ވަގަށް އެތެރެކުރަނިކޮށް ކަސްޓަމްސްއިން ހިފެހެއްޓި ދެ ކޮންޓެއިނަރުގެ ސިނގިރެޓް ވަގަށް ނަގައިފި

ރާއްޖެއަށް ވަގަށް އެތެރެކުރަން އުޅުނު ދެ ކޮންޓެއިނަރުގެ ސިނގިރޭޓް ކަސްޓަމްސް އިން ހިފެހެއްޓުމަށްފަހު ހުޅުމާލެ ބަނދަރުގައި ބަހައްޓާފައި ހުއްޓާ ސިނގިރެޓްތައް ވަގަށް ނަގައިފިއެވެ.

އިތުބާރު ހުރި ފަރާތަކުން ރާއްޖެއެމްވީއަށް މައުލޫމާތު ދީފައިވާ ގޮތުގައި ގެއްލިގެން އުޅެނީ 1361 ކޭސް ސިނގިރެޓެވެ. އަދި މި ސިނގިރެޓް ވަގަށް ނެގީ ރާއްޖެއަށް އެ އެތެރެކުރަން އުޅެނިކޮށް ކަސްޓަމްސް އިން އެތަކެތި އަތުލައިގަތުމަށްފަހު ކަސްޓަމްސްއާއި އެމްޕީއެލްގެ ބެލުމުގެ ދަށުން ހުޅުމާލެ ޕޯޓަލްގައި ބަހައްޓާފައި ހުއްޓާއެވެ. އަދި މިކަމެއް ހިނގައިގެން އުޅެނީ ބުދަ ދުވަހުގެރޭ ކަމަށް ވެސް މައުލޫމާތު ވަނީ ލިބިފައެވެ. އަދި ސިނގިރެޓް ވަގަށް ނެގިކަން އެނގުނީ ބުދަ ދުވަހުގެ ދަންވަރުއެވެ.

މައުލޫމާތު ދިން ފަރާތުން ބުނީ ސިނގިރެޓް ވަގަށް ނެގިކަން ކަސްޓަމްސްއާއި އެމްޕީއެލްގެ ވެރިންނަށް ވެސް މިހާރު އެނގޭ ކަމަށާއި، ނަމަވެސް އެވާހަކަތައް މީޑިއާއަކާއިވެސް ހިއްސާކޮށްފައި ނުވާ ކަމަށެވެ. އޭނާ ބުނީ ހުޅުމާލެ ޕޯޓުގައި ކެމެރާ ހުންނާނެ ކަމަށާއި، އެކަމުގައި ބައިވެރިވި މީހުންވެސް އެނގޭނެ ކަމަށެވެ.

މައުލޫމާތު ލިބޭ ގޮތުގައި މި ދެ ކޮންޓެއިނާ އަކީ ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން ވެލާނާ އިންޓަރނޭޝަނަލް އެއަރޕޯޓުގެ އައު ޓާމިނަލްގެ މަސައްކަތް އަވަސް ކުރުމަށް މުދާ ގެނައި އިރު އެ މުދާތަކާއެކު ވަގަށް އެތެރެކުރި ދެ ކޮންޓެއިނަރެވެ. އަދި މި ސިނގިރެޓްތައް ހިފެހެއްޓީ އެޕްރީލް މަހުގައެވެ.

މިކަމާއި ގުޅިގެން ފުލުހުން އަދި އެއްޗެއް ހާމަކޮށްފައި ނުވާ އިރު، ކަސްޓަމްސް އަދި އެމްޕީއެލްއިން ވެސް މިކަމާއި ގުޅިގެން އެއްޗެއް ބުނެފައި ނުވެއެވެ. ބައެއް ނޫސްތަކުގައި ބުނެފައިވަނީ ސިނގިރެޓް ވަގަށް ނެގިކަމުގެ މައުލޫމާތު ފުލުހުންގެ އިންޓެލިޖެންސަށް ލިބިގެން ދިޔަ އިރު ކޮންޓެއިނަރުތައް ހުރީ ހުސްކޮށެވެ.

ވަގަށް އެތެރެކުރި ސިނގިރެޓްގެ ޑިއުޓީގެ ގޮތުގައި އެކަނިވެސް 100 މިލިއަނަށް ވުރެ ގިނަ ރުފިޔާ އަރާނެއެވެ. އެ ކޮންޓެއިނަރުތަކުގައި ޖުމްލަ 1361 ކޭސް ސިނިގިރެޓް ހުރި އިރު އެއީ މެންޗެސްޓަރ ބްރޭންޑުގެ ސިނގިރެޓެވެ.

ޑިއުޓީގެ ގޮތުގައި 100 މިލިއަން ރުފިޔާއަށްވުރެ ގިނަ އަދަދެއްގެ ސިނގިރޭޓް ހުރި ދެ ކޮންޓެއިނަރެވެ. ވަގަށް ނެގި ކޮންޓެއިނަރުތަކުގައި ހުރީ މެންޗެސްޓަރ ބްރޭންޑްގެ ސިނގިރޭޓެވެ. ދެ ކޮންޓެއިނަރުގައި މަދުވެގެން 12 މިލިއަން ސިނގިރޭޓް ހުއްޓެވެ.

މި މައްސަލަ ފެންމަތިވެފައިވާ އިރު، އައްޑޫ ސިޓީގެ ހިތަދޫ ވިޔަފާރި ބަނދަރުން ގަވައިދާ ޚިލާފަށް ސިނގިރެޓް އެތެރެެކުރަން އުޅެނިކޮށް އަތުލައިގަނެފައިވެއެވެ. އެއްވެސް އުސޫލެއް ދިރާސާއެއް ނެތި މި ސަރުކާރުން ސިނގިރެޓް އަގގުބޮޑުކޮށް ވޭޕް މަނާކުރުމާއެކު ވަގަށް ސިނގިރެޓް އެތެރެކުރުން ވަނީ އިތުރުވެފައެވެ.

އެންމެ ފަހުން އައްޑޫ ވިޔަފާރި ބަނދަރުން ވަގަށް އެތެރެކުރަން އުޅުނު ސިނގިރެޓްގެ އަދަދު 1.8 މިލިއަނަށް އަރާއިރު، އެއީ ގާތްގަނޑަކަށް 15 މިލިއަން ރުފިޔާގެ ޑިއުޓީ ހިމެނޭ ސިނގިރެޓެވެ.

ފަހަކަށް އައިސް ރާއްޖޭގައި މިފަދަ މައްސަލަތައް އިތުރުވަމުންދާކަން ފާހަގަކުރެވެއެވެ. ސަރުކާރުން ސިނގިރޭޓުގެ އިމްޕޯޓް ޑިއުޓީ މަތިކުރުމާ ގުޅިގެން، ސިނގިރޭޓުގެ އަގު މަތިވެ، ވަގު ސިނގިރޭޓު ވިޔަފާރި ފުޅާވެފައިވާކަން ފާހަގަކުރެވެއެވެ. މިކަމާ ގުޅިގެން ގަވާއިދާ ޚިލާފަށް ސިނގިރޭޓު އެތެރެކުރުމުގެ މައްސަލަތައްވެސް ވަނީ އިތުރުވެފައެވެ.