މި ހާލަތުގައި ރައްޔިތުންގެ ހައްގުތައް ހިމާޔަތްކުރެވޭނެ ހަމައެކަނި ގޮތަކީ ގިނަ ސިޔާސީ ޕާޓީތައް ގުޅިގެން ސަރުކާރު ޖަވާބުދާރީކުރުމުގެ މަސައްކަތް ކުރުން ކަމަށް އެމްޑީޕީ އާއި ޢަދާލަތު ޕާޓީ އަށް ވެސް އެއްބަސް ވެވޭތީ، ޑރ. މުޙައްމަދު މުޢިއްޒުގެ ސަރުކާރު ޖަވާބުދާރީކުރުވުމަށް ދެ ޕާޓީ ގުޅިގެން މަސައްކަތް ކުރުމަށް އެއްބަސްވެއްޖެ އެވެ.

ދިވެހި ރައްޔިތުންގެ ޑިމޮކްރެޓިކް ޕާޓީއާއި އަދާލަތު ޕާޓީގެ ގުޅިފައިވާ ނޫސްބަޔާނުގައި ބުނެފައި ވަނީ ރައީސް މުޢިއްޒު ދިވެހިރާއްޖޭގެ ވެރިކަމާ ޙަވާލުވެވަޑައިގަތުމާއި އެކު ޒިންމާދާރު ސިޔާސީ ޕާޓީތަކުގެ ޙައްސިއްޔަތުން އެމްޑީޕީ އާއި ޢަދާލަތު ޕާޓީން ރައްޔިތުންގެ ނިންމުމަށް އިހުތިރާމުކޮށް ރައީސުލްޖުމްހޫރިއްގެ ވައުދުތައް ފުއްދުމަށް އެކަށީގެންވާ ވަގުތު ދެވިފައިވާ ކަމަށެވެ. އެެހެން ނަމަވެސް ދައުރު ދެބައިވެގެން ދާއިރު ގައުމުގެ ޙާލަތު މުޅިން ބޮއްސުންލާފައިވާ ކަމަށް ބުރާސްފަތި ދުވަހު ބާއްވާފައިވާ އެ ދެ ޕާޓީގެ ބައްދަލުވުމުގައި ވަނީ އެއްބަސްވެފަ އެވެ.

އެ ބަޔާނުގައި ބުނެފައި ވަނީ ސަރުކާރުން ދިވެހިރާއްޖޭގެ މުޅި ދުސްތޫރީ ނިޒާމު ގަޑުބަޑުކޮށްފައިވާ ކަމަށެވެ. ގާނޫނުއަސާސީ ބަދަލުކޮށްގެން ރައްޔިތުންގެ މަޖިލިސް މެންބަރުން ކަސްތޮޅު އަޅުވައި، އެ މައްސަލަ ބަލަން ފެށުމުން ސުޕްރީމް ކޯޓުގެ ފަނޑިޔާރުން ބޭއިންސާފުން މަގާމުން ވަކިކޮށް އަދުލު އިންސާފުގެ މިނިވަންކަން ނަގާލާފައިވާ ކަމަށް އެ ބަޔާނުގައި ބުނެފައިވެއެވެ. އަދި ހުރިހާ މިނިވަން މުއައްސަސާތަކެއް ސަރުކާރުގެ ކޮންޓްރޯލްގެ ދަށަށް ވަނީ ގެންގޮސްފައި ކަމަށް އެ ބަޔާނުގައިވެ އެވެ.

ހައްގު ހޯދުމަށް ރައްޔިތުން ޝަކުވާ ހުށަހަޅަން ދާނެ ތަނެއް، އަދި މައްސަލަ ޖެއްސޭނެ ގޮތެއް ވެސް ރާއްޖެ އަކު މިއަދު ނެތް ކަމަށް އެ ބަޔާނުގައި ފާހަގަކޮށްފައިވެއެވެ. އަދި ރައްޔިތުންގެ ހައްގުތައް ހިމާޔަތް ކޮށްދޭނެ ދައުލަތުގެ މުއައްސަސާ އެއް އަމުދުން ނެތް ކަމަށް އޭނާ ވަނީ ފާހަގަކުރައްވާފަ އެވެ.

އެމް.ޑީ.ޕީން އިސްނަގައިގެން ހުކުރު ދުވަހު ބާއްވާ ސުލްހަވެރި އިހުތިޖާޖަކީ ގައުމުގެ ހައްގުގައި ކޮންމެހެން ކުރުން މުހިންމު ކަމެއް ކަމަށާއި، ދެ ޕާޓީގެ ވީހާ ވެސް ގިނަ މެންބަރުންނާއި އަދި ވީހާ ވެސް ގިނަ ޢާންމު ރައްޔިތުން ވަކި ސިޔާސީ ވިސްނުމަކަށް ބެލުމެއް ނެތި މި އެއްވުމުގައި ބައިވެރިވުމަށް އެ ދެ ޕާޓީން ވެސް ވަނީ ގޮވާލާފައެވެ.

އެ ދެ ޕާޓީގެ ބަޔާނުގައި އިތުރަށް ބުނެފައި ވަނީ، ޤާނޫނުއަސާސީން ކަށަވަރުކޮށްދީފައިވާ އަސާސީ ހައްގުތައް ނިގުޅައިގަނެ ފައިވާކަމާއި، ސަރުކާރުން ކުރާ ވައްކަމާއި ހިންގަމުން ގެންދާ ހިޔާނާތުގެ އަމަލުތަކާއެކު ރައްޔިތުންގެ ދިރިއުޅުމުގެ ހާލަތު ދުވަހެއް ދުވަހަކަށް ދަށްވަމުންދާކަމަށެވެ. އަދި އެކަންކަމުގެ ހަގީގަތް ފޮރުވުމުގެ ބޭނުމުގައި އެންމެ ފަހުން، މިނިވަން މީޑިއާ ނެތިކޮށްލަން ސަރުކާރުން މަސައްކަތް ކުރާ ކަމަށް އެ ބަޔާނުގައި ބުނެފައިވެ އެވެ.

