުން މެޗުގެ ނަތީޖާ ހަމަހަމަކޮށްފައެވެ. އެ ޓީމުގެ ޑިފެންޑަރު އަކޫނާ ނަގައިދިން ހުރަހެއް ވެނަޒުއޭލާގެ ޑިފެންޑަރެއްގެ އަތުން ބައިކޮޅަށް ވަދެގެން އާޖެންޓީނާއިން މެޗުގެ ނަތީޖާ ހަމަހަމަކުރިއެވެ. މި ލަނޑަށް ފަހުވެސް އާޖެންޓީނާއިން އެޓޭކިން ގޭމެއް ފެނުނު ނަމަވެސް ދެވަނަ ލަނޑެއް އެ ޓީމަށް ޖެހޭގޮތް ވަނީ ނުވެފައެވެ.
މި މެޗު އެއްވަރުވުމާ ވިދިގެން އާޖެންޓީނާއިން އަންނަ އަހަރުގެ ވޯލްޑްކަޕަށް ކޮލިފައިވުމަށް ކުރަމުން އަންނަ މަސައްކަތަށް އިތުރު ހުރަސްތަކެއް ވަނީ ކުރިމަތިވެފައެވެ. ކުޅުނު 16 މެޗުން ލިބުނު 24 ޕޮއިންޓާއެކު އާޖެންޓީނާއޮތީ ކޮމްބެލް ވޯލްޑްކަޕް ކޮލިފައިން ގްރޫޕުގެ ފަސްވަނައިގައެވެ. އަދި ވެނެޒުއޭލާ އޮތީ ކުޅުނު 16 މެޗުން ލިބުނު އަށް ޕޮއިންޓާއެކު ތާވަލުގެ ފުލުގައެވެ.
