ދާރުލް އާސާރުން އުކާލި ކުނި: މިނިސްޓަރު ވިދާޅުވަނީ ކުނި ނައްތާލީ މާލިއްޔަތު ޤާނޫނާއި އެއްގޮތަށް ކަމަށް
ދާރުލްއާސާރުން 12 ލޮރީގެ ކުނި ބޭރުކުރި އިރު އެތަކެތީގެ ފޮޓޯ އާއި ވީޑިއޯ ނަގާފައިވާކަން ވަޒީރު ސާފުކޮށް ނުދެއްވި
ގައުމީ ދާރުލްއާސާރު ދޮރުމަތީގައި ސަތަރިއަޅާ ބަންދުކޮށްފައި
ދާރުލްއާސާރު އާރާސްތު ކުރުމުގެ ތެރެއިން އުކާލި ތަކެތީގެ އަގާއި، އެތަކެތި އުކާލި ގޮތާއި މެދު ތަކުރާރުކޮށް ސުވާލުކުރުމުން ވެސް މިނިސްޓަރ އޮފް ދިވެހި ލެންގުއެޖް، ކަލްޗަރ އެންޑް ހެރިޓޭޖް، އާދަމް ނަސީރު އިބްރާހިމް އެ ސުވާލުތަކަށް ސާފު ޖަވާބެއް ނުދެއްވާ ވިދާޅުވީ ކުނި ނައްތާލީ މާލިއްޔަތު ގާނޫނާއި އެއްގޮތްވާ ގޮތައް ކަމަށެވެ.
ހޯމަ ދުވަހުގެ ޖަލްސާ ގައި ތޮއްޑޫ ދާއިރާގެ މެމްބަރު ހުސައިން ސަމީރު ވަނީ ވަޒިރާއި ދެ ސުވާލެއް ކުރައްވާފައެވެ. އެ ދެ ސުވާލަކީ:
- ދާރުލްއާސާރުގެ އެތެރެ އިތުރަށް ރަނގަޅުކުރަން މަސައްކަތް ފެށި އިރު 12 ލޮރީގެ ކުނި ދާރުލް އާސާރުން ބޭރު ކުރި ކަމށް 16 އެޕްރިލް 2025ގައި ވަޒީރު ވިދާޅުވެފައިވާތީ އެ ތަކެތީގެ ރެކޯޑްތައް ނުވަތަ ފޮޓޯ އާއި ވީޑިއޯ ނަގާފައިވޭތޯ ސާފުކުރުމަށް ކޮށްފައިވޭތޯ؟
- ދާރުލްއާސާރުގައި ހުރި އާސާރީ ތަކެތީގެ ތެރެއިން އެއްވެސް އެއްޗެއް ނައްތާލާފައި ނުވާކަން ޔަޤީން ކުރެއްވިންތޯ؟
އެ ސުވާލުތަކަށް ޖަވާބު ދެއްވަމުން އާދަމް ނަސީރު ވިދާޅުވީ ދާރުލްއާސާރު މަރާމާތުގެ މަސައްކަތް ކޮށްފައިވާނީ ޤާނޫނާއި ޚިލާފު ނުވާ ގޮތަށް ކަމަށެވެ.
ޤައުމީ ދާރުލްއާސާރު ހުންނަ އިމާރާތުގެ މަސައްކަތް ކުރުމަށް ދާރުލް އާސާރުގެ އެތެރެ އާއި ބޭރު، އަދި ދާރުލް އާސާރުގެ ގޯތި ތެރޭގައި ހުރި ކުނި ވެސް އުކާލާފައިވާ ކަމަށް ވަޒީރު ވަނީ ވިދާޅުވެފައެވެ. ކުނި ކަމަށް ކަނޑައަޅަން ޖެހޭ ތަކެތި ނައްތާލާފައި ވާނީ ދައުލަތުގެ މާލިއްޔަތު ޤާނޫނާއި އެއްގޮތަށް ކަމަށް އާދަމް ނަސީރު ވަނީ ވިދާޅުވެފައެވެ.