މީގެ އިތުރުން ތަކެތީގެ އަގުތައް ބޮޑުވެ، ކަރަންޓުގެ އަގު އިންތިހާ އަށް މައްޗަށް ގޮސް، ރައްޔިތުންގެ އާންމު ދިރިއުޅުމަށް ދަތިވެއްޖެ ކަމަށާއި، ވިޔަފާރިތައް ފުނޑި، އެތައް ބައެއްގެ ވަޒީފާ ގެއްލިފައިވާ ކަމަށް އެ ބަޔާނުގައި ވަނީ ފާހަގަކޮށްފައި ވެއެވެ. ހަމަ އެެހެންމެ އެތަކެއް އާއިލާއެއް ބިކަވެއްޖެ ކަމަށާއި، ރަނގަޅަށް ހިނގަހިނގައި އޮތް ދިވެހި އިގްތިސާދަ މި ސަރުކާރުން ގެނައި ދޯހަޅި ބަދަލުތަކުގެ ސަބަބުންނާއި ނާގާބިލު މީހުން މަގާމުތަކަށް އައްޔަނުކުރުމުގެ ސަބަބުން ރައްޔިތުންގެ އިތުބާރު ގެއްލިފައިވާ ކަމަށް ވެސް އެ ބަޔާނުގައި ފާހަގަކޮށްފައިވެއެވެ. ސަރުކާރަށް އާއްމުންގެ އިތުބާރު ގެއްލުނު ސަބަބުތަކުގެ ތެރޭގައި މަރުކަޒީ ބޭންކާއި އެހެނިހެން ބޭންކުތަކަށް ޒިންމާދާރުކަން ކުޑަ ގޮތަކަށް ގެންނަމުންދާ ކުއްލި ބަދަލުތައް ހިމެނޭ ކަމަށާއި ރާއްޖޭގެ އިގުތިސާދު މިއިން ޒަމާނަކު ނުވާވަރަށް ދަށްވެއްޖެކަމަށް ވެސް އެ ޕާޓީން ބުނެފައިވެ އެވެ.

އަދި ދިވެހިރާއްޖޭގެ އެތެރޭގެ އިގްތިސާދު އެކީއެކަށް ފުނޑިގެން ގޮސް، ބޭރުގެ ދަރަނި ނުދެއްކި، ރައްޔިތުންގެ އަސާސީ ކަންކަން ވެސް ހަމަނުޖެއްސޭ ހިސާބަށް ގޮސްފިކަމާއި، ނަތީޖާއެއްގެ ގޮތުން، ދިވެހިރާއްޖޭގެ މިނިވަންކަމާއި ސިޔާދަތު ގެއްލިދާ ފަދަ ހާލަތަކަށް ހިނގައިދާނެ ކަމުގެ ބިރު އެބައޮތެވެ.

ހަމަ އެއާއި އެކު އަމިއްލަ ކޮންޓްރެކްޓަރުންނާއި ސަޕްލަޔަރުންނަށް ސަރުކާރުން ދޭން ޖެހޭ ފައިސާ ދިނުން މުޅިން ހުއްޓައިލާފައި ވިޔަސް، ޓެކްސް ނުދެއްކޭ މީހާ ޖަލަށްލާން ގާނޫނު އެކަލަވާލުމުގެ މަސައްކަތް ކުރިއަށްދާކަން އެ ބަޔާނުގައި ފާހަގަކޮށްފައިވެއެވެ. އާސަންދައިގެ މުޅި ނިޒާމު މި ސަރުކާރުން ހަރާބުކޮށްލައި، އެންސްޕާ މެދުވެރިކޮށް ވެސް ސިޔާސީ ކަންކަމަށް ހަރަދު ކުރުމުގެ ސަބަބުން، ކޮންމެހެން ލިބެންޖެހޭ އާއްމު ބޭހާއި ފަރުވާ ނުލިބި، އަނެއްކާވެސް ދިވެހި ރައްޔިތުން ބޭސްފަރުވާއަށް ސަލާން ޖަހަން މަޖުބޫރުވެފައިވާ ކަމަށް އެ ބަޔާނުގައި ވަނީ ބުނެފައެވެ.

ރަށްރަށުގައި ހިންގަމުންދިޔަ ޕްރޮޖެކްޓުތައް އެކީއެކަށް ހުއްޓުމާއި، ކުރީ ސަރުކާރުގެ ބޯހިޔާވަހިކަމުގެ ސިޔާސަތުގެ ތެރެއިން އިމާރާތްކޮށްފައިވާ ފްލެޓްތައް ހަވާލުނުކޮށް އެތައް ދުވަހެއް ލަސްކޮށް، އެ ސަރުކާރުން ހިއްކައި، ތަރައްގީ ކުރަން ފެށި ގުޅީފަޅާއި ގިރާވަރުފަޅު އަދި އުތުރުތިލަފަޅުގެ އެއްވެސް މަސައްކަތެއް ކުރިއަށް ނުގެންގޮސް، ފުށިދިއްގަރުފަޅު ހިއްކުމުގެ ނަމުގައި ރައްޔިތުންގެ ފައިސާ އަށް ސަރުކާރުން ޚިޔާނާތްތެރިވާ ކަަމަށް އެ ބަޔާނުގައި ބުނެފައިވެއެވެ.