ޑޮލަރު ލިބުން ވަރަށް ބޮޑަށް ދަތިވެ، ރާއްޖޭ ގައި މަސައްކަތް ކުރާ އިންޑިއާ ރައްޔިތުންނަށް ބޭރަށް މަހަކު ފޮނުވޭނީ 150 ޑޮލަރު ކަމަށް އެސްބީއައި އިން އަންގައިފި
ސްޓޭޓް ބޭންކް އޮފް އިންޑިއާ އިން އަންގާފައި ވަނީ އޮކްޓޯބަރު 25 އިން ފެށިގެން އިންޑިއާ އަށް މީހަކަށް ފޮނުވޭނީ މަހަކު 150 ޑޮލަރު ކަމަށް
100 ޑޮލަރުގެ ފެޑެރަލް ރިޒާވް ނޯޓެއް
ރާއްޖޭ ގައި ހިންގާ ސްޓޭޓް ބޭންކް އޮފް އިންޑިއާ (އެސްބީއައި) އަށް ޑޮލަރުން ލިބުން ވަރަށް ބޮޑަށް ތާށިވެ، ރާއްޖޭގައި މަސައްކަތް ކުރާ އިންޑިއާ ރައްޔިތުންނަށް ގައުމަށް މަހަކު ފޮނުވޭނީ އެންމެ 150 ޑޮލަރު ކަމަށް އެ ބޭންކުން ކަސްޓަމަރުންނަށް އަންގައިފިއެވެ.
ސްޓޭޓް ބޭންކް އޮފް އިންޑިއާގެ ދިވެހިރާއްޖޭގެ ގޮފިން ނެރުނު އިއުލާނެއްގައި، 25 އޮކްޓޯބަރު 2025 އިން ފެށިގެން ކަސްޓަމަރުންނަށް ފޮނުވޭނީ ގިނަވެގެން 150 އެމެރިކާ ޑޮލަރު (2,313 ދިވެހި ރުފިޔާ) ކަމަށް ބަޔާންކޮށްފައިވެއެވެ.
އެސްބީއައި އިން ބުނެފައިވަނީ މިކަން ކުރަން ޖެހުނީ ބޭންކަށް "ޑޮލަރު ލިބުން ވަރަށް ބޮޑަށް ދަށް ވުމުގެ ސަބަބުން،" ކަމަށެވެ.
މީނޫހާ ވާހަކަ ދެއްކި ރާއްޖޭގައި މަސައްކަތް ކުރާ އިންޑިއާ ޓީޗަރަކު ބުނި ގޮތުގައި، މި ގޮތައް ދަތިި ކުރުމާ ގުޅިގެން ދިވެހިރާއްޖޭ ގައި މަސައްކަތްކުރާ އިންޑިއާ ގެ ޓީޗަރުންގެ މެދުގައި ވަރަށް ބޮޑު ނުތަނަވަސް ކަމެއް އުފެދި އެމީހުން މިހާރު ރާއްޖޭ ގައި މަސައްކަތް ކުރުމުގެ ޝައުގު ވަރަށް ބޮޑަށް ކުޑަވެއްޖެ ކަމަށެވެ.
އޭނާ ބުނި ގޮތުގައި އަހަރުތަކެއް ވަންދެން މުސާރަ އަށް އެއްވެސް ބަދަލެއް ނުގެނެސް ޚިދުމަތްކުރަމުން އަންނަ ގިނަ ބޭރުގެ މަސައްކަތްތެރިން، އިންފްލޭޝަން އިތުރުވަމުން ދިއުމާއެކު ބޮޑުވަމުންދާ ދިރިއުޅުމުގެ ޚަރަދުތަކާއި ހުރުމުގެ ޚަރަދުތަކާ އެމީހުން ކުރިމަތިލަމުންދާއިރު، ފައިސާ ފޮނުވުމުގައި އިތުރަށް ތާށި ކުރުމަކީ އެމީހުންގެ މާލީ ހާލަތަށް ލިބުނު ވަރަށް ބޮޑު ހީނަރުކަމެކެވެ.
ކުރިން އެސްބީއައި މެދުވެރިކޮށް އިންޑިއާ އަށް މަހަކު 400 ޑޮލަރު ފޮނުވެއެވެ. އަދި އޭޓީއެމް މެދުވެރިކޮށް ގައުމުން ބޭރުގައި ރުފިޔާ ކާޑުން 100 ޑޮލަރުގެ މިންވަރަށް ޑޮލަރު ނެގެއެވެ. އެހެން ނަމަވެސް މިހާރު ގެނައި ބަދަލާ އެކު އޭޓީއެމް މެދުވެރިކޮށް އެއްވެސް މިންވަރަކަށް ޑޮލަރު ނުނެގޭނެ ކަމަށް ވެސް އެސްބީއައި އިން ވަނީ އަންގާފައެވެ.
މި މައްސަލައިގައި ކަންބޮޑުވެފައިވާ އިންޑިއާގެ ޓީޗަރު ބުނީ ދެން އެމީހުންނަށް އޮންނާނެ ގޮތަކީ އަނެއްކާ ވެސް ކަޅު ބާޒާރުން ބޮޑު އަގުގައި ޑޮލަރު ހޯދަން އުޅެން ޖެހުން ކަމުގައެވެ. އަދި އެކަމުގެ ފައިދާ ލިބޭނީ ހުއްދަ ނުނަގާ މިކަމުގެ ނާޖާއިޒު ފައިދާ ނަގަމުންދާ ފަރާތްތަކަކަށް ކަމުގައެވެ.
އޭނާ އިތުރަށް ބުނި ގޮތުގައި މޯލްޑިވްސް މަނިޓަރީ އޮތޯރިޓީ (އެމްއެމްއޭ)، އާއި ސްޓޭޓް ބޭންކް އޮފް އިންޑިއާ އަދި ކަމާބެހޭ ސަރުކާރުގެ އިދާރާތަކުން ވަގުތުން ފިޔަވަޅު އެޅުމަކީ ކޮންމެހެން މުހިންމު ކަމެކެވެ. ކަޅު ބާޒާރުގެ ޙަރަކާތްތައް ހުއްޓުވައި، އިންސާފުވެރި އަދި ހަރުދަނާ ފައިސާ ފޮނުވުމުގެ ނިޒާމެއް އަލުން ޤާއިމުކުރުމަށް އަވަސް ފިޔަވަޅުތަކެއް ނޭޅިއްޖެނަމަ، ގިނަ ބޭރުގެ މަސައްކަތްތެރިންނަށް ދިވެހިރާއްޖޭގައި މަސައްކަތްކުރުން އިތުރަށް ދަތިވެގެން ދާނެ ކަމަށް ވެސް ވަނީ ބުނެފައެވެ.
