13.6 މިލިއަން ސިނގިރެޓް ވަގަށް ނެގި މައްސަލައިގައި އިދާރާތައް 241 ކޮމިޓީއަށް ހާޒިރުކުރަން ނިންމުމަށްފަހު ތަހުގީގަށް ހުރަސް އެޅިދާނެކަމަށް ބުނެ ކުއްލި ގޮތަކަށް ކޮމިޓީ ކެންސަލް ކޮށްފިއެވެ.

މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ހުޅުމާލޭ އިންޓަރނޭޝަނަލް ޕޯޓުގައި ހުއްޓާ 40 ފޫޓުގެ ދެ ކޮންޓެއިނަރ ގައި ހުރި 13 މިލިއަނަށްވުރެ ގިނަ ސިނގިރޭޓު ވަގަށް ނެގި މައްސަލައިގައި 4 މީހަކު ހައްޔަރުކޮށް 12 މީހެއްގެ ފުރުން ވަނީ މަނާކޮށްފައެވެ. އަދި މި މައްސަލައިގައި ކަސްޓަމްސްގެ މުވައްޒަފަކާއި އެމްޕީއެލްގެ 6 މުވައްޒަފެއްގެ އިތުރުން މިފްކޯގެ ޖެނެރަލް މެނޭޖަރު މުއާޒް އަލީ ވަނީ ސަސްޕެންޑް ކޮށްފައެވެ.

ރާއްޖެއެމްވީއަށް މައުލޫމާތު ލިބުނު ގޮތުގައި ކަސްޓަމްސް އިން މިދިޔަ އެޕްރީލް މަހު ހިފެހެއްޓި 40 ފޫޓުގެ ދެ ކޮންޓެއިނަރުގެ ސިނގިރެޓް އެމްޕީއެލް ހުޅުމާލެ ޕޯޓުގައި ހުއްޓާ ވަގަށް ނެގި މައްސަލައިގައި ކަމާއި ގުޅުންހުރި އިދާރާތައް ހާޒިރުކުރުމަށް ނިންމިއެވެ. އެގޮތުން 241 ކޮމިޓީގެ ބައްދަލުވުމެއް އާދީއްތަ ދުވަހުގެ މެންދުރު 2:00 އަށް ތާވަލުކުރި ނަމަވެސް، ފަހުން ބައްދަލުވުން ވަނީ ކެންސަލްކޮށްފައެވެ.

މަޖިލީހުގެ އިދާރާ އިން ބުނީ ކޮމިޓީ ކެންސަލް ކުރީ ކޮމިޓީ އިން ދިރާސާކުރުމަށް ނިންމާފައިވާ މި މައްސަލައާއި ގުޅިގެން މިވަގުތު ކޮމިޓީގެ ބައްދަލުވުމެއް ބާއްވައިފިނަމަ އެ މައްސަލައިގެ ތަހުގީގަށް ހުރަސް އެޅިދަނެކަމަށް ބެލެވޭތީ ބައްދަލުވުން 1 ހަފްތާއަށް ފަސްކުރެވިފައިވާ ކަމަށެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި 13.6 މިލިއަން ސިނގިރެޓް ވަގަށް ނެގި މައްސަލައިގައި 241 ކޮމިޓީގެ ބައްދަލުވުމެއް ބާއްވަން އެ ކޮމިޓީ އިން ނިންމީ މިދިޔަ އަންގާރަ ދުވަހުއެވެ. އަދި އެޖެންޑާކޮށްފައި އޮތީ ކޮމިޓީ އިން ދިރާސާކުރަމުން އަންނަ މައްސަލައަކާއި ގުޅޭގޮތުން ބާއްވާ ބައްދަލުވުމެއް ކަމަށް ބުނެފައެވެ.

އެގޮތުން ކޮމިޓީއަށް ފުރަތަމަ ހާޒިރުކުރަން ނިންމީ މިނިސްޓްރީ އޮފް ހޯމްލޭންޑް އެންޑް ސެކިއުރިޓީގެ ބޭފުޅުންނެވެ. އޭގެ ފަހުން ފުލުހުންނާއި، ކަސްޓަމްސް އަދި އެމްޕީއެލް ހާޒިރުކުރުމަށް އޮތީ ނިންމާފައެވެ.

ވަގަށް ސިނގިރެޓް ނެގި މައްސަލައިގައި ހައްޔަރުކޮށްފައިވަނީ ވިޔަފާރިވެރިޔާ މުހައްމަދު ވަހީދު (ދިގަލި) އަދި ލޮޓަސްގެ ވެރިޔާ އަހުމަދު އާރިފް (އާއްޓޭ) ގެ އިތުރުން މިފްކޯގެ ޖެނެރަލް މެނޭޖަރު މުއާޒް އަލީ އަދި ކަސްޓަމްސްގެ ސުޕްރިންޓެންޑެންޓް ޒިވާރު އިސްމާއިލް އެވެ.

މި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން، އަހުމަދު އާރިފް އާއި ޒިވާރު އިސްމާއިލް 15 ދުވަހަށް އަދި މުހައްމަދު ވަހީދު 10 ދުވަހަށް އަދި މުއާޒު އަލީ 5 ދުވަހަށް ބަންދު ކުރުމަށް ކްރިމިނަލް ކޯޓުން ވަނީ އަމުރުކޮށްފައެވެ.

13 މިލިއަން ސިނގިރޭޓް ވަގައް ނެގުމުގެ ހާދިސާ ހިނގާފައިވަނީ 26 އޭޕްރިލް 2025 ގައެވެ. މި މައްސަލަ ރަސްމީކޮށް ފުލުހައް ރިޕޯޓު ކޮށްފައި ވަނީ 9 އޮކްޓޯބަރު 2025 ގައެވެ.

ވަގައް ނެގި މުދަލުގެ ތެރޭގައި ހިމެނެނީ ކަސްޓަމްސް ސާވިސް އިން ހިފަހައްޓާ އެމްޕީއެލްގެ ބެލުމުގެ ދަށުގައި ބެހެއްޓިފައިވާ 1،360 ކޭސް (ގާާތްގަނޑަކަށް 13.6 މިލިއަން ސިނގިރޭޓް) އެވެ. މި އަދަދުގެ ސިނގިރޭޓުން ސަރުކާރަށް އިމްޕޯޓް ޑިއުޓީގެ ގޮތުގައި 100 މިލިއަން ރުފިޔާ އަށް ވުރެ ގިނަ އިން ލިބެން ޖެހޭނެ ކަމަށް ބެލެވެއެވެ.