ޑޮލަރުގެ އަގު، ކަޅު ބާޒާރުގައި ދަށަށްދާ ކަމަށް ވިދާޅުވެ މިނިސްޓަރ ތޯރިގް އިތުރުފުޅު ހައްދަވައިފި

ޑޮލަރު މާރުކުރުމުގެ ސިޔާސަތަށް ގެނައި ބަދަލުގެ ސަބަބުން ކަޅު ބާޒާރުގައި ޑޮލަރުގެ އަގު ދަށަށްދާން ފަށާފައިވާ ކަމަށް ވިދާޅުވެ ޓޫރިޒަމް އެންޑް އެންވައިރޮމެންޓް މިނިސްޓަރ ތޯރިގް އިބްރާހިމް އިތުރުފުޅު ހައްދަވައިފިއެވެ.

އެ މަނިކުފާނު އެފަދައިން ވިދާޅުވީ "އަހާ ފޯރަމް"ގައި ވާހަކަދައްކަވަމުންނެވެ.

މިނިސްޓަރ މިފަދައިން ވިދާޅުވެފައިވާ އިރު ޑޮލަރު ގަންނަން ކަޅު ބާޒާރުގައި މިހާރުވެސް ހުރީ 19 ރުފިޔާ އަށް ވުރެ މަތީގައެވެ. ޑޮލަރުގެ ކަޅު ބާޒާރުގެ މައްސަލަ ހައްލުވަމުންދާ ކަމަށް މިނިސްޓަރ ވިދާޅުވި ނަމަވެސް ޑޮލަރު ގަތުމުގައި މިހާރުވެސް އާއްމުން ދަނީ ބޮޑެތި ތަކުލީފުތަކެއް އުފުލަމުންކަން ފާހަގަކުރެވެއެވެ.

އެހެންނަމަވެސް މިނިސްޓަރ ތޯރިގް ވިދާޅުވެފައި ވަނީ ޑޮލަރު މާރުކުރުމުގެ ސިޔާސަތަށް ގެނައި ބަދަލާއި އެކު ޑޮލަރުގެ ކަޅު ބަޒާރުގައި އަގުތައް ދިޔައީ ދަށަށްކަމަށެވެ. އަދި އެކަން އެގޮތަށް ވެފައި ވަނީ ސަރުކާރުން ގެންގުޅޭ ސިޔާސަތުގެ ސަބަބުން ކަމަށް އެ މަނިކުފާނު ވަނީ ވިދާޅުވެފައެވެ.

މިނިސްޓަރ މިފަދައިން ވިދާޅުވެފައިވާއިރު މިދިޔަ އަހަރު މި ހިސާބުގައި ޑޮލަރުގެ އަގު ކަޅު ބާޒާރުގައި ވެސް ހުރީ 17 ރުފިޔާ އަށެވެ. އޭގެ ކުރީ އަހަރު، ކޮވިޑްގެ ހާލަތު އެންމެ ގޯސްވި އިރު ވެސް ޑޮލަރުގެ އަގު ހުރީ 17 ރުފިޔާގައި ހިފެހެއްޓިފައެވެ.

މިނިސްޓަރ މި މޭރުމުން ވާހަކަދައްކަވާފައިވާ އިރު އެޗްޑީސީ ފަދަ ކުންފުނިތަކަށް މިހާރުވެސް ޑޮލަރު ގަންނަމުން ދަނީ ކަޅު ބާޒާރުންނެވެ. މިހާރުވެސް އެސްއޯއީތަކަށް ބޭންކްތަކުން ޑޮލަރު ވިއްކަމުން ނުދާކަން ފާހަގަކުރެވެއެވެ.

އެހެންކަމަށް ވާއިރު އަންނަ ސެޕްޓެމްބަރު މަހުން ފެށިގެން ސަރުކާރު ހިއްސާވާ ކުންފުނިތަކަށް ރަސްމީ ރޭޓުގައި ޑޮލަރު ލިބޭނެ ކަމަށް ވަޒީރު ވަނީ ފާހަގަކުރައްވާފައެވެ.

ކަޅު ބާޒާރުގައި ޑޮލަރުގެ އަގު ދަށަށްދާން ފަށާފައިވާ ކަަމަށް ބުނެ ސަރުކާރުން ދަނީ އެކަމުގެ ކްރެޑިޓް ވަރަށް ބޮޑަށް ނަގަމުންނެވެ. އަދި އެކަމުގެ ސަބަބުން އާއްމުންނާއި ވިޔަފާރިވެރިން ވަރަށް ބޮޑަށް ހިތްހަމަޖެހިގެން ތިބި ކަމަށް ސަރުކާރުން ދަނީ ބުނަމުންނެވެ. ސަރުކާރުން ދަނީ މިއީ ސަރުކާރުން ބޭރު ފައިސާގެ ނިޒާމަށް ގެންނަން ފެށި ބަދަލުގެ ނަތީޖާ ކަމަށް ދެއްކުމަށް މަސައްކަތްކުރަމުންނެވެ. އެހެންނަމަވެސް މިއީ ހަގީގަތާއި ޚިލާފު ވާހަކައެކެވެ.

ރާއްޖޭގެ ރިސޯޓުތަކުން ބޭންކުތަކަށް ޑޮލަރު މާރުކުރަން ލާޒިމްކޮށް، ރައްޔިތުންގެ މަޖިލީހުން ފާސްކޮށްފައިވާ ބޭރު ފައިސާއާ ބެހޭ ބިލު ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ތަސްދީގު ކުރައްވާފައި ވަނީ ނިމިދިޔަ ޑިސެމްބަރު މަހުގެ 14ވަނަ ދުވަހުގައެވެ. މި ގަވާއިދުގެ ދަށުން ޓޫރިސްޓު ރިޒޯޓުތަކުން ފަތުރުވެރިއެއްގެ ބޮލަކަށް 500 އެމެރިކާ ޑޮލަރު ދިވެހި ބޭންކުތަކުގައި މާރުކުރަންޖެހެއެވެ.