ދާރުލްއާސާރު އާރާސްތުކުރުމުގެ މަސައްކަތުގެ ތެރެއިން ދާރުލްއާސާރުގައި ހުރި އެއްވެސް ތަރިކަ އެއް ގެއްލިފައި ނުވާކަން ޔަޤީންކުރައްވާފައިވާނެ ކަމަށް ވެސް ވަޒީރު ވަނީ ވިދާޅުވިއެވެ. ވަޒީރުގެ ޖަވާބުގައި އުކާލި ތަކެތީގެ ފޮޓޯ އާއި ވީޑިއޯ ނަގާފައިވާނެތޯ ސާފުކޮށެއް ނުދެއްވައެވެ. އެހެންކަމުންހޯމަ ދުވަހުގެ ޖަލްސާގައި އިތުރު ސުވާލުކުރުމަށް ފުރުސަތު ލިބުމުން ސަމީރު ވަނީ އެ ސުވާލު ތަކުރާރުކުރައްވާފައެވެ.
މީގެ އިތުރުން އުކާލި ކުނީގެ އަގާއި ގުޅޭ ގޮތުން ސަމީރު ވަނީ ސުވާލުކުރައްވާފައެވެ. 12 ލޮރީ ކުނި އުކާލި އިރު އެ ތަކެތީގެ ފަލްސަފީ އަގު ކަނޑައެޅި ގޮތާއި އެއީ ނައްތާލިޔަސް އެންމެ ރަނގަޅު ކުނި ކަމަށް ނިންމި ގޮތާއި މެދު ވެސް އޭނާ ވަނީ ސުވާލު ކުރައްވާފައެވެ. މެމްބަރުގެ ސުވާލާއި ގުޅިގެން އާދަމް ނަސީރު ވަނީ އެ ސުވާލަކީ އާ ސުވާލެއްތޯ ނުވަތަ އޭނާގެ ފުރަތަމަ ޖަވާބާއި ގުޅޭ ސުވާލެއްތޯ ސާފުކުރައްވަން ބޭނުންވާ ކަމަށް ވިދާޅުވެފައެވެ.
ވަޒީރު އެފަދައިން ވިދާޅުވުމުން މަޖިލީހުގެ ހޯމަ ދުވަހުގެ ރިޔާސަތު ބެލެހެއްޓެވި މަޖިލީހުގެ ނައިބު ރައީސް އަހުމަދު ނާޒިމް ވެސް ވަނީ ވަޒީރު ސުވާލަށް އެއްކޮށް ޖަވާބު ނުދެއްވާކަން ފާހަގަކުރައްވާފައެވެ. ވަޒީރުގެ ޖަވާބުގައި އުކާލި ތަކެތީގެ ފޮޓޯ އާއި ވީޑިއޯ ނަގާފައިވާނެތޯ ސާފުކޮށްދެއްވާފައި ނުވާތީ މެމްބަރު ސަމީރު އޭނާގެ ސުވާލު ތަކުރާރުކުރެއްވީ ކަމަށް ވެސް ނާޒިމް ވިދާޅުވިއެވެ.
ނާޒިމް ވަޒީރު ސުވާލަށް ޖަވާބު ނުދެއްވާކަން ސަމާލުކަމަށް ގެނައުމުން އާދަމް ނަސީރު ވަނީ އުކާލި ތަކެތި އުކާލީ އުސޫލާއި އެއްގޮތަށް ކަމަށް ވުމުން، ކުނި އުކާލުމުގައި ޤާނޫނާއި އެއްގޮތަށް ފުރިހަމަ ކުރަން ޖެހޭ ކަންކަން ފުރިހަމަކޮށްފައިވާނެ ކަމަށެވެ. ނަމަވެސް އުކާލި ތަކެތީގެ އަގު ކަނޑައެޅި ގޮތެއް ސާފުކޮށެއް ނުދެއްވައެވެ. އަދި އެތަކެތި އުކާލިއަސް އެންމެ ރަނގަޅުކަމަށް ނިންމިތޯ އާއި އެތަކެތީގެ ފޮޓޯ އާއި ވީޑިއޯ ނަގާ ރައްކާކުރެއްވި ގޮތާއި މެދު މައުލޫމާތު ސާފުކޮށެއް ނުދެއްވައެވެ.
