ހަމާސް އިން ހަވާލު ކުރި ހަށިގަނޑު ތަކުގެ ތެރެއިން އެކަކީ ރަހީނުންގެ ތެރެއިން މީހެއް ނޫން ކަމަށް އިސްރާއީލް އިން ބުނެފި

ފަލަސްޠީނުގެ މިނިވަން ކަމަށް މަސައްކަތް ކުރަމުން އަންނަ ހަމާސް ޖަމާއަތުން ހަވާލު ކޮށްފައިވާ ރަހީނުންގެ ހަށިގަނޑު ތަކުގެ ތެރެއިން އެކަކީ، ރަހީނުންގެ ތެރެއިން މީހެއް ނޫން ކަމަށް އިސްރާއީލް އިން ބުނެފި އެވެ.

ހަށިގަނޑުތައް ހަވާލު ކުރުމާ އެކު، އިސްރާއީލްގެ އަސްކަރިއްޔާ އިން ވަނީ އެ ހަށިގަނޑު ތަކުގެ ފޮރެންސިކް ތަހުލީލުތައް ކުރިއަށް ގެންގޮސްފަ އެވެ. އެއަށްފަހު މެޑިކަލް އޮފިޝަލް އިން ނިންމާފައި ވަނީ، އޭގެ ތެރެއިން އެއް ހަޑިގަނޑު، ރަހީނު ކުރި އެއްވެސް މީހަކާ ދިމާ ނުވާ ކަމަށެވެ.

އެކަމާ ގުޅޭ ގޮތުން އިސްރާއީލްގެ އަަސްކަރިއްޔާ އިން ވަނީ ހަމާސް ޖަމާއަތަށް އިންޒާރު ދީފަ އެވެ. އެގޮތުން އިސްރާއީލްގެ އަސްކަރިއްޔާ އިން ބުނެފައި ވަނީ މަރުވެފައިވާ ރަހީނުންގެ ހަޑިގަނޑުތައް އަނބުރާ ރައްދު ކުރުމަށް ހަމާސް ޖަމާއަތުން ކުރަން ޖެހޭ އެންމެހާ މަސައްކަތްތައް ކުރަން ޖެހޭނެ ކަމަށެވެ.

ހަމާސް ޖަމާއަތުން ރަހީނުންގެ ހަށިގަނޑުތައް ހަވާލު ކޮށްފައި ވަނީ، ޣައްޒާ ހަނގުރާމަ ނިމުމަކަށް ގެނައުމަށް އެކުލަވާލެވުނު އެއްބަސްވުމުގެ ދަށުންނެވެ. އެގޮތުން ހަމާސް ޖަމާއަތުގެ ބެލުމުގެ ދަށުގައި ތިބި އިސްރާއީލްގެ ރަހީނުންގެ ތެރެއިން ދިރި ތިބި މީހުންނާއި، މަރުވެފައިވާ މީހުންގެ ހަށިތައް ވެސް ހަވާލު ކުރަން ޖެހެ އެވެ.

އެއްބަސްވުމަށް އަމަލު ކުރަން ފެށުމާ އެކު، ހަމާސް އިން ވަނީ ރަހީނުންގެ ތެރެއިން ދިރި ތިބި 20 މީހުން މިނިވަން ކޮށް ހަވާލު ކޮށްފަ އެވެ. އޭގެ ބަދަލެއްގެ ގޮތުގައި އިސްރާއީލްގެ ޖަލު ތަކުގައި ބަންދު ކޮށްފައިވާ ފަލަސްތީނުގެ ރައްޔިތުން ވެސް ވަނީ މިނިވަން ކޮށްފަ އެވެ. ހަަމަ އެހެންމެ، ހަމާސްގެ ބެލުމުގެ ދަށުގައި ތިބި ރަހީނުންގެ ތެރެއިން މަރުވެފައިވާ މީހުންގެ ހަށިތައް ވެސް ހަވާލު ކުރުމުގެ މަސައްކަތް ދަނީ ކުރިއަށެވެ.

ހަމާސް އިން ހަވާލު ކޮށްފައިވާ ހަށުގަނޑު ތަކުގެ ތެރެއިން އެކަކީ ރަހީނުންގެ ތެރެއިން މީހަކަށް ނުވާ ކަމަށް އިސްރާއީލްގެ އަަސްކަރިއްޔާ އިން ބުނެފައި ވާއިރު، އެކަމާ ގުޅޭ ގޮތުން ހަމާސް ޖަމާއަތުން ވަކި އެއްޗެއް ބުނެފައި ނުވެ އެވެ.